ޝަކުވާ ބޮޑުވުމުން ސިޓީ ކައުންސިލުން، ކާނިވާ ސްޓޭޖް ފުރާޅުން ޓިނުތައް ނަގަން ފަށައިފި

ރައްޔިތުންގެ ޝަކުވާ ބޮޑުވުމުން މާލެސިޓީ ކައުންސިލުން، އެންމެފަހުން ކާނިވާ ސްޓޭޖް ފުރާޅުން ޓިނުތައް ނެގުމުގެ މަސައްކަތް ފަށައިފިއެވެ.

މިދިޔަ ހަފްތާގައި މާލެއަށް ގަދަ ވަޔާއެކު ކުރި ވިއްސާރާގައި ކާނިވާ ސްޓޭޖްގެ ފުރާޅުގެ ބައެއް ޓިނުތައް ވަނީ ވަޔާ އެއްލާލާފައެވެ. ޖެހުނު ގަދަވަޔާއެކު ޓިނުތައް އެއްލާލުމުގެ ސަބަބުން ޓިނުތަކުގައި ޖެހި ބައެއް އުޅަނދުތަކަށް ވަނީ ގެއްލުން ލިބިފައެވެ.

ބޭނުންނުކޮށް ހުންނަ ކާނިވާ ސްޓޭޖް ވަރަށްބޮޑަށް ވީރާނާވެފައިވާއިރު، އެތަނުގެ ފުރާޅު ކޮންމެފަދަ ވަގުތެއްގައިވެސް އެއްލާލަފާނެކަމުގެ ބިރު އޮންނަކަމަށް މީސް މީޑިއާގައި ބައެއް ފަރާތްތަކުން ޝަކުވާ ކުރަމުން އަންނަތާ ދުވަސްކޮޅެއް ވެއްޖެއެވެ.

ކާނިވާ ސްޓޭޖް ފުރާޅާ ގުޅިގެން ރައްޔިތުންގެ ޝަކުވާ ބޮޑުވުމާ ގުޅިގެން، އެތަނުގެ ފުރާޅުތައް ނެގުމުގެ މަސައްކަތް އޮތީ ކިހިނެތްތޯ ބެލުމަށް ވޮއިސްއިން މާލެސިޓީ ކައުންސިލަށް ފޮނުވި އެއްވެސް މެސެޖަކަށް ޖަވާބުދާރީވެފައެއް ނުވެއެވެ.

އެހެން އޮއްވައި މާލެސިޓީ ކައުންސިލުން މިއަދު އެކްސްގައި ހިއްސާކުރި ފޮޓޯތަކަކާއެކު ވަނީ، ރައްޔިތުންނަށް ދިމާވެދާނެ ނުރައްކަލަކުން ސަލާމަތްކުރުމަށްޓަކައި ކާނިވާ ސްޓޭޖްގެ ފުރާޅުން ހަލާކުވެފައިވާ ބައިތައް ނަގާ އެތަން ސާފުކުރުމުގެ މަސައްކަތް ކުރިއަށްދާކަމަށް ބުނެފައެވެ.

ކަނިވާ ސްޓޭޖް ތަޅާލައި އެތަނުގައި އައު ސްޓޭޖެއް އެޅުމުގެ މަސައްކަތް ކުރުމަށް ނިންމައި މާލެ ސިޓީ ކައުންސިލުން ވަނީ މިދިޔަ އަހަރުގެ ޑިސެމްބަރުމަހު އެކަން ކުރާނޭ ބަޔަކު ހޯދުމަށް އިއުލާނުކޮށްފައެވެ. ސިޓީ ކައުންސިލުން މިއަހަރުގެ މާޗްމަހު ވަނީ ސްޓޭޖު ތަޅާލައި އެތަނުގައި އާ ސްޓޭޖެއް އެޅުމަށް4.8 މިލިއަން ރުފިޔާގެ އަގަކަށް ޔޫއެޗް އިންވެސްޓްމަންޓާ ހަވާލުކޮށްފައެވެ.

މި މަސައްކަތް އެކުންފުނިން ނިންމަންޖެހެނީ 140 ދުވަހުގެ ތެރޭގައެވެ.

ކާނިވާ ސްޓޭޖް ނިންމަންދިން މުއްދަތު ހަމަވެގެންދިޔަ ނަމަވެސް އަދި އެތަން ތަޅާލުމުގެ މަސައްކަތް ފަށާފައިނުވެއެވެ. އެކަން އެހެން އޮއްވައި ސްޓޭޖް ފުރާޅުން ޓިނުތައް ނެގުމުގެ މަސައްކަތްވެސް ފަށާފައިވަނީ މާލެސިޓީ ކައުންސިލްގެ މުއައްޒަފުންނެވެ.

މިކަމާ ގުޅޭގޮތުން މާލެސިޓީ ކައުންސިލުގެ ބަހެއް އަދި ވަނީ ލިބޭގޮތް ނުވެފައެވެ.