ކަސްޓަމްސްގެ ބެލުމުގެ ދަށުގަ ހުރި އެއްމިލިއަނަށްވުރެ ގިނަ ސިނގިރޭޓް ނައްތާލައިފި

ގާނޫނާއި ޚިލާފަށް އެތެރެކުރަން އުޅުމުގެ ތެރޭގައި ކަސްޓަމްސްއިން އަތުލައިގަނެފައިވާ ގިނަ އަދަދެއްގެ ސިނގިރޭޓް ނައްތާލައިފިއެވެ.

މި ސިނގިރޭޓުތައް ނައްތާލާފައިވަނީ މިދިޔަ ބްރާސްފަތި ދުވަހު ކ. ދޫނިދޫގައެވެ. މިކަމާ ގުޅޭގޮތުން މޯލްޑިވްސް ކަސްޓަމްސް ސާވިސްއިން ބުނެފައިވަނީ، ނައްތާލެވިފައިވަނީ 1،359،180 (އެއް މިލިއަން ތިން ސަތޭކަ ފަންސާސް ނުވަ ހާސް އެއްސަތޭކަ އަށްޑިހަ) ސިނގިރޭޓު ސްޓިކް ކަމަށެވެ.

ކަސްޓަމްސް އިން ބުނީ މި ތަކެއްޗަކީ ގާނޫނު ނަންބަރު 2010/15 (ދުންފަތް ކޮންޓްރޯލް ކުރުމާ ބެހޭ ގާނޫނު)ގެ ތިންވަނަ ބާބު (ދުންފަތުގެ ބާވަތްތައް ޕެކެޓުކޮށް ބަންދުކުރުމާއި ލޭބަލްޖެހުން)، 8 ވަނަ ބާބު (ހުއްދަ ދޫކުރުން) އާއި ޚިލާފަށް ރާއްޖެއަށް އެތެރެކުރަށް އުޅުމުގެ ތެރޭގައި ހިފެހެއްޓި ތަކެތި ކަމަށެވެ. އެހެންކަމުން ކަސްޓަމްސްގެ އާންމު ގަވާއިދުގެ 422 ވަނަ މާއްދާގެ ދަށުން ކަސްޓަމްސް ކޮންޓްރޯލްގެ ބެލުމުގެ ދަށުގައި ނުގެންގޮސް ހުންނަ ތަކެއްޗާއި ރާއްޖެއަށް އެތެރެކުރަން އުޅެނިކޮށް ހިފެހެއްޓޭ މަނާތަކެތި ނައްތާލުމުގައި ކަސްޓަމްސްއިން އަމަލުކުރާ އުސޫލުގެ ދަށުން އެތަކެތި މިހާރު ވަނީ ނައްތާލާފައިކަމަށްވެސް އެ އިދާރާއިން ބުންޏެވެ.

ދުންފަތް ކޮންޓްރޯލްކުރުމުގެ ޤާނޫނުގެ ދަށުން ދުންފަތުގެ ބާވަތެއް އުފައްދަން ބޭނުންކުރާ އާލާތެއް އެތެރެކޮށްފިނަމަ އެއެއްޗެއް ހިފަހައްޓައި ނައްތާލުމަށް ސިއްހީ ވުޒާރާއިން ވަނީ ކަސްޓަމްސްއަށް އަންގާފައެވެ. ސިއްހީ ވުޒާރާއިން ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާއަށް މީގެކުރިން ފޮނުވާފައިވާ ސިޓީއެއްގައި ބުނެފައިވަނީ، ދުންފަތުގެ ބާވަތެއް އުފެއްދުމަކީ މަނާކަމެއްކަމުގައިވާތީވެ، ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ އެއްޗެއް ނުވަތަ އެއްވެސް އާލާތެއް އެއްވެސް ފަރާތަކުން އެތެރެކޮށްފިނަމަ، އެތަކެތި ހިފަހައްޓައި ނައްތާލުމަށް ދަންނަވާކަމަށެވެ.