އިންޑިއާގެ ތާރީޚީ މިސްކިތެއްގެ އެއްބައި ތަޅާލަން ސަރުކާރުން ނިންމުމާ ގުޅިގެން މުސްލިމުން އިހުތިޖާޖު ކުރަނީ

އިންޑިއާގެ މަދްޔަ ޕްރަދޭޝްގެ އުއްޖައިންގައި ހުންނަ ތާރީޚީ "ޝާހީ މަސްޖިދު" ގެ ބައެއް މަގު ފުޅާކުރުމުގެ މަޝްރޫއަކަށް ތަޅާލަން ސަރުކާރުން ނިންމުމާ ގުޅިގެން، އެ މިސްކިތް ހިމާޔަތްކުރުމަށް އެ ސަރަހައްދުގެ ގިނަ އަދަދެއްގެ މުސްލިމުން އެއްވެ ރޭގަނޑު އެތަނުގައި ހޭދަކޮށް އިހުތިޖާޖު ކުރަން ފަށައިފިއެވެ.

މި ހަރަކާތް ހިނގަމުންދަނީ 2028 ވަނަ އަހަރު ބޭއްވުމަށް ހަމަޖެހިފައިވާ ހިންދޫ ދީނުގެ ދީނީ ހަރަކާތެއް ކަމަށްވާ "ސިމްހަސްތާ" ފެސްޓިވަލަށް މަގުތައް 15 މީޓަރަށް ފުޅާކުރުމަށް އުއްޖައިން މުނިސިޕަލް ކޯޕަރޭޝަނުން ކުރިއަށްގެންދާ މަސައްކަތުގެ ދަށުންނެވެ. މިސްކިތް ތަޅާލުން ހުއްޓުވުމަށް އެތައް ބަޔަކު މިސްކިތު ތެރޭގައި ތިބިއިރު، އެ ސަރަހައްދުގައި ފުލުހުންގެ ގިނަ ފައުޖުތަކެއް ވަނީ ހަރަކާތްތެރިވާން ފަށާފައެވެ.

އުއްޖައިންގެ ސުޕްރިންޓެންޑެންޓް އޮފް ޕޮލިސް ޕްރަދީޕް ޝަރުމާ ބުނީ، ސުލްހަވެރިކަން ދެމެހެއްޓުމަށް ފިޔަވަޅުތައް އަޅަމުންދާ ކަމަށާއި މިސްކިތް ކޮމިޓީއާ ވާހަކަދައްކައިގެން މި މައްސަލަ ހައްލުކުރުމަށް މަސައްކަތް ކުރަމުންދާ ކަމަށެވެ. އަދި މިވަގުތަށް މިސްކިތް ތަޅާލުމުގެ އަމަލީ މަސައްކަތް މަޑުޖައްސާލާފައިވާ ކަމަށްވެސް އޭނާ ބުންޏެވެ.

މިސްކިތުގެ އިމާމު މުޙައްމަދު އިބްރާހީމް ވިދާޅުވީ، 1390 ވަނަ އަހަރު ބިނާކޮށްފައިވާ މި މިސްކިތަކީ 636 އަހަރު ވެފައިވާ ތާރީޚީ ތަނެއް ކަމަށާއި، ދީނީ އެއްވެސް ބިނާއެއް ތަޅާނުލައި މަގު ފުޅާކުރުމުގެ މަސައްކަތް ކުރިއަށް ގެންދަންޖެހޭނެ ކަމަށެވެ. މުސްލިމް ރެޕްރެޒެންޓޭޓިވް ކޮމިޓީގެ މެންބަރު މުޙައްމަދު ޒާކިރު ވިދާޅުވީ ކޮންމެ އަގެއް ދައްކަން ޖެހުނަސް މިސްކިތް ދޫކޮށްނުލާނެ ކަމަށާއި ސަރުކާރުން މިސްކިތް ސަލާމަތްކޮށްދިނުމަށް އެދޭ ކަމަށެވެ.

މި މައްސަލައާ ގުޅިގެން މަޖިލިސް މެންބަރު އަދި އޭއައިއެމްއައިއެމްގެ ވެރިޔާ އަސަދުއްދީން އޮވައިސީ ވިދާޅުވީ، ވަގުފް ގާނޫނަށް ސަރުކާރުން ގެންނަން އުޅޭ އިސްލާހުތަކުގެ އަސްލު ބޭނުމަކީ މުސްލިމުންގެ މިސްކިތްތަކާއި ދީނީ ބިންތައް އަތުލުންކަން މިފަދަ އަމަލުތަކުން ހާމަވާ ކަމަށެވެ.

މީގެ ކުރިން މަދްޔަ ޕްރަދޭޝްގެ ހައިކޯޓުން ވަނީ މިސްކިތުގެ ބައެއް ތަޅާލުމާ ދެކޮޅަށް ހުށަހެޅި ޕެޓިޝަންތައް ބޭރުކޮށްލާފައެވެ. ނަމަވެސް މިސްކިތް ކޮމިޓީން މިހާރު ވަނީ މި މައްސަލަ ހައިކޯޓުގެ ޑަބަލް ބެންޗަކަށް ހުށަހަޅާފައެވެ. މި މައްސަލައިގެ އަޑުއެހުން ހޯމަ ދުވަހު ބޭއްވުމަށް ހަމަޖެހިފައިވާއިރު، އެދެވޭ ހައްލެއް ނުލިބިއްޖެނަމަ ސުޕްރީމް ކޯޓަށް ދާނެ ކަމަށް މުސްލިމް ޖަމާއަތްތަކުން ބުނެއެވެ.