ބީއެމްއެލް އިން ހުރިހާ ޚަރަދެއްކުރާ ސްކޮލާޝިޕަށް ތިން ދަރިވަރަކު ހޮވައިފި

ބޭންކް އޮފް މޯލްޑިވްސް (ބީއެމްއެލް) ގެ ސްކޮލަރޝިޕު ފަންޑު 2025 ގެ ދަށުން ތިން ދަރިވަރަކު ސްކޮލާޝިޕް ހާސިލުކޮށްފިއެވެ. މިއީ ދުނިޔޭގެ އެންމެ މަތީ 200 ޔުނިވާސިޓީއަކުން ބޭންކިން އެންޑް ފައިނޭންސްގެ ރޮނގުން އަންޑަގްރެޖުއޭޓް ޕްރޮގްރާމެއް ފުރިހަމަކުރުމަށް ބޭންކުން ހުރިހާ ޚަރަދެއް ހަމަޖައްސައިދޭ ސްކޮލާޝިޕެކެވެ.

މި އަހަރުގެ ސްކޮލާޝިޕަށް ހޮވުނު ދަރިވަރުންނަކީ މުޙައްމަދު ޢާހިލް އަޙްމަދު، މަރްޔަމް ޖައިޝާން ޖަލީލު އަދި މުޙައްމަދު ޝައުން ޙިލްމީ އެވެ. މި ދަރިވަރުންނަށް ސްކޮލާޝިޕް ލިބުނުކަމުގެ ލިޔުން ހަވާލުކުރުމަށް ބީއެމްއެލްއިން ވަނީ ޚާއްސަ ރަސްމިއްޔާތެއް ބާއްވާފައެވެ.

މި ރަސްމިއްޔާތުގައި ވާހަކަފުޅު ދައްކަވަމުން ބޭންކުގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފު ވަނީ މި ކާމިޔާބީއަކީ އެ ދަރިވަރުންގެ ހިތްވަރާއި މިންނެތް މަސައްކަތުގެ ނަތީޖާކަން ފާހަގަކުރެއްވައި، އެކަމަށްޓަކައި އެކުދިންނަށް މަރްޙަބާ ދަންނަވާަފައެވެ.

އަދި މި ފުރުސަތާއެކު ދަރިވަރުންގެ ފަންނީ ގާބިލުކަން އިތުރުކޮށް، ތައުލީމު ހާސިލުކޮށް ނިމުމުން ރާއްޖޭގެ މާލީ ދާއިރާގެ ތަރައްގީއަށް މުހިންމު ދައުރެއް އަދާކުރާނެ ކަމަށް އުންމީދުކުރައްވާ ކަމަށް ޝަރީފު ވިދާޅުވިއެވެ.

ބީއެމްއެލްއިން މި ސްކޮލާޝިޕް ޕްރޮގްރާމް ތަޢާރަފުކޮށްފައިވަނީ 2022 ވަނަ އަހަރުއެވެ. މި ސްކޮލާޝިޕަކީ ރާއްޖޭގެ ބޭންކިން އަދި ފައިނޭންސް ދާއިރާ ކުރިއަރުވައި، އިތުރަށް ހަރުދަނާ ކުރުމަށް ބޭންކުން ކުރަމުންދާ މަސައްކަތްތަކުގެ ތެރެއިން ކުރަމުން އަންނަ މުހިންމު މަސައްކަތެއްގެ ގޮތުގައި ބީއެމްއެލްއިން ވަނީ ފާހަގަކޮށްފައެވެ.