ރާއްޖޭގެ 13 ރަށެއްގައި ސޯލާ ޕީވީ ނިޒާމު ޤާއިމުކުރުމަށް ސްޓެލްކޯއިން ސައިނޯ ސޯ ހައިބްރިޑާއެކު އެއްބަސްވުމެއްގައި ސޮއިކޮށްފި

ރާއްޖޭގެ އެކި ރަށްރަށުގައި އިއާދަކުރަނިވި ހަކަތައިގެ ނިޒާމު ފަރުމާކޮށް، ބިނާކުރުމާއި، ފައިނޭންސްކުރުމުގެ އިތުރުން ހިންގައި ބެލެހެއްޓުމަށްޓަކައި ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަދި ސައިނޯ ސޯ ހައިބްރިޑް (ބެއިޖިންގ) ޓެކްނޮލޮޖީ ކޯ ލިމިޓެޑާ ދެމެދު މުހިންމު އެއްބަސްވުމެއްގައި ސޮއިކޮށްފިއެވެ.

ސްޓެލްކޯއިން މަޢުލޫމާތު ދީފައިވާ ގޮތުގައި މި ޕަވަރ ޕާޗޭސް އެގްރީމަންޓުގައި ސޮއިކޮށްފައިވަނީ މޫސުމީ ބަދަލުތަކާއި، ތިމާވެއްޓާއި ހަކަތައާ ބެހޭ ވުޒާރާއިން އިސްނަގައިގެން ކުރިއަށްގެންދާ 'އެރައިޒް' (ARISE) މަޝްރޫޢުގެ ދަށުން، ގްރިޑް-ޓައިޑް ސޯލާ ޕީވީ ނިޒާމުތައް ޤާއިމުކުރުމަށެވެ.

މި އެއްބަސްވުމުގެ ދަށުން އިއާދަކުރަނިވި ހަކަތައިގެ ނިޒާމު ފަރުމާކުރުމާއި، ބިނާކުރުމާއި، ފައިނޭންސްކުރުމުގެ އިތުރުން އެ ނިޒާމުތައް ހިންގައި ބެލެހެއްޓުމުގެ މަސައްކަތް ކުރިއަށް ގެންދިއުމަށް ހަމަޖެހިފައިވަނީ ދެ ލޮޓަކަށް ބަހާލައިގެންނެވެ.

އެގޮތުން ހިމެނޭ ރަށްތަކަކީ:

ލޮޓް 1: ލ. ހިތަދޫ، ލ. ކުނަހަންދޫ، ލ. މާބައިދޫ، ލ. މާމެންދޫ، ލ. މާވަަށް އަދި ލ. ދަނބިދޫ.

ލޮޓް 2: ލ. އިސްދޫ، ލ. ކަލައިދޫ، ލ. ފޮނަދޫ، ލ. ގަން، ޅ. ނައިފަރު، ގއ. ވިލިނގިލި އަދި ށ. ފުނަދޫ.

ސްޓެލްކޯއިން ފާހަގަކުރި ގޮތުގައި މި މަޝްރޫޢަކީ ރާއްޖޭގައި ކަރަންޓު އުފެއްދުމަށްޓަކައި ތެލަށް ބަރޯސާވާ މިންވަރު ބޮޑުތަނުން ކުޑަކުރުމަށް މަގުފަހިވެގެންދާނެ މަޝްރޫޢެކެވެ. އަދި މިއީ ރާއްޖޭގެ ރަށްރަށަށް ދެމެހެއްޓެނިވި، އިތުބާރުހުރި، އަދި ތިމާވެއްޓާ ރައްޓެހި ހަކަތަ ފޯރުކޮށްދިނުމަށްޓަކައި އެޅިގެންދިޔަ ވަރަށް މުހިންމު ފިޔަވަޅެއް ކަމަށްވެސް އެ ކުންފުނިން ވަނީ ބުނެފައެވެ.