ދައުލަތުގެ ބަޖެޓުން މީޑިއާތަކަށް މާލީ އެހީދޭނޭ އުސޫލް އާންމުކޮށްފި
މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން (އެމްއެމްބީސީ) އެކުލަވައިލި، ރާއްޖޭގައި ރަޖިސްޓަރީކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން މާލީ އެހީތެރިކަން ފޯރުކޮށްދިނުމާ ގުޅޭ އުސޫލު މިއަދު ސަރުކާރުގެ ގެޒެޓުގައި ޝާއިޢުކޮށްފިއެވެ.
މި އުސޫލުގެ ދަށުން ކޮންމެ އަހަރެއްގެ ދައުލަތުގެ ބަޖެޓުން، ހިލޭ އެހީއާއި އާމްދަނީ އިތުރުކުރުމަށް ހުށަހަޅާ އައު ކަންކަމުން ލިބޭނެ ކަމަށް ލަފާކުރާ ފައިސާއާއި ވަކި ކަމަކަށް ޚާއްޞަކޮށްފައިވާ ފައިސާ ނުހިމަނައި، ބަޖެޓުގެ އަންދާޒާކުރެވޭ އާމްދަނީގެ 0.1 އިންސައްތަ އެ އަހަރަކު ޝަރުތު ހަމަވާ މީޑިއާތަކަށް ދޫކުރެވޭނެއެވެ. 2025 ވަނަ އަހަރުން ފެށިގެން ކޮންމެ އަހަރެއްގެ ބަޖެޓުގައި މި ފައިސާ ހިމެނުމަށް އުސޫލުގައި ކަނޑައަޅައިފައިވެއެވެ.
ބްރޯޑްކާސްޓްކުރުމުގެ ޤާނޫނުގެ ދަށުން ލައިސަންސް ލިބިފައިވާ ނުވަތަ މީޑިއާ ރެގިއުލޭޝަންގެ ޤާނޫނުގެ ދަށުން ދަފުތަރުކޮށްފައިވާ އަމިއްލަ މީޑިއާތަކަށް މި އެހީއަށް ކުރިމަތިލެވޭ އިރު، ދަފުތަރުވި ތާރީޚުން ފެށިގެން މެދުނުކެނޑި އެއް އަހަރު ޚިދުމަތް ދީފައި ވާންޖެހެއެވެ. ޓެކްސް ކްލިއަރެންސް ރިޕޯޓާއި ޕެންޝަން ކޮމްޕްލައިންޓް ސެޓުފިކެޓު ހުށަހެޅުމާއި، މުވައްޒަފުންގެ މުސާރަ ބެންކު މެދުވެރިކޮށް ޖަމާކުރާ ކަމުގެ ހެކި ހުށަހެޅުމާއި، މީޑިއާ ކޯޑް އޮފް އެތިކްސް އާންމުކޮށްފައި ވުމަކީ ވެސް ޝަރުތެކެވެ.
އެއް ކުންފުންޏަކުން ނުވަތަ މެޖޯރިޓީ ހިއްސާ އެއް ބައެއްގެ އަތުގައި އޮންނަ ކުންފުނިތަކުން ބައިވެރި ގިނަ މީޑިއާ ހިންގި ނަމަވެސް، ގްރާންޓަށް ހުށަހެޅޭނީ އެންމެ މީޑިއާއަކަށެވެ. ކޮންމެ މީޑިއާއަކަށް ވެސް ހުށަހެޅެނީ އެންމެ އެޕްލިކޭޝަނެއް ކަމަށާއި، ގިނަވެގެން ދެ މީޑިއަމް އިޚުތިޔާރުކުރެވޭ އިރު އެއް ވައްތަރެއްގެ ދެ މީޑިއަމް ހިމެނުން އުސޫލު ހުއްދައެއް ނުކުރެއެވެ.
އެހީ ލިބޭ މީޑިއާ ކަނޑައެޅުމުގައި މާކުސް ދެނީ މީޑިއާ ހިންގި މުއްދަތާއި، މުވައްޒަފުންގެ ޢަދަދާއި ތަޢުލީމާއި ތަޖުރިބާއާއި، ބިޒްނަސް ޕްލޭނާއި، ކޮންޓެންޓުގެ ބާވަތަށް ބެލުމަށް ފަހުގައެވެ. އެޕްލިކޭޝަން ހުށަހެޅުމާ އެކު ވަގުތީ މާކުސް ޕޯޓަލުން ފެންނަ ގޮތް ހަދައި، ލިޔެކިޔުންތައް ވެރިފައި ކުރުމަށް ފަހު ރަސްމީ ބަންދު ނޫން 10 ދުވަހުގެ ތެރޭގައި ދާއިމީ މާކުސް އާންމުކުރުމަށް އުސޫލުގައި ލާޒިމުކޮށްފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް