ދިވެހި ލިޔުންތެރިންގެ ފޮތްތައް ވިއްކުމަށް 'އީޒެޕް' އިން 'ފިޖިޓަލް' ބުކްސްޓޯރެއް ތައާރަފްކޮށްފި

ދިވެހި އަދަބިއްޔާތަށް ޚިދުމަތްކުރާ ލިޔުންތެރިންނާއި މުސައްނިފުންގެ ފޮތްތައް ފަސޭހަކަމާއެކު ވިއްކޭނެ މަގުފަހިކޮށްދިނުމުގެ ގޮތުން، މަގުބޫލު ސުޕަ އެޕް 'އީޒެޕް' އިން "ފިޖިޓަލް" ބުކްސްޓޯރެއް ރަސްމީކޮށް ތައާރަފްކޮށްފިއެވެ.

މި ޚިދުމަތުގެ ސަބަބުން ލިޔުންތެރިންނަށް ހަމައެކަނި ފޮތްތައް ޑެލިވަރީ ކުރުމުގެ ފަސޭހަކަން ލިބުމުގެ އިތުރުން، އީޒެޕްގެ ކަސްޓަމަރ ބޭސްއަށް އެ ފަރާތްތަކުގެ ފޮތްތައް އިޝްތިހާރުކޮށް ވިއްކުމުގެ ފުރުސަތު ތަނަވަސްވެގެންދާނެއެވެ.

އީޒެޕަކީ ކާބޯތަކެއްޗާއި، ގްރޮސަރީ، ސައިކަލް ޓެކްސީ އަދި ވިޔަފާރީގެ ތަފާތު ޚިދުމަތްތައް އެއް ފުރާޅެއްގެ ދަށުން ފޯރުކޮށްދޭ ސުޕަ އެޕްލިކޭޝަނެކެވެ. އީޒެޕުން މައުލޫމާތު ދޭ ގޮތުގައި، ޝޮޕިންގްގެ ޚިދުމަތް ތައާރަފްކުރި ފަހުން އެ ކުންފުނި މިހާރު މިސްރާބު ޖަހާފައިވަނީ ފުރިހަމަ އީ-ކޮމާސް ޕްލެޓްފޯމަކަށް ބަދަލުވުމަށެވެ.

މި ޚިދުމަތް އިފްތިތާހުކުރުމަށް ބޭއްވި ހަފްލާގައި އީޒެޕްގެ ސީއީއޯ ވިދާޅުވީ، އެ ކުންފުނީގެ އަމާޒަކީ މަޑުމަޑުން، ފިޔަވަޅަކަށްފަހު ފިޔަވަޅެއް ކުރިއަށް އަޅަމުން ޕްލެޓްފޯމް ބިނާކުރުން ކަމަށެވެ.

"އެހެންކަމުން ފެށުމުގައި މި ޚިދުމަތް އެންމެ ފުރިހަމަ ނުވެދާނެ. ނަމަވެސް އަޅުގަނޑުމެންގެ އުންމީދަކީ ލިޔުންތެރިންގެ މަސައްކަތުގެ އަގުވަޒަންކޮށް، އެ ފަރާތްތަކަށް ރަނގަޅު އާމްދަނީއެއް ހޯދައިދިނުމުގައި އެހީތެރިވެދިނުން،" ސީއީއޯ ވިދާޅުވިއެވެ.

މި އައު ޚިދުމަތާ ގުޅޭގޮތުން ޝުއޫރު ފާޅުކުރަމުން ދިވެހި ލިޔުންތެރިއަކު ބުނީ، ރާއްޖޭގައި ގިނައީ އަމިއްލައަށް ފޮތް ޕަބްލިޝްކުރާ މުސައްނިފުން ކަމަށްވުމުން، ފޮތް ގަންނަ ފަރާތްތަކަށް ޑެލިވަރީކުރުމުގެ ކަންތައް އަބަދުވެސް އޮންނަނީ ވަރަށް ދަތި ކަމަކަށް ވެފައި ކަމަށެވެ.

"އެހެންވެ، 'ދިވެހިފޮތް' އެޕާއި 'އީޒް' އެޕުން މި ފޯރުކޮށްދޭ ޚިދުމަތަކީ ވަރަށް ބޮޑު އެހީއަކަށް ވާނެ. ފޮތް ދެކެ ލޯބިވާ މީހެއްގެ ހައިސިއްޔަތުން ވަރަށް ބޮޑަށް ޝުކުރުއަދާކުރަން،" އޭނާ ބުންޏެވެ.

މި އިވެންޓުގައި އީޒެޕްގެ އިތުރުން، ޖަވާބު އެކަޑަމީގެ ފަރާތުން މުހައްމަދު ޖައިލަމް ވަނީ އަލަށް ތައާރަފްކުރި ޑިޖިޓަލް ޕްލެޓްފޯމް "ދިވެހިވާހަކަ.ކޮމް" (DhivehiVaahaka.com) ލިޔުންތެރިންނަށް ތައާރަފްކޮށްދެއްވާފައެވެ. މިއީ ލިޔުންތެރިންނަށް އެ ފަރާތްތަކުގެ މަސައްކަތުން އާމްދަނީ ހޯދުމުގެ ފުރުސަތު ފަހިކޮށްދިނުމާ އެކު، ކިޔުންތެރިންނަށް އީ-ބުކް ކިޔުމާއި، އަޑުއެހުމުގެ އިތުރުން ވިޝުއަލައިޒްޑް އޯޑިއޯ ޑްރާމާތައް ބަލައިލުމުގެ ފުރުސަތު ލިބިގެންދާނެ ޒަމާނީ ޕްލެޓްފޯމެކެވެ.

އީޒެޕް ޑައުންލޯޑްކުރުމަށް: https://eeezap.com/customer

އިތުރު މައުލޫމާތު 7560606 ލިބޭނެ ކަމަށް އީޒެޕުން ބުނެއެވެ.