އައްޑޫ ތަރައްޤީކުރުމުގައި އެއްބާރުލުން ދޭނެކަމުގެ ޔަގީންކަން އޮތް ކެނޑިޑޭޓަކީ އަޒާން: ރައީސް މުޢިއްޒު

ހިތަދޫ މެދު ދާއިރާގެ ރައްޔިތުންގެ މަޖިލީހުގެ ގޮނޑިއަށް ވާދަކުރައްވާ ކެންޑިޑޭޓުންގެ ތެރެއިން އައްޑޫ ސިޓީއާއި އެ ސިޓީގެ ހިތަދޫ ތަރައްޤީކުރުމަށް ސަރުކާރުން ކުރަން ރާވާފައިވާ މަސައްކަތްތަކުގައި އެއްބާރުލުން ދޭނެކަމުގެ ޔަގީކަން އޮތް ކެނޑިޑޭޓަކީ ޕީއެންސީގެ ފަރާތުން އެ ދާއިރާއަށް ވާދަކުރައްވާ އަޙްމަދު އަޒާން މަރުޒޫޤުކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވެފައި ވަނީ، ހިތަދޫ މެދު ދާއިރާގެ ރައްޔިތުންނަށް ރައީސް ފަރާތްޕުޅުން ފޮނުއްވި ވީޑިއޯ މެސެޖެއްގައެވެ.

އެގޮތުން ރައީސް ވިދާޅުވީ އައްޑޫ ސިޓީއާއި އެ ސިޓީގެ ހިތަދޫގެ ތަރައްޤީއަށް ސަރުކާރުން ގިނަގުނަ ކަންތައްތަކެއް ކުރަން ރާވާފައިވާ ކަމަށެވެ. އެކަންކަން ކުރުމަށް މަޖިލީހުގެ އެއްބާރުލުން ބޭނުންވާ ކަންވެސް އެމަނިކުފާނު ފާހަގަކުރެއްވިއެވެ.

"އައްޑޫގެ އަދި ހިތަދޫގެ ތަރައްޤީއަށްޓަކައި ސަރުކާރުން ކުރަން އެބަހުރި ވަރަށް ގިނަ މަސައްކަތްތައް. ވަރަށް ގިނަ ތަރައްޤީގެ ޕްލޭންގެ ކަންތައްތައް އެބަހުރި. މިކަންކަން ކުރުމުގައި ރައްޔިތުންގެ މަޖިލީހުގެ ފުރިހަމަ އެއްބާރުލުން ބޭނުންވޭ. މިކަމުގައި އަޅުގަނޑު ފުރިހަމަ ޔަގީންކަން އޮތީ ކެންޑިޑޭޓު ނަންބަރު ދޭކަަށް.،"

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މިއާއެކު ރައީސްވަނީ ހިތަދޫ މެދު ދާއިރާގެ ރައްޔިތުން އަޒާނަށް ވޯޓުދެއްވަން އެދިވަޑައިގެންފައެވެ.

"ހިތަދޫ މެދު ދާއިރާގެ ލޮބުވެތި ރައްޔިތުންނަށް އަޅުގަނޑު ދަންނަވައިލަން ބޭނުންވަނީ ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ތިދާއިރާގެ އިއްޒަތްތެރި ރައްޔިތުންގެ މަޖިލީހުގެ މެންބަރަކަށް ހޮއްވަވައިދެއްވަން ކެންޑިޑޭޓު ނަންބަރު އަޙްމަދު އަޒާން،"

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

އައްޑޫ ހިތަދޫ މެދު ދާއިރާއަށް އަޒާނުގެ އިތުރަށް ވާދަކުރައްވަނީ އައްޑޫ ސިޓީގެ މިހާރުގެ ޑެޕިއުޓީ މޭޔަރު ޝުއާއުއެވެ. އޭނާ ވާދަކުރައްވަނީ އިދިކޮޅު އެމްޑީޕީގެ ޓިކެޓުގައި އެ ޕާޓީގެ ކެންޑިޑޭޓުގެ ގޮތުގައެވެ.

ބައިނަލްއަޤުވާމީ ގުޅުންތަކުގެ ދާއިރައިން އަޒަރްބައިޖާނުން މަތީ ތައުލީމު ހާސިލުކުރައްވާފައިވާ އަޒާނަކީ "ދިޔަރެސް" ނޫހުގެ މުއައްސިސެކެވެ.