ލާންވީ ގަމީހާއި ބޮލުގެ އިސްތަށިގަނޑު ހުންނަންވީ ގޮތްވެސް ކަނަޑައަޅަނީ ސަރުކާރުން؛ މިއީ ބޮޑު ކަންބޮޑުވުމެއް: ޝާހިދު

މި ސަރުކާރު ވެރިކަމަށް އައިސް ރައްޔިތުންގެ ބާރު ކަނޑާލާފައިވާ ކަމަށާ، ރައްޔިތުންގެ ހުރިހާ ކަމެއްވެސް ކަނޑައަޅަނީ ސަރުކާރުން ކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެއެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޝާހިދު ވިދާޅުވީ، މި ސަރުކާރު ވެރިކަމަށް އައިސް އަސާސީ ކަންކަމަށް ސަލާމް ޖަހަން މަޖުބޫރުކޮށްފައިވާ ކަމަށެވެ. އެގޮތުން، ކަރަންޓް އަގުހެޔޮ ކުރުމަށް ދެމުން އައި ސަބްސިޑީ ކަނޑާލައި، ފެނާއި ނަރުދަމާ އާއި ދަތުރުފަތުގެ ސަބްސިޑީވެސް ކަނޑާލާފައުވާ ކަމަށް ޝާހިދު ވިދާޅުވިއެވެ.

އާސަންދަ ކަނޑާލައި މިހާރުވެސް ބޭސ ސިޓީއަށް ސަލާމްޖެހުން އެވަނީ މަޖުބޫރު ކޮށްފައި. ދާއިމީ ބަލިތަކަށް ފަރުވާ ކުރަމުންއައި ދިވެހި ރައްޔިތުންގެ ޓްރީޓްމަންޓް ތަކަށް އާސަންދަ ދިނުން ހުއްޓާލާފައިވާކަން ތަކުރާރުކޮށް އިވެމުން މިދަނީ… ކޮންމެ ރޯދަމަހަކަށް ލިބޭ 3000 ވެސް ހޭދަކުރަންޖެހޭނީ ގަވައިދުން ލިބެމުންދިޔަ ސަބްސިޑީގެ ޚަރަދުތައް ފޫބެއްދުމަށް. އާޚިރު ނަތީޖާ އަކީ ރައްޔިތުން ފުނޑިގެން ދިޔުން. ބޭސް ސިޓީ ހިފައިގެން އަލުން އަނބުރާ މުލިއާގެ ދޮށަށް ސަލާމް ޖަހަން ދާންޖެހުން.

އަބްދުالله ޝާހިދު

މިއާއެކު ޝާހިދު ވިދާޅުވީ، މިއަދު ފެންނަމުންދާ ކަންކަމަށް ބަލައިލުމުން ގާނޫނަކީ ކުޅޭކުޅޭ އެއްޗަކަށް ވެފައިވާ ކަމަށާ، ގާނޫނުން ނުބެހޭ ކަމެއް ނެތް ކަމަށެވެ.

ޒާތީ ދިރިއުޅުމުގެ ހުރިހާ ތަނަކަށް ސަރުކާރުން އަތް ބާނާއިފި. ލާންވީ ގަމީހާއި ބޮލުގެ އިސްތަށިގަނޑު، ޚާއްސަ ގޮތެއްގައި އަޅުގަނޑު ކަންބޮޑުވާ މައްސަލައެއް ބޮލުގެ އިސްތަށިގަނޑުގެ މައްސަލަ، ބޮލުގެ އިސްތަށިގަނޑު ބަހައްޓަންވީ ގޮތާއި، ދުއްވަންވީ ސައިކަލާއި އެކުގައި ކޮފީ ބޯ ރަށްޓެހިން ވެސް ކަނޑައަޅަނީ ސަރުކާރުން.

އަބްދުالله ޝާހިދު

މީގެ އިތުރުން، ރައްޔޮތުން ކުރަމުން އަންނަ ވިޔަފާރިތައް، ޓުވީޓެއް ކުރައްވައިގެން ހުއްޓުވައި ވިޔަފާރިވެރިންނަށް ބޮޑެތި ގެއްލުންތައް ދެމުންދާ ކަމަށް ޝާހިދު ވިދާޅުވިއެވެ.

އަދި މަޖިލީހުގެ މެޖޯރިޓީ ބޭނުން ކުރައްވައިގެން ދައުލަތުގެ ހުރިހާ ބާރެއް ރައީސުލްޖުމްހޫރިއްޔާގެ މުށުތެރެއަށް ގެންނަވައި، އެ މުވައްސަސާތައް ކުޑަކަކޫ ޖައްސަވާފައިވާ ކަމަށް ޝާހިދު ވިދާޅުވިއެވެ. ހަމަ އެހެންމެ، މަޖިލީހުގައިވެސް އެއްވެސް މަޝްވަރާ ކުރުމެއް ނޯންނަ ކަމަށާ، މަޖިލިސްވެސް ވަނީ ރައީސުލްޖުމްހޫރިއްޔާގެ މުށު ތެރޭގައި ކަމަށް ވިދާޅުވިއެވެ.

އެހެންކަމުން، ޝާހިދު ވިދާޅުވީ، މި ސަރުކާރު އައިސް ރައްޔިތުންގެ ބާރު ކަނޑާލާފައިވާ ކަމަށެވެ.