ބޭންކިން ނިޒާމުގައި ޑޮލަރު ހިފެހެއްޓުމަކީ އިގްތިޞާދަށް މުހިންމު ކަމެއް: މުއްތަލިބް

ބޭންކިން ނިޒާމުގައި ޑޮލަރު ހިފެހެއްޓުމަކީ ރާއްޖޭގެ އިގްތިޞާދަށް ވަރަށް މުހިންމު ކަމެއް ކަމަށް ކޮންސްޓްރަކްޝަން މިނިސްޓަރ އަބްދުالله މުއްޠަލިބު ވިދާޅުވެއްޖެއެވެ.

މިނިސްޓަރ މުއްޠަލިބު މިހެން ވިދާޅުވެފައިވަނީ ރާއްޖެއަށް ވަންނަ ބޭރު ފައިސާއާ ބެހޭ ގަވާއިދަކާއި ފައިސާ މާރުކުރުމުގެ ވިޔަފާރިއާ ބެހޭ ގަވާއިދެއް އެމްއެމްއޭއިން އެކުލަވާލުމާ ގުޅިގެން އެކްސް ގައި ކުރެއްވި ޕޯސްޓެއްގައެވެ.

މިނިސްޓަރ މުއްޠަލިބު ވިދާޅުވީ، މިއީ ކުރީގެ ހުރިހާ ސަރުކާރުތަކަކުންވެސް ބޭނުންވެފައިވާ، ނަމަވެސް ސިޔާސީ ހިތްވަރު ނެތުމުގެ ސަބަބުން ނުނިންމި ނިންމުމެއް ކަމަށެވެ.

އަދި ރާއްޖޭގެ ބޭންކިން ނިޒާމުގައި ޑޮލަރު ހިފެހެއްޓުމަކީ އިމްޕޯޓްތަކަށް ފައިސާ ދެއްކުމަށާއި، ބައިނަލްއަގުވާމީ ދަރަނިތައް އަދާކުރުމަށާއި، ކާޑު ސެޓްލްމަންޓްތަކަށް ފައިސާ ދެއްކުމަށާއި، ދިވެހި ރުފިޔާގެ އަގު ސްޓެބިލައިޒް ކުރުމަށާއި، ޑޮލަރުގެ ކަޅު ބާޒާރު ނައްތާލުމަށް ކޮންމެހެން ބޭނުން ކަމެއް ކަމަށް އެމަނިކުފާނު ވިދާޅުވިއެވެ.

މީގެ އިތުރުން، ރަނގަޅު ޑޮލަރު ރިޒާވެއް އޮތުމަކީ އިގްތިޞާދީ ހަރުދަނާކަމާއި އަގުތައް ކޮންޓްރޯލް ކުރުމަށް މުހިންމު ކަމެއް ކަމަށާއި، މިއީ އިގްތިޞާދީ ކުރިއެރުމާއި މާލީ ހަރުދަނާކަމަށް ކޮންމެހެން ބޭނުން ކަމެއް ކަމަށްވެސް މިނިސްޓަރ މުއްޠަލިބު ފާހަގަކުރެއްވިއެވެ. އަދި ޓޫރިޒަމް ހިމެނޭ ގޮތަށް ހުރިހާ އިގްތިޞާދީ ދާއިރާތަކެއް ކުރިއެރުވުމަށްޓަކައި ގައުމުގެ އިގްތިޞާދު ހަރުދަނާވެފައި އޮތުން މުހިންމު ކަމަށްވެސް ވަޒީރު ވިދާޅުވިއެވެ.

މިނިސްޓަރ މުއްޠަލިބު އިތުރަށް ވިދާޅުވީ، ފާއިތުވި އަހަރުތަކުގައި ރާއްޖެއަށް މިކަން ރެގިއުލޭޓް ކުރަން ޖެހިފައިވާކަން ވަރަށް ސާފުކޮށް ފެންނަން އޮތް ކަމަށެވެ.

މަނީޗޭންޖިން ވިޔަފާރިއާ ބެހޭ ޤަވައިދުގެ ދަށުން އެމްއެމްއޭއިން ވަނީ ރާއްޖޭގައި ޓޫރިޒަމް ވިޔަފާރިކުރާ ތަންތަނަށް، އެތަންތަނަށް ވަންނަ ޑޮލަރު އާމްދަނީން ވަކި އިންސައްތައެއް ރާއްޖޭގެ ބޭންކުތައް މެދުވެރިކޮށް މާރުކުރުމަށް ލާޒިމްކޮށްފައެވެ. އެގޮތުން ކެޓަގަރީ އޭގައި ހިމެނޭ، ޓޫރިސްޓް ރިޒޯޓުތަކާއި، ހޮޓާތަކާއި، އުޅަނދުތަކާއި އެނޫންވެސް އެފަދަ ތަންތަނުން ކޮންމެ ޓޫރިސްޓަކަށް 500 ޑޮލަރުގެ ރޭޓުން މީލާދީ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ރުފިޔާއަށް މާރުކުރަން ޖެހޭ ގޮތަށް ވަނީ ހަމަޖައްސާފައެވެ.

ކެޓަގަރީ ބީގައި ހިމެނޭ ތަންތަނުން މާރުކުރަންޖެހޭކަމަށް ކަނޑައަޅާފައިވަނީ ޓޫރިސްޓަކަށް 25 ޑޮލަރެވެ. ކެޓަގަރީ ބީގެ ގޮތުގައި ކަނޑައަޅާފައިވަނީ 50 ކޮޓަރި، ނުވަތަ އެއަށްވުރެ މަދުން ކޮޓަރި ހުންނަ ތަންތަނެވެ.

އެމްއެމްއޭއިން ބުނީ، ވަކި ހާލަތްތަކެއްގައި މިއަށް ވުރެ މަދުން މާރުކުރުމުގެ ހުއްދައަށް އޮތޯރިޓީގައި އެދެވިދާނޭ ކަމަށެވެ. އެއީ ބޭރުފައިސާ އިން ޓެކްސް ދެއްކުން، މާލީ އިދާރާއަކަށް ބޭރުފައިސާއިން ދަރަނި ދެއްކުން، ކޯޓު ހުކުމަކުން ކަނޑައަޅާފައިވާ ބޭރުފައިސާގެ އިލްތިޒާމްތަކާއި އަޮތޯރިޓީން ހުއްދަދޭ އެހެން ވެސް ބޭރު ފައިސާގެ އިލްތިޒާމްތައް އޮތުމެވެ.