ރަށު ޕިކަޕުން ސަރުކާރަށް ނަގާ ފީ އަންނަ މަހުން ފެށިގެން އުވާލާނަން: ރައީސް މުޢިއްޒު

ރަށް ރަށުގައި ދުއްވާ ރަށު ޕިކަޕް ނުވަތަ ބަގީތަކުން ސަރުކާރުން ނަގާ ފީ ކުޑަކޮށްދެއްވާނެ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު ރ އަތޮޅަށް ކުރައްވަމުންދާ ދަތުރުފުޅުގެ ތެރެއިން އެ އަތޮޅު ދުވާފަރަށް ވަޑައިގެން އެ ރަށު ރައްޔިތުންނާ ބައްދަލު ކުރައްވަން ބޭއްވި ޖަލްސާގައި ވާހަކަ ދައްކަވަމުން ވިދާޅުވީ، ރަށު ޕިކަޕު ތަކުން، ސަރުކާރަށް ނަގާ ފީ ބޮޑު ކަމުގެ ޝަކުވާ ވަރަށް ގިނަ ރަށް ރަށުގެ ރައްޔިތުން ކުރާ ކަމަށެވެ.

ވަރަށް ގިނަ ރަށްރަށުން އަންނަ ރިކުއެސްޓެއް މިއީ، ވަރަށް ގިނަ ކައުންސިލް ތަކުންވެސް، ރަށު ޕިކަޕޭ މިކިޔާ ބެޓަރީ އޮޕަރޭޓެޑް ބަގީސްތައް، އޭގެން އެބަ ނަގާ ސަރުކާރުން 1،800 ރުފިޔާ ފީއެއްގެ ގޮތުގައި. އެއީ ރައްޔިތުންނަށް ވަރަށް ބޮޑު ފަސޭހައެއްވާ، އެންވަޔަރަމެންޓް ފްރެންޑްލީ ވެހިކަލްއެއް. އަޅުގަނޑުމެން މި ބަލަނީ އަޅުގަނޑުމެންގެ މުޖުތަމަޢު އަކީ ފެހިކަން ގަދަ، އެންވަޔަރަމެންޓް ފްރެންޑްލީ މުޖުތަމަޢު އަކަށް ހަދަން. އިރާދަކުރެއްވިޔާ މި އަންނަ މަހުން ފެށިގެން ރަށު ޕިކަޕުން މި ނަގާ ފީ އެއްކޮށް އުވާލާނަން.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސުލްޖުމްހޫރިއްޔާ ވިދާޅުވީ، އެ 1800 ރުފިޔާ އުވާލުމުން، އިންޖީނު ބޭނުންކޮށްގެން ދުއްވާ އުޅަނދުފަހަރުގެ ބަދަލުގައި، ބެޓަރީ ގައި ދުއްވާ، ތިމާވެއްޓާއި ރަހުމަތްތެރި އުޅަނދުތައް މީހުން ޚިޔާރު ކުރާ މިންވަރުވެސް އިތުރު ވާނެ ކަމަށެވެ.

މީގެ އިތުރުން ރައީސް މުޢިއްޒު ވިދާޅުވީ އެމަނިކުފާނު އެދެނީ ރައްޔިތުންނާއި ވޭހާވެސް ގާތުން މަސައްކަތް ކުރައްވައި ރައްޔިތުންގެ ކަންބޮޑުވުންތައް ގާތުން އައްސަވަން ކަމަށެވެ.

އެގޮތުން، ވެރިކަގެ މިވީ 100 ދުވަހުގެ ތެރޭގައި 103 ކައުންސިލަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި ބައްދަލުކުރެވި، ރައްޔިތުންގެ ހުރި ކަންބޮޑުވުންތައް އަޑު އެއްސެވިފައިވާއިރު، އެތަނުން ބައެއް ކަންބޮޑުވުންތައް ހައްލު ކުރުމުގެ މަސައްކަތް މިހާރު ފެށިފައިވާ ކަންވެސް ފާހަގަކުރެއްވިއެވެ. އަދި އެމަނިކުފާނު އެންމެ ބޮޑަށް މަސައްކަތް ކުރައްވާނީ ނަތީޖާ ނެރެދެއްވަން ކަމަށާ އެކަން ކުރުމުގެ މަސައްކަތް ކުރައްވަމުންދާ ކަމަަށް ރައީސް ވިދާޅުވި އެވެ.