މިހާހިސާބަށް އާއިރު ހައްޖުދަތުރުން އެންމެބޮޑަށް ފާހަގަވީ ކޮންކަމެއް؟

ހައްޖަކީ އަހަރެއްގެ ތެރޭގައި މުސްލިމުންނަށް އަންނަ އެންމެ މާތް އަޅުކަމުގެ ތެރޭގައި ހިމެނޭ އަޅުކަމެވެ. އެއީ އެންމެ މާތް ދަތުރެވެ. މިފަހަރުގެ ހައްޖު މޫސުމަށް ދިވެހިން ތައްޔާރުމީ މީގެ ކުރިއާ ހިލާފަށް ތަފާތު ކަންތައްތަކާއެކުގައެވެ. އެންމެ މުހިއްމު ކަމެއްގެ ގޮތުގައި ފާހަގަކުރެވުނީ މިފަހަރުގެ ހައްޖަށް ހުރިހާ ދިވެހިންވެސް ދަތުރުކުރީ ސަރުކާރުގެ ހައްޖު ކުންފުނީގެ ބެލެނިވެރިކަމުގެ ދަށުންނެވެ. އެކަމުގެ ސަބަބުން ދިވެހި ހައްޖުވެރިންނަށް އެބައިމީހުންގެ ދަތުރުގައި މީގެ ކުރިން ނުލިބޭ އެތައް ފަސޭހަތަކެއް މިހާތަނަށް ވަނީ ލިބިގެންގޮސްފައެވެ. މީގެ ކުރިން އެކި ކުންފުނިތަކުގެ ހަވާލުގައި ހައްޖަށްގޮސް ދިވެހިން ތަފާތު އެތައް ތަޖުރިބާތަކެއް ކުރަންޖެހިފައި އެބަހުއްޓެވެ. މީގެ ތެރޭގައި ހައްޖުވެރިން ގެއްލުމާއި އިންތިޒާމުތައް ފުރިހަމަ ނުވުމުން ދިމާވި އެތައް އެތައް ކަމެކެވެ.

އެންމެ ފުރަތަމަ ކަމަކަށް މިފަހަރުގެ ހައްޖު ދަތުރަށް ދިވެހި ހައްޖުވެރިން ތައްޔާރުވިއިރު، މައްކާ ރޫޓް އިނީޝިއޭޓިވްގައި ރާއްޖެ އޮތީ ހިމަނާފައެވެ. މިއީ މި ދަތުރުގައި ދިވެހި ހައްޖުވެރިންނަށް ލިބިގެންދިޔަ ވަރަށްބޮޑު ފަސޭހައެކެވެ. މައްކާ ރޫޓު އިނީޝިއޭޓިވްއަކީ ހައްޖުވެރިން އަމިއްލަ ޤައުމުން ފުރުމުގެ ކުރިން، ދެ ޤައުމުގެ އިމިގްރޭޝަނުން ކުރަންޖެހޭ ކަންކަން އަމިއްލަ ޤައުމުގެ އެއަރޕޯޓްގައި ތިބެ ނިންމައިގެން ފުރުމެވެ. ނަތީޖާއަކީ ޖިއްދާގެ އެއާޕޯޓްގެ އިމިގްރޭޝަންގައި ޙައްޖުވެރިން މަޑުކުރަން ނުޖެހި ހޮޓަލަށް ދެވޭގޮތަށް ކަންކަން އިންތިޒާމް ވެގެން ދިއުމެވެ. މިފަހަރު ފްލައިޓާ ހޮޓަލަށް ދިއުމާ ދެމެދު ނެގީ މަދު ވަގުތުކޮޅެކެވެ.

އޭގެ އިތުރުން މިފަހަރު މިނާގެ ޓެންޓްތައް ހުރީ މީގެ ކުރިއާ ހިލާފަށް ހައްޖުވެރިންނަށް ވަރަށްބޮޑަށް ފަސޭހަވާނޭހެން އިންތިޒާމުތައް ހަމަޖައްސައިދީފައެވެ. ކޮންމެ ހައްޖުވެރިއަކަށް އަރާމުކޮށްލާނޭ ސޯފާއެއް ކަނޑައެޅިފައިވާއިރު، ދިވެހި ހައްޖުވެރިންނަށް ހާއްސަ ކްލިނިކެއްވެސް ވަނީ ގާއިމްކޮށްފައެވެ.

ދިވެހި ހައްޖުވެރިން ބުނާގޮތުގައިު ހައްޖުގެ މިހާހިސާބަށް އާއިރު އެންމެ ފާހަގަވި އެއްކަމަކީ ދަތުރުގެ އިންތިޒާމްތަކެވެ. ހައްޖުވެރިން މިހާރު ވަނީ މުޒްދަލިފާއިން މިނާގެ ޓެންޓުތަކަށް ދިއުމަށް ދަތުރުފަށާފައެވެ. އެންމެ ހާއްސަކަމަކީ މިހާހިސާބަށް އާއިރު ދިވެހި ހައްޖުވެރިއަކު ގެއްލުންފަދަ ކަމެއް އަދި ދިމާނުވާކަމެވެ.

މިއީ ދިވެހިން ހައްޖަށް ދާންފެށިފަހުންވެސް ރެކޯޑެކެވެ. ހައްޖު ކޯޕަރޭޝަނުން ބުނީ މުޒްދަލިފާ ނިންމާފައި މިނާއަށް ހައްޖުވެރިން އަންނަ އައުމުގައި މިފަހަރު ހައްޖުވެރިއަކު ނުގެއްލޭ ކަމަށާއި، މިއީ އެކަން އެގޮތަށްވާ ފުރަތަމަ ފަހަރު ކަމަށެވެ. މިވަގުތާ ހަމަޔަށް މިނާއަށް ނުފޯރާ ދެތިންބަސް އޮތްނަމަވެސް ހުރުހާ ބަސްތަކެއްގައި ދިވެހި ހައްޖުވެރިން ހަމައަށްތިބިކަމަށް ހައްޖު ކޯޕަރޭޝަނުން ވަނީ ބުނެފައެވެ.

ހައްޖުވެރިން މިނާއަށް އައުމަށްފަހު ދެން ކުރިއަށްދާނީ ޖަމުރާތަކަށް ހިލަ އުކާށެވެ. އެއަށްފަހު ދެން އޮންނާނީ އައްޔާމުލްތަސްރީގުގެ ދުވަސްތަކުގައި މިނާގައި ހޭދަކުރުމެވެ.