ކުރީ ސަރުކާރު ނިމިގެން ދިޔައީ ސިއްހީ ނިޒާމު ފުނޑުފުނޑުކޮށްލާފައި: ފަލާހް

ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރު ނިމިގެން ދިޔައިރު ދިޔައީ ރާއްޖޭގެ ސިއްހީ ނިޒާމު ފުނޑުފުނޑުކޮށްލާފައިކަމަށް އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.

ފަލާހް މިފަދައިން ވިދާޅުވީ، މިއަދު ކުރިއަށް ދިޔަ ރައްޔިތުންގެ މަޖިލީހުގެ ޖަލްސާގައި ސަރުކާރުގެ ފަރާތުން ހެންވޭރު ދެކުނު ދާއިރާގެ މެންބަރު ހުސައިން އިމްރާން ލަތީފްް ސިއްޚީ ޚިދުމަތް ދިނުމުގެ ޤާނޫނު އިސްލާހު ގެނައުމުގެ ބިލަށް ބަހުސް ކުރައްވަމުންނެވެ.

މިގޮތުން ފަލާހް ވިދާޅުވީ، މި ބިލުގައި ހިމެނެނީ ވަރަށް މުހިންމު އިސްލާހުތަކެއް ކަމަށެވެ. އަދި ކުރީ ސަރުކާރުން ރާއްޖޭގެ ސިއްޚީ ދާއިރާ ފުނޑުފުނޑުކޮށްލައި ސިއްހީ ހިދުމަތްދޭ ތަންތަނުގެ އިތުރުން އެ ދާއިރާގެ މުވައްޒަފުން ނިކަމެތިކޮށްލިކަމަށް ވިދާޅުވެ ފަލާހް ވަނީ ކަންބޮޑުވުން ފާޅުކުރައްވާފައެވެ.

"ވޭތުވެ ދިޔަ ސަރުކާރު ނިމިގެން ދިޔައީ އަޅުގަނޑުމެންގެ މި ސިއްޚީ ނިޒާމު ވެސް ފުނޑުފުނޑުކޮށްލާފައޭ، ރާއްޖޭގެ ސިއްޚީ މަރުކަޒުތަކާއި ހޮސްޕިޓަލްތައް އެނޫން ވެސް ސިއްޚީ ޚިދުމަތްދޭ ހުރިހާ އިމާރާތްތަކާއި އެ އިމާރާތްތަކުގައި މަސައްކަތްކުރާ މުވައްޒަފުންނަށް ދަންދެން އެވަނީ ވަރަށް ނިކަމެތި ހާލުގައި ޖެހިފައި."

ފަލާހް ވިދާޅުވިއެވެ.

ފަލާހް ވިދާޅުވީ، އެންސްޕާ އާސަންދައަށް ބަލާލިކަމުގައިވިިޔަސް ސިއްޚީ ހާލަތު ވަޒަން ކުރެވޭކަމަށާއި، ބިލަށް އިސްލާހު ގެނައުމަށް ރައީސް ޑރ.މުޢިއްޒު ނިންމެވީ އެހެން މެދުވެރިވާން ޖެހުނު ސަބަބުތައް ދެނެގަނެ އެކަމަށް ރިއާޔަތްކުރެއްވުމަށްފަހު ކަމަށެވެ.

މީގެ އިތުރުންވެސް ފަލާހް ވަނީ މި ސަރުކާރުން ރައްޔިތުންގެ ދުޅަހެޔޮ ސިއްހަތަށްޓަކައި، ސިއްޚީ ނިޒާމުގެ ފެންވަރު ރަނގަޅު ކުރުމަށް ކުރަމުންދާ މަސައްކަތް ރައްޔިތުން ބަލައިގެންފައިވާ ކަމަށް ވިދާޅުވެފައެވެ.