ވޯޓަރކްރެސް ކެޕިޓަލް މެދުވެރިކޮށް މަޝްހޫރު ސުޕަރއެޕްލިކޭޝަން "އީޒެޕް" އަށް ޕްރައިވެޓް ފައިނޭންސް ކާމިޔާބުކަމާއެކު ހޯދައިދީފި

ދިވެހިރާއްޖޭގައި އެންމެ ފުޅާ ދާއިރާއެއްގައި ޑިޖިޓަލް ޚިދުމަތްތައް ފޯރުކޮށްދެމުން އަންނަ މަޝްހޫރު ސުޕަރ-އެޕްލިކޭޝަން "އީޒެޕް" ގެ ޚިދުމަތްތައް އިތުރަށް ފުޅާކުރުމަށްޓަކައި ބޭނުންވާ ޕްރައިވެޓް ފައިނޭންސް، ވޯޓަރކްރެސް ކެޕިޓަލް މެދުވެރިކޮށް ކާމިޔާބުކަމާއެކު ހޯދައިދީފިއެވެ.

މި މުހިންމު ކާމިޔާބީއާ ގުޅިގެން އީޒެޕްގެ ސީ.އީ.އޯ މިޢުވާން ވިދާޅުވީ، ރާއްޖޭގެ ޓެކްނޮލޮޖީ ކުންފުނިތައް ކުރިއެރުވުމުގައި ރައުސްމާލު ހޯދުމުގެ ދަތިކަން ނެތްނަމަތުރުވެރިކަމާއި އިމާރާތްކުރުމުގެ ދާއިރާއެކޭ އެއްފަދައިން މި ދާއިރާވެސް ފުޅާކުރުމުގެ ވަރުގަދަ ބިންގަލެއް އެޅިގެންދާނެ ކަމަށެވެ. އަދި މިހާރުވެސް ގިގް އިކޮނޮމީގެ ތެރެއިން ޒުވާނުންނަށް ވަޒީފާގެ އައު ފުރުސަތުތައް ފަހިކޮށްދިނުމުގައާއި، ކުދި އަދި މެދު ފަންތީގެ ވިޔަފާރިތަކަށް ޑެލިވަރީ ނެޓްވޯކް މެދުވެރިކޮށް ކަސްޓަމަރުންނާ ގުޅުވައިދީ، އާމްދަނީ އިތުރުކުރެވޭނެ މަގުތައް ފަހިކޮށްދެމުންދާކަން އޭނާ ފާހަގަކުރެއްވިއެވެ.

ވޯޓަރކްރެސްގެ ސީ.އޯ.އޯ ސަހާ ވިދާޅުވީ، ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީ.އެމް.ޑީ.އޭ) ގެ ގަވާއިދުތަކާއި އުސޫލުތަކުގެ ތެރެއިން އީޒެޕް ފަދަ އީޖާދީ ވިޔަފާރިއަކަށް ފައިނޭންސް ހޯދުމުގެ ފުރުސަތު ފަހިކޮށްދެވުމަކީ ލިބުނު ވަރަށް ބޮޑު ފަޚުރެއް ކަމަށެވެ. މީގެއިތުރުން، ރާއްޖޭގެ ޒުވާނުން ހިންގާ ވިޔަފާރިތަކަށް ޕްރައިވެޓް ފައިނޭންސް ހޯދައިދިނުމުގައި ލަފާދޭ މައި ފަރާތެއްގެ ގޮތުން ވޯޓަރކްރެސްއަށް މަސައްކަތް ކުރުމުގެ ފުރުސަތު ލިބިގެންދިޔުމަކީ އެ ކުންފުންޏަށް ލިބޭ ނުހަނު ބޮޑު އުފަލެއް ކަމުގައިވެސް އޭނާ ވިދާޅުވިއެވެ.

