ވޭޕްގެ ވިޔަފާރިކޮށް، އެ ބޭނުންކުރުން މަނާކުރުމުގެ ބިލު މަޖިލީހުން ފާސްކޮށްފި

ވޭޕް އެތެރެކޮށް އޭގެ ވިޔަފާރި ކުރުމާއި އެ ބޭނުން ކުރުން މަނާކުރުމަށް ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ގެނައުމުގެ ބިލު، ރައްޔިތުންގެ މަޖިލީހުން މިއަދު ފާސްކޮށްފިއެވެ.

ސަރުކާރުގެ ފަރާތުން މި ބިލު ހުށަހެޅުއްވީ ހެންވޭރު އުތުރު ދާއިރާގެ މެންބަރު އަހުމަދު އައިފާނެވެ.

މިއަދުގެ ޖަލްސާގައި މި ބިލު ފާސްކުރުމަށް 54 މެންބަރުން ވޯޓު ދެއްވިއެވެ. ވަކި ގޮތަކަށް ވޯޓު ދެއްވަން ބޭނުންނުވާކަމަށް އަށް މެންބަރަކު ތިއްބެވިއެވެ. އެއީ، އެމްޑީޕީގެ ހަތް މެންބަރުންނާއި އައްޑޫ މީދޫ ދާއިރާގެ މިނިވަން މެންބަރު އަބްދުއްރަހްމާންއެވެ. ބިލް ފާސްކުރުމާ ދެކޮޅަށް އެއްވެސް މެންބަރަކު ވޯޓުދީފައެއް ނުވެއެވެ.

މި ބިލު ފާސްކޮށްފައިވަނީ މިމަހުގެ ހަވަނަ ދުވަހު ބޭއްވި އިޖުތިމާއީ ކޮމިޓީގައި މި ބިލަށް ގެނެވުނު އިސްލާހުތަކާއެކުގައެވެ. އެގޮތުން ގެނައި އިސްލާހުތަކަކީ:

* ދުންފަތުގެ އެއްވެސް ބާވަތެއް ނުވަތަ ދުންފަތުގެ އެއްވެސް ބާވަތެއް އެކުލެވޭ ތަކެތި އާންމުކޮށް ފެންނާނެހެން ބެހެއްޓުމަކީ އެ ތަކެތި އިޝްތިހާރު ކުރުން.

* އީ-ސިނގިރޭޓު އަދި ވޭޕް ކުރުމަށް ބޭނުންކުރާ އާލާތެއް ނުވަތަ އެ ފަދަ އެއްޗަކާއެކު ބޭނުން ކުރުމަށް އުފައްދާފައިވާ އެއްޗެއް ވިއްކުމަކީ ނުވަތަ ހިލޭ ބެހީ ކުޑަކުއްޖަކަށް ކަމަށް ވާނަމަ، އެ ފަރާތެއް 50،000 ރުފިޔާއިން ޖޫރިމަނާ ކުރުން.

* އަދި އެތެރެކުރި ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް ކުރުމަށް ބޭނުން ކުރާ އާލާތަކަށް 10،000 ރުފިޔާގެ މަގުން ޖޫރިމަނާ ކުރެވޭނެކަމަށްވެސް ވެއެވެ.

* އެފަދަ އާލާތެއް ވިއްކައިފިނަމަ، 20،000 ރުފިޔާއިން ޖޫރިމަނާ ކުރެވޭނެ ކަމަށާއި ވިއްކި ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާ ކުރެވޭނެ. އަދި އެފަދަ އުފެއްދުމެއް ބޭނުންކޮށްފިނަމަ، 5،000 ރުފިޔާއިން ޖޫރިމަނާ ކުރެވޭނެ ކަމަށްވެސް އިސްލާހުގައި ވެއެވެ.

ދުންފަތުގެ ބާވަތްތަކުގެ ގޮތުގައި ދުންފަތާއި، ދުންފަތުގެ ތަނޑިއާއި، ނިކޮޓިން ހިމަނައިގެން ތައްޔާރުކޮށްފައި ހުންނަ ތަކެތިކަން ކަނޑައެޅުން.

ހަފައިގެން، ބޮއެގެން، ވަސް ދަމައިގެން، ހަށިގަނޑުގެ ތަނެއްގައި ތަތްކޮށްގެން، ޖައްސައިގެން ނުވަތަ އުނގުޅައިގެން ވިޔަސް، އޭގެ މާއްދާއެއް ހަށިގަނޑަށް ވާސިލުވާ ގޮތަށް ތައްޔާރުކޮށްފައި ހުންނަ ކޮންމެ ބާވަތަކީ ދުންފަތުގެ ބާވަތެއް.

ފަރުވާގެ ގޮތުގައި ބޭނުންކުރާ ނިކޮޓިން ހިމެނޭ ބާވަތްތައް، އިސްތިސްނާ ކުރުން.

ސަރުކާރުން ނިންމައިފައިވަނީ، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން އަންނަ ހުކުރުން ފެށިގެން މަނާކުރުމަށެވެ.

އަދި އަދި ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރު ކުރުމާއި ހިލޭބެހުން 15 ޑިސެމްބަރު 2024 އިން ފެށިގެން މަނާކުރުމަށް ވެސް ވަނީ ނިންމަވާފައެވެ.