ރަސްމާލެއިން ޕްރޮޕަޓީ ގަންނަ ފަރާތްތަކަށް އޮޓަމެޓިކުން ވާރުތަވާނޭ ކަމަށް ބުނުމަކީ ޙަޤީޤަތާ ޚިލާފު ވާހަކައެއް: މުއްޠަލިބު

ރަސްމާލެ މަޝްރޫޢުގެ ދަށުން ވިއްކާ ޕްރޮޕަޓީތަކަކީ އޮޓަމެޓިކުން ވާރުތަވާނެ އެއްޗެއް ކަމަށް ބުނެ ދައްކަމުންދަނީ ޙަޤީޤަތާ ޚިލާފު ވާހަކަތަކެއް ކަމަށް ގެދޮރުވެރިކަމާ ބެހޭ ވަޒީރު ޑރ. ޢަބްދުالله މުއްޠަލިބު ވިދާޅުވެއްޖެއެވެ.

ވަޒީރު މުއްޠަލިބު މިހެން ވިދާޅުވީ ޝެއިޚް ޒަމްޒަމް ފާރިޝް "އެކްސް" ގައި ކުރެއްވި ޕޯސްޓަކަށް ރައްދު ދެއްވަމުންނެވެ.

ޝެއިޚް ޒަމްޒަމް ފާރިޝް ކުރެއްވި ޕޯސްޓުގައި ރަސްމާލެ މަޝްރޫޢު ހިންގާ އީގަލް ހިލްސްގެ ވެބްސައިޓުގައިވާ ކަންކަން ފާހަގަކުރައްވައި ވިދާޅުވީ  ވާރުތަވާ ތަރިކައެއްގެ ގޮތުގައި ބޭރު ބައެއްގެ އަތްމައްޗަށް ދިވެހި ޤައުމުގެ ސަރަޙައްދުން އެއްވެސް އެއްޗެއް ދިނުމުން، އެ ބިން ދިވެހިންގެ އަތުން ތާއަބަދަށް ގެއްލިގެންދާނެ ކަމަށެވެ. އަދި، 99 އަހަރަށް އެއްބަސްވުން ހެދުމުގެ އެއްވެސް ބޭނުމެއް ނެތް ކަމަށް ޝެއިޚް ފާރިޝް ވިދާޅުވިއެވެ.

މި ވާހަކަތަކަށް ރައްދު ދެއްވަމުން ވަޒީރު މުއްޠަލިބު ވިދާޅުވީ، ރަސްމާލެއިން ޕްރޮޕަޓީ ގަންނަ ފަރާތުގެ މިލްކަކީ ހަމައެކަނި އެ ޕްރޮޕަޓީ ކަމަށާއި، އެ ޕްރޮޕަޓީ ހިމެނޭ ބިމަކީ އަބަދުވެސް ދިވެހި ދައުލަތުގެ މިލްކެއް ކަމަށެވެ.

އެ ޕްރޮޕަޓީއެއް ވިއްކާލާނަމަ، ނުވަތަ އެފަރާތެއް މަރުވުމުން ވާރުތަވާނަމަ، ވާރުތަވާނީ ދިވެހި ސަރުކާރުން ބަލަންޖެހޭ ކަންކަން ބެލުމަށްފަހު ހުއްދަކުރާނަމައެވެ. ސަރުކާރުން ހުއްދަ ދޭނަމަ ހުއްދަ ދޭނީ އެކަމަށް ކަޑައެޅިފައިވާ ފީ ނެގުމަށްފަހުގައެވެ. އެހެން ކަމުން އޮޓަމެޓިކުން ވާރުތަވާނޭ ކަމަށް ބުނުމަކީ ޙަޤީޤަތާ ޚިލާފުވާހަކައެކެވެ. ރާއްޖޭގައި ހުރި ބޭރު ފަރާތްތަކުގެ ރިސޯޓުތަކާއި ވިޔަފާރިތަކަކީވެސް ވިއްކާ، ބަދަލުކޮށް، ވާރުތާ މުދާތަކެކެވެ.

ވަޒީރު މުއްޠަލިބު

.މީގެއިތުރުން، ރަސްމާލެއިން ޕްރޮޕަޓީއެއް ގަތުމަކީ އެމީހަކަށް އަދި އާއިލާއަށް އޮޓަމެޓިކުން ވިސާ ލިބޭނެ ކަމެއް ނޫން ކަމަށްވެސް ވަޒީރު ވިދާޅުވިއެވެ. ވިސާ ދިނުމާއި ކެންސަލްކުރުމަކީ އިމިގްރޭޝަންގެ ޤާނޫނުގެ ދަށުން ބަލަންޖެހޭ ކަންކަން ބެލުމަށްފަހު ހަމައެކަނި އެ އިދާރާއިން ކުރާ ކަމެއްކަން ވަޒީރު ސާފުކޮށްދެއްވިއެވެ.

ދިވެހި ދައުލަތަކީ ފަޚުރުވެރި މިނިވަން ދައުލަތެއްކަން ފާހަގަކުރައްވަމުން ވަޒީރު ވިދާޅުވީ، ދައުލަތް ތަނަވަސްވެ ތަރައްޤީވަމުން ދިއުމަކީ ޤައުމުގެ އިސްތިޤުލާލު ވަރުގަދަވެ، ބޭރުގެ ނުފޫޒުތަކުން ސަލާމަތްވުމަށް ކޮންމެހެން މުހިންމު ކަމެއް ކަމަށެވެ. އަދި ދިވެހި ދައުލަތް މުއްސަނދިވުމަކީ ރާއްޖެއަށް ނުފޫޒު ފޯރުވަން ބޭނުންވާ ފަރާތްތަކުން އެދޭނެ ކަމެއް ނޫން ކަމަށާއި، ރާއްޖެއަށް މިއަދު ބޭނުންވަނީ ކުރު މުއްދަތުގެ މަންފާއެއްގެ ބަދަލުގައި ޖީލުތަކަށް ދެމިގެންދާނެ މިފަދަ ބޮޑެތި ތަރައްޤީގެ މަޝްރޫޢުތައް ކަމަށް ވަޒީރު މުއްޠަލިބު ވިދާޅުވިއެވެ.