އުމަރުގެ 10000 ޑޮލަރު އުމަރަށް؟

1988ވަނަ އަހަރުގެ ނޮވެމްބަރު މަހުގެ ތިންވަނަ ދުވަހު ދިން ނުރައްކާތެރި އުުދުވާނީ ހަމަލާގެ މޭސްތިރިއެއްގެ ގޮތުގައި އޭރު ހިންގި ޝަރީއަތާއި ތަހުގީގަށް ސާބިތުވެފައިވަނީ ހ.ހާޖަރާގޭ އަބްދުﷲ ލުތުފީއެވެ. މި މައްސަލައިގައި ލުތުފީގެ މައްޗަށް އިއްވި މަރުގެ ހުކުމް އޭރުގެ ރައީސުލްޖުމްހޫރިއްޔާ އަލްއުސްތާޛު މައުމޫން އަބްދުލްގައްޔޫމް، އުމުރު ދުވަހުގެ ޖަލުހުކުމަކަށް ބަދަލުކުރެއްވިއެވެ.

އެ ހުކުމް ތަންފީޒުކުރަމުން ދަނިކޮށް، ކުރީގެ ރައީސް މުހައްމަދު ނަޝީދުގެ ސަރުކާރުގައި ބޭސްފަރުވާ ކުރުމުގެ ހުއްދައަކާއި އެކު ލުތުފީ ރާއްޖެއިން ބޭރަށް ފުރިއެވެ. އެކަން ހިނގިތާ މާގިނަ މުއްދަތެއް ނުވެ އެ ސަރުކާރު ބަދަލުވެގެންދިޔައެވެ. އެއާއި އެކު ދައުލަތުގެ ލޯމަތިން ލުތުފީ ގެއްލުނުކަން ހާމަވެ، އޭނާ ހޯދުމުގެ މަސައްކަތް ފެށުނެވެ.

އެ މަސައްކަތުގެ ތެރެއިން ކަމާއިބެހޭ ފަރާތްތަކަށް އެނގުނުހާވެސް މައުލޫމާތަކީ ލުތުފީ މިހާރު އުޅެމުންދަނީ ސްރީލަންކާގައި ކަމަށާއި، އޭނާ އުޅެނީ ނަން ބަދަލުކޮށްގެން ކަމަށެވެ. ލުތުފީ ހޯދުމަށް ގިނަ މަސައްކަތްތަކެއް ކުރިކަމަށް ކޮންމެ ސަރުކާރަކުންވެސް ބުންޏެވެ.

ހޯމް މިނިސްޓަރެއްގެ ހައިސިއްޔަތުން ލުތުފީ ހޯދުމަށް އެންމެ ބުރަ މަސައްކަތެއް ކުރެއްވި އެއް ބޭފުޅަކަށް ވާނީ ކުރީގެ ހޯމް މިނިސްޓަރ އުމަރު ނަސީރެވެ. އެގޮތުން 2014 ވަނައަހަރު ނަސްރުގެ ދުވަހުގެ މުނާސަބަރުގައި ތ. ދިޔަމިގިލީގައި ބޭއްވި ޖަލްސާ ޝަރަފުވެރިކޮށްދެއްވާ ވާހަކަފުޅު ދައްކަވަމުން އުމަރު ވަނީ ލުތުފީގެ މައުލޫމާތެއް ފޯރުކޮށްދޭ ފަރާތަކަށް 10000 ޑޮލަރު ދޭނެކަމަށް ބުނެފައެވެ.

މިފަހަރު ލުުތުފީ ހުރިތަނެއްގެ މުޖައްރިބު މައުލޫމާތު ސޯޝަލް މީޑިޔާގައި ވަނީ ތިލަކޮށްލާފައެވެ. ލުތުފީ ހުރީ ކޮޅުނބުގައި ހުންނަ ރާއްޖޭގެ އެމްބަސީގައިކަމަށް ސޯޝަލް މީޑިޔާގައި މައުލޫމާތު ދައުރުވުމާއި އެކު، ފުލުހުންވެސް އެކަމަށް އެއްބަސްވިއެވެ. އެ މައުލޫމާތު ފުރަތަމަ ފެތުރުއްވީވެސް ކުރީގެ ހޯމް މިނިސްޓަރ އުމަރު ނަސީރެވެ.

ކުރީގެ ހޯމް މިނިސްޓަރު އުމަރު ނަސީރު ޗެނަލް13 ގެ ޕްރޮގްރާމްގައި ވާހަކަ ދައްކަމުން ވިދާޅުވެފައިވަނީ ވަރަށް ގިނަ ފަރާތްތަކުން ވެސް 10،000 ރުފިޔާގެ ވާހަކަ އޭނާ ގާތު ދައްކަމުން އަންކަމަށެވެ.

އެހެންކަމުން ދައުލަތުން ދޭން ބުނި 10،000 ޑޮލަރު އުމަރަށް ފޯރުކޮށްދޭނެބާވައެވެ؟