އެމްޑީޕީއަށް 20 އަހަރު ފުރުން ފާހަގަކުރަން މުޅި އަހަރަށް ބަހާލައިގެން ގިނަ ހަރަކާތްތަކެއް ހިންގަނީ

އިދިކޮޅު މައި ޕާޓީ، އެމްޑީޕީއަށް 20 އަހަރު ފުރުން ފާހަގަކުރުމަށް މުޅި އަހަރަށް ބަހާލައިގެން ގިނަ ހަރަކާތްތަކެއް ހިންގުމަށް އެ ޕާޓީން ނިންމައިފިއެވެ.

މާދަމާ، ޖޫން 26 ވާ އަންގާރަ ދުވަހަކީ ރާއްޖޭގައި މިހާރު އޮތް، އެންމެ ގިނަ ދުވަސްވީ ޕާޓީ، އެމްޑީޕީ އުފެދުނުތާ 20 އަހަރުވާ ދުވަހެވެ.

މިކަމާ ގުޅިގެން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ޗެއާޕާސަން ފައްޔާޟު އިސްމާޢީލް ވިދާޅުވީ، ވޭތުވެދިޔަ 20 އަހަރު ތެރޭގައި ރާއްޖެއަށް އެންމެ ގިނަ ބަދަލުތަކެއް ގެނެސްދިން ޕާޓީ އަކީ އެމްޑީޕީ ކަމަށެވެ.

އެހެންކަމުން، 20 އަހަރު ވުން ފާހަގަ ކުރުމަށް މުޅި އަހަރަށް ބަހާލައިގެން ހަރަކާތްތައް ހިންގުމަށް ޕާޓީން ނިންމާފައިވާ ކަމަށް އޭނާ ވިދާޅުވިއެވެ.

އޭގެ ބޭނުމަކީ މިހާރުގެ ޖީލް ތަކަށްވެސް ވޭތުވެދިޔަ 20،30 އަހަރުގެ ތެރޭގައި ، އިސްލާހަށް ކުރެވުނު މަސައްކަތް ތަކާއި، އޭރުގެ ޙަލާތްތައް އަންގައިދިނުމާއި،  އަދި ކުރިއަށް އޮތް ތަނަށްވެސް ދިވެހިރާއްޖެއަށް ގެންނަންޖެހޭ ބަދަލުތައް ގެނައުމުގައި އެންމެ ކުރީ ސަފުގައި ހަރަކާތްތެރިވެ އެކަންކަން ކާމިޔާބު ކުރުމުގައި ހުންނާނީ އެމްޑީޕީކަން ދައްކައިދިނުމަށް

އެމްޑީޕީ ޗެއާޕާސަން ފައްޔާޟް އިސްމާޢީލް

އެގޮތުން 20 އަހަރު ފުރުން ފާހަގަކުރަން މާދަމާ ރޭވިފައިވާ ހަރަކާތްތަކަކީ؛

1) ހެނދުނު ސަޔާއިއެކު ދިދަ ނެގުމުގެ ހަރަކާތެއް ބޭއްވުން

2) އަހަރީ ދުވަހުގެ ކޭކުފެޅުން

3) އެމްޑީޕީ މެންބަރުންގެ މެދުގައި ފުޓްސަލް މުބާރާތެއް ބޭއްވުން (10-12 ޓީމު)

4) ޒުވާނުންގެ ރޫހުގެ ފަރާތުން ”ލައުޑް އެންޑް ލޯކަލް“ ޕޮޑްކާސްޓެއް ފެށުން

މީގެ އިތުރުން ޖުލައި އަދި އޮގަސްޓް މަހުގައި، ރާއްޖޭގެ ކޮންމެ ސިޓީއެއްގައި ބޮޑު ޖަލްސާއެއް ބޭއްވުމަށް ނިންމާފައިވާ ކަމަށާ، ފުރަތަމަ ޖަލްސާ އޮންނާނީ ޖުލައި 11 ވަނަ ދުވަހު ކުޅުދުއްފުށީގައި ކަމަށް ފައްޔާޒު ވިދާޅުވިއެވެ. އަދި ޖަލްސާތައް ނިންމާލާ ޖަލްސާ އޮންނާނީ މާލޭގައި ކަމަށްވެސް ވިދާޅުވިއެެވެ.

މިއާއެކު ޖުލައި 18 ވަނަ ދުވަހު ”ރަން ރީނދޫ“ ނަމުގައި ދުވުމެއް ކުރިއަށް ގެންދަން ނިންމާފައިވާއިރު، މި ދުވުން މުޅި އަހަރަށް ބަހާލައިގެން ހުރިހާ ރަށެއްގައި ބާއްވަން ނިންމާފައިވާ ކަމަށް އޭނާ ވިދާޅުވިއެވެ.

ހަމައެހެންމެ ބޮޑު މިޔުޒިކް ފެސްޓިވަލް އަކާއި، ކުރިއަށް އޮތް ރިޔާސީ އިންތިޚާބަށް މެނިފެސްޓޯ އެކުލަވާލުމަށް މައުލޫމާތު އެއްކުރުން ފަދަ ކަންކަންވެސް ކުރިއަށް ގެންދަވާނެ ކަން ފައްޔާޟު ފާހަގަކުރެއްވިއެވެ.

މީގެ އިތުރުން މިދިޔަ 20 އަހަރު ރާއްޖެއަށް އައިސްފައިވާ ބަދަލުތައް ގެނައުމުގައި އެމްޑީޕީގެ ހިއްސާ އޮތްގޮތް ދައްކައި ދިނުމަށް އާޓް އެގްޒެބިޝަނެއްވެސް ބޭއްވިގެންދާނެ ކަމަށް ވިދާޅުވިއެވެ.