މިދިޔަ އަހަރުގެ ފަހު ކުއާޓަރުގައި އެމްޓީސީސީއަށް 151.3 މިލިއަން ރުފިޔާގެ ފައިދާއެއް ލިބިއްޖެ

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށް މިދިޔަ އަހަރުގެ ހަތަރުވަނަ ކުއާޓަރުގެ ސާފްފައިދާގެ ގޮތުގައި 151.3 މިލިއަން ރުފިޔާ ލިބިއްޖެއެވެ.

ދިވެހި ރައްޔިތުންނަށް އެންމެފުރަތަމަ ހިއްސާވިއްކަން ފެށި އެމްޓީސީސީން އާއްމުކޮށްފައިވާ މިދިޔަ އަހަރުގެ ފަހު ކުއާޓަރުގެ މާލީބަޔާނަށް ބަލާއިރު އެ ކުއާޓަރުގައި އާމްދަނީގެ ގޮތުގައި 418.2 މިލިއަން ރުފިޔާ ވަނީ ލިބިފައެވެ. މި ކުއާޓަރުގައި މުދާ ވިއްކުމުގެ ހަރަދަށް 575.3 މިލިއަން ރުފިޔާ ލިބުނުއިރު، މި ކުއާޓަރުގައި ފއިދާވެފައިވަނީ އެމްޓީސީސީއަށް އެހެނިހެން ގޮތްގޮތުން ލިބުނު 481.1 މިލިއަން ރުފިޔާގެ ސަބަބުންނެވެ.

އެމްޓީސީސީއަށް މިދިޔައަހަރުގެ ފުރަތަމަ ކުއާޓަރުގައި އާމްދަނީގެ ގޮތުގައި 5.2 މިލިއަން ރުފިޔާ ލިބުނުއިރު، ދެވަނަ ކުއާޓަރުގައި ވަނީ 54 މިލިއަން ރުފިޔާގެ ގެއްލުމެއް ލިބިފައެވެ. އަދި ޖެހިގެންއައި 3 ވަނަ ކުއާޓަރުގައި 18 މިލިއަން ރުފިޔާގެ ގެއްލުމެއް ލިބުނެވެ. އެމްޓީސީސީއަށް މިދިޔަ އަހަރު ސާފްފައިދާގެ ގޮތުގައި ލިބިފައިވަނީ 84.2 މިލިޔަން ރުފިޔާއެވެ.

އެމްޓީސީސީން ރިޕޯޓްކޮށްފައިވާ ގޮތުގައި ހިއްސާއަކަށް ލިބުނު އާމްދަނީވެސް މިދިޔަ އަހަރުގެ ފަހުކޮޅު އިތުރުވެފައި ވެއެވެ. އެގޮތުން، ނިމިދިޔަ އަހަރުގެ މެދުތެރޭގައި ހިއްސާއަކަށް 2.25 ރުފިޔާ ޖެހިފައިވާއިރު ނިމިދިޔަ އަހަރުގެ ފަހުކޮޅު ހިއްސާއަކަށް 18.82 ރުފިޔާ ޖެހިފައި ވެއެވެ.

މިދިޔަ އަހަރުގެ ފަހުކޮޅު ތެރޭގައި އެމްޓީސީސީން 189 މަޝްރޫއުއެއްގެ މަސައްކަތްކޮށްފައި ވެއެވެ.  އޭގެ ތެރޭގައި 74 ބަނދަރު ހެދުމުގެ މަޝްރޫއު، 32 ބިން ހިއްކުން އަދި ފަޅު ހިމާޔަތް ކުރުމުގެ މަޝްރޫއުއާއި، 12 އިމާރާތް ހެދުމުގެ މަޝްރޫއު، އަދި ހަ އެއާޕޯޓް ހެދުމުގެ މަޝްރޫއު ހިމެނެ އެވެ.