އުމްރާއަށް ދިޔަ ދިވެހިންގެ އަދަދު 4،000 ވުރެ ގިނަ: މިނިސްޓަރު
މިދުވަސްކޮޅު އުމްރާގެ އަޅުކަން އަދާކުރުމަށް ހަތަރު ހާހަށްވުރެ ގިނަ ދިވެހިން ގޮސް އެބަތިބިކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރު ޝަހީމް ވިދާޅުވީ، އުމްރާގެ އަޅުކަން އަދާކުރުމަށް ގޮސްތިބި ދިވެހިންގެ ހާލު ރަނގަޅުކަމަށެވެ. ޖުލައި އުމްރާއަށް ގިނަ އަދަދެއްގެ ބަޔަކު މިފަހަރުވެސް ރާއްޖެއިން ދިޔަކަމަށް ކަމާ ބެހޭ އިދާރާތަކުން ބުނެއެވެ.
މިދުވަސްވަރު އުމްރާއަށް ދާ މީހުން އިތުރުވެފައިވަނީ ސްކޫލް ޗުއްޓީ ހަފްތާ އާ ދިމާވުމުންނެވެ. އެގޮތުން މިދިޔަ އަހަރުވެސް ސްކޫލް ޓާމް ޗުއްޓީގައި ގިނަ އަދަދެއްގެ ދިވެހިން އުމްރާހެ އަޅުކަން އަދާކުރަން ދިޔަކަން ފާހަގަކޮށްލެވެއެވެ.
ޖުލައިމަހުގެ އުމްރާއަށް މޯލްޑިވްސް ހައްޖު ކޯޕަރޭޝަނުގެ ހަވާލުގެ އިތުރުން އަމިއްލަ ކުންފުނިތަކުގެ ހަވާލުގައިވެސް ގިނަ ބަޔަކު ވަނީ އުމްރާއަށް ގޮސްފައެވެ. އެގޮތުން ހައްޖު ކޯޕަރޭޝަނުގެ ހަވާލުގައި މިފަހަރު ތިން ފްލައިޓެއްގައި މީހުން ދިޔަކަމަށް އެ ކުންފުނިން ބުނެއެވެ. ކުންފުނިތަކުގެ އިތުރުން އަމިއްލައަށް ވިސާ ނަގައިގެންވެސް މިހާރު ދިވެހިން އުމްރާގެ އަޅުަކަން އަދާކުރުމަށް ގޮސް އުޅެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