އީޒެޕަކީ ރިބާ އެކުލެވޭ އެއްވެސް ދަރަންޏެއް ނުނަގާނެ ކުންފުންޏެއް ކަމަށް ކަނޑައަޅާފައިވާތީ، މި ފައިނޭންސް ހަމަޖައްސާފައިވަނީ އިސްލާމީ ވަކާލާ އޮނިގަނޑުގެ ތެރެއިންނެވެ. މިއީ އީޒެޕްގެ ޚިދުމަތްތައް އިތުރަށް ފުޅާކުރުމަށްޓަކައި ލިބުނު ވަރަށް މުހިންމު ކެޕިޓަލް އިންވެސްޓްމަންޓެކެވެ. އަދި މިފަދަ އިންވެސްޓްމަންޓްތަކަކީ ވޯޓަރކްރެސް ފަދަ ތަޖުރިބާކާރު، ފަންޑް ރެއިޒިންގ އަދި އެޑްވައިޒަރީ ލައިސަންސް އޮންނަ ފަރާތްތަކުގެ މޮނިޓަރިންގއާ އެކު ކުރިއަށްދާ ކަންކަމަށް ވާތީ، މީގެ ސަބަބުން ކުންފުނީގެ ގަވަރނަންސްއާއި ހިންގުންވެސް އިތުރަށް ހަރުދަނާވެގެންދާނެ ކަމަށް އެ ފަރާތުން ޤަބޫލުކުރެއެވެ.

އަދި މިއީ އިސްލާމީ އުސޫލުތަކަށް ފެތޭ އިންވެސްޓްމަންޓްއަކަށް ވާތީ، މިއިން ކޮންމެ ކޮންމެ ކަމަކަށް ޚަރަދު ނުކުރެވޭނެ ކަމަށާއި، މި ފައިސާ ބޭނުންކުރެވޭނީ ކަނޑައެޅިފައިވާ ޚާއްޞަ ކަންކަމަށް ކަމަށް އެ ކުންފުނިން މަޢުލޫމާތުދެއެވެ.

އަދި މި އިންވެސްޓްމަންޓްގެ މައިގަނޑު މަޤްޞަދެއްގެ ގޮތުގައި އީޒެޕްގެ "ސައިކަލް ޓެކްސީ" ގެ ޚިދުމަތް އިތުރަށް ހަރުދަނާކުރުން ހިމެނެއެވެ. މީގެއިތުރުން ދެވަނަ ކަމެއްގެ ގޮތުގައި ކަނޑައަޅާފައިވަނީ، ޑިޖިޓަލް ގްރޮސަރީ ޑެލިވަރީގެ ދާއިރާ ނުވަތަ ގޭގެއަށް ބޭނުންވާ ސާމާނު ޑެލިވަރ ކޮށްދިނުމުގެ ޚިދުމަތުގައި އިސްނަގައި (ޕައިނިއަރ ކޮށް)، އެ ޚިދުމަތް ކުރިއަށްވުރެ ބޮޑަށް ފުޅާކުރުމެވެ.

އީޒެޕަކީ ރާއްޖޭގައި މިހާރު ދެމުންގެންދާ ގިނަ ޚިދުމަތްތަކެއް އެއް ޕްލެޓްފޯމަކުން ލިބޭގޮތަށް ތަޢާރަފްކުރި ފުރަތަމަ ސުޕަ އެޕްލިކޭޝަނެވެ. މި އެޕްލިކޭޝަން މެދުވެރިކޮށް، ކޮންމެ ފަރާތަކަށްވެސް ޕަބްލިކް ޑެލިވަރީ ޑްރައިވަރެއްގެ ގޮތުގައި ސައިންއަޕް ވެގެން އާމްދަނީ ހޯދުމުގެ ފުރުސަތު ވަނީ ތަނަވަސްކޮށްދީފައެވެ. އަދި ހަމައެއާއެކު، ކޮންމެ ފަދަ ވިޔަފާރިއަކަށް ނުވަތަ ސްޓޯރަކަށްވެސް އީޒެޕްގައި ރަޖިސްޓްރީވެ، އޮންލައިންކޮށް ތަކެތި ވިއްކައި، ޑެލިވަރީގެ ޚިދުމަތާއެކު ކަސްޓަމަރުންނާ ހަމައަށް ފަސޭހަކަމާއެކު ޚިދުމަތް ފޯރުކޮށްދިނުމުގެ މަގު ވަނީ ފަހިވެފައެވެ.