އިންޑިއާ އާއި އެފްރިކާގެ 5 ގައުމަކުން ވިޔަފާރީގެ މަޝްވަރާތައް ފަށަނީ

އިންޑިއާއާއި ދެކުނު އެފްރިކާގެ 5 ގައުމެއްގެ މައްޗަށް އެކުލެވޭ ސަދަން އެފްރިކަން ކަސްޓަމްސް ޔޫނިއަންއާ ދެމެދު ވިޔަފާރީގެ ޚާއްޞަ އެއްބަސްވުމެއް ގާއިމުކުރުމުގެ މަޝްވަރާތައް ރަސްމީކޮށް ފެށުމަށްޓަކައި ޓާމްސް އޮފް ރެފަރެންސް ގައި ސޮއިކޮށްފިއެވެ.

ނިމުނު ހަފްތާގައި ސޮއިކުރެވުނު މި ފްރޭމްވޯކް އެއްބަސްވުމާއެކު، އިންޑިއާއާއި ދެކުނު އެފްރިކާ، ބޮޓްސްވާނާ، ނެމީބިއާ، ލެސޯތޯ އަދި އެސްވަތީނީއާ ދެމެދު 2002 އިން 2010 އަށް ކުރެވި، މެދުކެނޑިފައިވާ ވިޔަފާރީގެ މަޝްވަރާތައް އަލުން ވަނީ ފެށިފައެވެ.

އިންޑިއާގެ ވިޔަފާރިއާއި ސިނާޢަތްތަކާ ބެހޭ ވަޒީރު ޕިޔޫޝް ގޯޔަލް ވިދާޅުވީ، ކުރިއަށް އޮތް އެއް މަސްދުވަހުގެ ތެރޭގައި ރަސްމީ މަޝްވަރާތައް ފެށި، އެއް އަހަރު ދުވަހުގެ ތެރޭގައި އެއްބަސްވުން ނިންމާލުމަށް އަމާޒުހިފާފައިވާ ކަމަށެވެ.

މި އެއްބަސްވުމުގެ މައިގަނޑު ބޭނުމަކީ އިންޑިއާއިން ބޭރުކުރާ މުދަލުގެ ތެރެއިން ޚާއްޞަކޮށް އުޅަނދުފަހަރާއި ބޭހުގެ ބާވަތްތަކާއި، އިންޑަސްޓްރިއަލް މެޝިނަރީ ފަދަ ތަކެތިން ނަގާ ކަސްޓަމްސް ޑިއުޓީ ކުޑަކުރުމެވެ. މީގެ އިތުރުން، އެފްރިކާގެ ގައުމުތަކުން އިންޑިއާއަށް ބޭނުންވާ މުހިންމު މިނަރަލްތައް ފަސޭހައިން ލިބޭނެ މަގު ތަނަވަސްވެގެންދާނެއެވެ.

މިއީ އެފްރިކާގެ ސަރަހައްދީ ބްލޮކަކާއެކު އިންޑިއާއިން އެކުލަވާލާ މިފަދަ ވިޔަފާރީގެ އެންމެ ބޮޑު އެއްބަސްވުމެވެ.