ވެހިކަލް ފީ މާލެ ސިޓީ ކައުންސިލް ބަޖެޓުން އުނިކޮށް ސަރުކާރަށް ލިބޭގޮތް ހަދައިދޭން އެދިއްޖެ
އެއްގަމު އުޅަނދުތަކުގެ އަހަރީ ފީގެ ގޮތުގައި މާލޭ ސިޓީ ކައުންސިލަށް ލިބޭ ފައިސާ އެ ކައުންސިލުގެ ބަޖެޓުން އުނިކޮށް ސަރުކާރަށް ލިބޭނެ އިންތިޒާމެއް ހަމަޖެއްސެވުމަށް ހައުސިން ވުޒާރާގެ ވަޒީރު ޑރ. ޢަބްދުالله މުއްޠަލިބު އެދިވަޑައިގެންފިއެވެ.
ވަޒީރު މިހެން ވިދާޅުވީ، މަޖިލީހުގެ މިއަދުގެ ޖަލްސާގައި މައްޗަންގޮޅި ދާއިރާގެ ޕީއެންސީ މެންބަރު އަދި މާލެ ސިޓީ ކައުންސިލްގެ ކުރީގެ މެންބަރު އަޙްމަދު ޒަމީރު ކުރެއްވި ސުވާލަކަށް ޖަވާބު ދެއްވަމުންނެވެ.
އެގޮތުންވަޒީރު ވިދާޅުވީ މާލެއާއި ހުޅުމާލެ ހިމެނޭ ގޮތަށް، އެ ސަރަހައްދުގައި ދުއްވާ ހުރިހާ އުޅަނދެއްގެ އަހަރީ ފީ ލިބެނީ މާލެ ސިޓީ ކައުންސިލަށް ކަމަށެވެ. އެގޮތުން ވެހިކަލް ފީގެ ގޮތުގައި ސިޓީ ކައުންސިލަށް ބޮޑު އާމްދަނީއެއް ލިބޭ ކަމަށާ އެހެން ނަމަވެސް މަގުތައް މަރާމާތު ކުރުމަށް ކައުންސިލުން އެކަށީގެންވާ މަސައްކަތެއް ނުކުރާ ކަމަށް ވަޒީރު ވިދާޅުވިއެވެ.
”ގާތްގަނޑަކަށް 150 އެއްހާ މިލިއަން ރުފިޔާ އަހަރަކު އެބަ ލިބޭ. އެބޭފުޅުންގެ މައްޗަށް މަތިވެފައި އޮތް ކަމެއް މަގުތައް ހެދުމާ މިފަދަ ކަންކަން. އަޅުގަނޑުމެންނަށް އެންމެ ކުޑަމިނުން، ސަރުކާރުން ތާރު އަޅާފައި ހުންނަ މަގެއް ކަނޑާލަން ހުއްދަދީ ކަނޑާލާފައި، އެތަން ހަލާލުކޮށްލާފައި ދާއިރުގައި، އެތަން ރަނގަޅު ކުރުމުގެ ކެޕޭސިޓީއެއްވެސް. އަޅުގަނޑުމެން ސްޓޭންޑަޑެއް ހަދާފައި ފޮނުވައިފިން ކަނޑާފި ކަމަށް ވަންޏާ ކަނޑަންވާނީ މިހެންނޭ. އެތަންތަން މަރާމާތު ކުރަންވާނީ މިގޮތަށޭ.“ ވަޒީރު ވިދާޅުވިއެވެ.
"150 މިލިއަން ރުފިޔާއަށް މަގު މަރަމާތުކުރުމަށް ތާރު ކައްކާފައި އެޅޭނެވަރުގެ ކެޕޭސިޓީއެއް ބިލްޑްނުކުރުމަކީ އަޅުގަނޑަށް ހީވަނީ ކައުންސިލްގެ ޒިންމާ އަދާ ނުކުރުމުގެ ގޮތުން ކުރާ ކަމެއްހެން. އެ ފައިސާ ދަނީ ކޮންތާކަށްތޯ ބަލަން އެބަޖެހޭ"
ވަޒީރު މުއްޠަލިބު
ވަޒީރު ވިދާޅުވީ، މަގުތައް ހެދުމަށްފަހު މަރާމާތުގެ މަސައްކަތްވެސް ކުރަންޖެހެނީ އެ ވުޒާރާއަށް ކަމަށާ، އެހެންނަމަވެސް އެ ވުޒާރާއަކީ މަގު މަރާމާތު ކުރަން ހަމަޖެހިފައި އޮތް ތަނެއް ނޫން ކަމަށާއި އެއީ ޕްރިޖެކްޓް ހިންގަން އޮންނަ ވުޒާރާއެއް ކަމަށެވެ. އަދި މަގުތައް ހަލާކުވެގެން ރައްޔިތުންނަށް ދަތިވާ ހިސާބަށް ދިޔައިމާ ޕްރޮޖެކްޓެއް ހަދައިގެން އެ މައްސަލަ ޙައްލުކުރުމުގެ ބުރަ ޖެހެނީ ވުޒާރާއިން އުފުލަން ކަމަށްވެސް ވިދާޅުވިއެވެ.
"އެހެންވީމަ ސިޓީ ކައުންސިލަށް އެ 150 މިލިއަން ރުފިޔާ ލިބެން ޖެހޭނެ ކަމަށް އަޅުގަނޑު ގަބޫލެއްނުކުރަން. އަޅުގަނޑު އެދެނީ (ތިބޭފުޅުން) އެ ބައި [ކައުންސިލް ބަޖެޓުން] އުނިކޮށްފައި ސަރުކާރުގެ ބަޖެޓަށް ލިބޭނެ ގޮތެއް ހައްދަވައިދެއްވުން. އޭރުން އަޅުގަނޑުމެންނަށް މަގުގެ މަޝްރޫޢު ކުރިއަށް ގެންދެވޭނީ."
ވަޒީރު މުއްޠަލިބު
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
