ހަމައެކަނި ވެރިން ކޮޓަރި ކޮޓަރީގަ ތިއްބަވައިގެން ނިންމަވާ ކަންކަން ކުރިޔަށް ނުގެންދެވޭނޭކަން މި ދަނީ ފެންނަމުން: ރައީސް ނަޝީދު
ދިވެހިރާއްޖޭގެ މާލީ ހާލަތު ނުރައްކާތެރި ފައްތަރަކަށް ވެއްޓިފައިވާ ކަމަށާއި، ހަމައެކަނި ވެރިން ކޮޓަރިތަކުގައި ތިއްބަވައިގެން ނިންމަވާ ކަންކަން ކުރިއަށް ނުގެންދެވޭނެކަން ސާފުވަމުންދާ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
މިއަދު ބޭއްވި ނޫސްްވެރިންގެ ބައްދަލުވުމެއްގައި ރައީސް ނަޝީދު ވިދާޅުވީ، ރާއްޖޭގެ މާލީ ހާލަތު ނާޒުކު ފައްތަރެއްގައި އޮތްއިރު ޑޮލަރުގެ އަގު 23 ރުފިޔާއަށް ވުރެ މައްޗަށް އުފުލިފައިވާ ކަމަށެވެ. އަދި ޑޮލަރުގެ އަގާ އެކު ތަކެތީގެ އަގު އިންތިހާއަށް އުފުލި، ޚާއްސަކޮށް އަތޮޅުތެރޭގައި ތަކެތީގެ އަގު ދެގުނައަށް ވުރެ ބޮޑުވެފައިވާ ކަމަށް އެމަނިކުފާނު ފާހަގަކުރެއްވިއެވެ. މިސާލެއްގެ ގޮތުން އައްޑޫ ހުޅުދޫގައި ބާސްމަތީ ހަނޑޫ ކިލޯއެއް 220 ރުފިޔާއަށް އަދި ކެއްކުމަށް ބޭނުންކުރާ ތެޔޮ ފުޅިއެއް 90 ރުފިޔާއަށް އަރާފައިވާ ކަމަށް ވިދާޅުވެ، ރައްޔިތުންނަށް އިންތިހާއަށް ދަތިތަކާ ކުރިމަތިލާން ޖެހިފައިވާ ކަމަށް ވިދާޅުވިއެވެ. މި ސަރުކާރަށް މާލީ ކަންކަން ބަލަހައްޓަން އަދި އިގްތިސޯދު ހިންގަން އެނގޭ ކަމަށް މިހާރު ގަބޫލުނުކުރެވޭ ކަމަށް ވެސް އެމަނިކުފާނު ވިދާޅުވިއެވެ.
ރައީސް ނަޝީދު ވިދާޅުވި ގޮތުގައި އެންމެ ބޮޑު އެއް ކަންބޮޑުވުމަކީ ފުށިދިއްގަރުފަޅުގައި ސަރުކާރުން ހިންގަން ރާވާފައިވާ މަޝްރޫޢާ ގުޅޭގޮތުން ރައްޔިތުންނަށް އެއްވެސް މައުލޫމާތެއް ނުލިބި، އެކަން ދެފުށް ނުފެންނަ ގޮތަށް ހިނގަމުންދިއުމެވެ. އެމްޑީޕީން އަބަދުވެސް ދެކޭ ގޮތުގައި ކަމެއް ރަނގަޅަށް ކުރެވޭނީ ގިނަ ބަޔަކާ މަޝްވަރާކޮށްގެން ކަމަށާއި، މިދިޔަ އޮކްޓޫބަރު މަހު ބޭއްވުނު އެމްޑީޕީގެ 5 ވަނަ ކޮންގްރެސްގައި ވެސް ކަންކަން ހިންގުމުގެ ކުރިން ރައްޔިތުންގެ ފެންނަ ނުފެންނަ ވޯޓެއް ނެގުމުގެ ސިޔާސަތު ފާސްކޮށްފައިވާނެ ކަމަށް ވިދާޅުވިއެވެ. އަދި ވެރިންނަށް ފެންނަ ތަސައްވުރުތަކަށް ރައްޔިތުންގެ ރުހުމާއި ތާއީދު ނެތް ނަމަ، އެފަދަ ކަންކަން ދާނީ ނާކާމިޔާބުވެގެން ކަމަށް ވެސް ފާހަގަކުރެއްވިއެވެ.
ފުށިދިއްގަރުފަޅުގައި ހިންގާ ރެޒިޑެންސީ މަޝްރޫޢާ ގުޅިގެން ރައްޔިތުންގެ ފެންނަ ނުފެންނަ ވޯޓެއް ނެގުމަށް ގޮވާލައި، އެކަމަށް އަޑުއުފުލުމުގެ ގޮތުން މި ނޮވެންބަރު މަހުގެ 26 ވަނަ ދުވަހު މަގުމައްޗަށް ނުކުމެ މުޒާހަރާކުރުމަށް އެމްޑީޕީން ނިންމާފައިވާ ކަމަށް ރައީސް ނަޝީދު ވަނީ ގޮވާލައްވާފައެވެ.
މީގެ އިތުރުން، ވޭތުވެދިޔަ ތިން އަހަރުގެ އިގްތިސޯދީ ހާލަތަށް އަލިއަޅުއްވާލައްވަމުން އެމަނިކުފާނު ވިދާޅުވީ، ރަށްރަށުގެ ފިހާރަތަކުގެ ވިކުރާ ވަރަށް ބޮޑަށް ދަށަށް ގޮސް، ޖީޑީޕީގެ ކުރިއެރުން އެއް ޕަސެންޓަށް ވެސް ނުލިބޭ ކަމަށެވެ. އަދި ނޫސްވެރިކަމުގެ މިނިވަންކަމަށް ހުރަސްއެޅުމާއި، އަބުރު ރައްކާތެރިކުރުމުގެ ނަމުގައި ކުރިއަށްގެންދާ ކަންކަމަކީ ހަގީގަތް ފޮރުވަން ކުރާ ކަންކަން ކަމަށް ސިފަކުރައްވައި، ސަރުކާރު ދަތުރުކުރަމުން ދަނީ ހަމަ މަގުން ނޫން ކަމަށް ރައީސް ނަޝީދު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް