މާފުށީގައި ހެލޯވީން ފާހަގަކުރި މައްސަލާގައި، އިސްލާމިކް މިނިސްޓްރީގެ ބަހެއް ނެތް

ރާއްޖޭގައި ލޯކަލް ޓޫރިޒަމް އެންމެ ފުޅާދާއިރާއެއްގައި ފައްކާވެފައިވާ އެއް ރަށް ކަމަށްވާ ކ. މާފުށީގައި ކްރިސްޓިއަން ދީނުގެ މުނާސަބަތެއް ކަމަށްވާ "ހެލޯވީން" ފާހަގަކުރި މައްސަލައިގައި އިސްލާމިކް މިނިސްޓްރީން ހަނުހުރެއްޖެއެވެ.

މި މައްސަލައާ ގުޅިގެން އިސްލާމިކް މިނިސްޓްރީގެ ބަހެއް ހޯދުމަށް "ވޮއިސް" އިން ތަކުރާރުކޮށް ގުޅުމުންވެސް ފޯނަށް ޖަވާބު ދީފައެއް ނުވެއެވެ. އަދި ފޮނުވި މެސެޖުތަކަށް ވެސް އެ މިނިސްޓްރީން އެއްވެސް ޖަވާބެއް ދީފައެއް ނުވެއެވެ.

މީގެއިތުރުން، ދިވެހި ފުލުހުންގެ ޚިދުމަތާ ތަކުރާރުކޮށް ސުވާލު ކުރުމުންވެސް މިހާތަނަށް އެއްވެސް ޖަވާބެއް ދީފައެއް ނުވެއެވެ.

މި މައްސަލަ ފެންމަތިވެފައިވަނީ މާފުށީގެ "ކާނި ހޮޓެލްސް އެންޑް ޓުއާސް" އިން އެ ކުންފުނީގެ "ކާނި ޕާމް ބީޗް" ގައި މިދިޔަ އޮކްޓޯބަރު މަހުގެ 31 ވަނަ ދުވަހު ހެލޯވީން ޕާޓީއެއް ބާއްވާނެކަން އިއުލާން ކުރުމާ ގުޅިގެންނެވެ. އެކަން އެމީހުންގެ މީސްމީޑިއާ ޕްލެޓްފޯމްތަކުގައި އާންމުކޮށް އިއުލާންކުރީ މިދިޔަ މަހުގެ 24 ވަނަ ދުވަހުއެވެ. އެ އިއުލާނުގައި ބުނެފައިވާ ގޮތުގައި އެ ޕާޓީއާއެކު ބުފޭއަކާއި ޑީޖޭއެއް އޮންނާނެ ކަމަށާއި، ޕާޓީއަށް އަންނައިރު ޚާއްސަ ކޮސްޓިއުމް އަޅައިގެން އައުމަށްވެސް ވަނީ އެދިފައެވެ.

މިފަދަ ހާމަކަން ބޮޑު ގޮތެއްގައި އިއުލާން ކުރުމަށްފަހު، މިދިޔަ ހޮނިހިރު ދުވަހުގެ ރޭ އެ ޕާޓީއާއި ޑީޖޭ ބާއްވާފައިވާއިރު، އެ ހަރަކާތުގެ ވީޑިއޯތައްވެސް މީސްމީޑިއާގައި އާންމުކޮށްފައިވަނީ ކާނި ހޮޓެލްސްގެ އަމިއްލަ އެކައުންޓުންނެވެ. "ވޮއިސް" އަށް އެނގިފައިވާ ގޮތުގައި މީގެ ކުރީ އަހަރުތަކުގައިވެސް އެ ފަރާތުން މާފުށީގައި މިފަދަ ހެލޯވީން ހަރަކާތްތައް ހިންގާފައިވާކަން އެމީހުންގެ މީސްމީޑިއާއިން ފެންނަން އެބަހުއްޓެވެ.

މި މައްސަލައާ ގުޅިގެން އާންމުންގެ ފާޑުކިޔުން އިންތިހާއަށް ބޮޑުވެފައިވަނިކޮށް، އެކަން ކައުންސިލްގެ ސަމާލުކަމަށް އައިސްފައިވޭތޯ ބެލުމަށް "ވޮއިސް" އިން މާފުށީ ކައުންސިލްގެ ރައީސް ޢަލީ ޝައްމޫންއަށް ގުޅުމުން، އެކަން ސަމާލުކަމަށް އައިސްފައިވާ ކަމަށް ވިދާޅުވިއެވެ. ނަމަވެސް އެކަން އެނގުނީ ކޮން އިރަކު ކަމާއި، އެކަމާ ގުޅިގެން އެޅި ފިޔަވަޅަކާ މެދު ސުވާލު ކުރުމުން އެއްވެސް ޖަވާބެއް ނުދެއްވައި ފޯނު ވަނީ ކަނޑާލައްވާފައެވެ.

އެއަށްފަހު ތަކުރާރުކޮށް ގުޅުމުންވެސް ޖަވާބު ނުދެއްވުމުން ކައުންސިލްގެ ނައިބު ރައީސް ޙުސައިން ޢާމިލްއަށް ގުޅުމުން އޭނާ ވިދާޅުވީ އެފަދަ ޕާޓީއެއް ބޭއްވިކަން އެނގިވަޑައިނުގަންނަވާ ކަމަށެވެ.

"އަޅުގަނޑަކަށް ނޭނގެ ބޭއްވި ކަމެއް… (ހެލޯވީން ޕާޓީގެ) ވީޑިއޯ ތި ވެދާނެ ކުރީގެ އެއްޗެއް ކަމަށްވެސް. އެ ޕާޓީ ބޭއްވިކަން އަޅުގަނޑަކަށް ނޭނގެ. އެއްވެސް ފަރާތަކުން އެފަދަ ކަމެއް ކައުންސިލްގެ ސަމާލުކަމަށްވެސް ގެނެސްފައި ނުވޭ،" ނައިބު ރައީސް ވިދާޅުވިއެވެ.

ޤާނޫނު ނަންބަރު 94/6 (ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމާ ބެހޭ ޤާނޫނު) ގެ ދަށުން ހަދާފައިވާ "ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤަވާޢިދު" ގެ 9 ވަނަ މާއްދާގައި ސާފުކޮށް ބަޔާންކޮށްފައިވަނީ، "ދިވެހިރާއްޖޭގައި ދިރިއުޅޭ ޣައިރު މުސްލިމުންނާއި، ދިވެހިރާއްޖެއަށް ޒިޔާރަތްކުރާ ޣައިރު މުސްލިމުން ފާޅުކަން ބޮޑުގޮތެއްގައި އެމީހުންގެ ދީނީ ޝިޢާރުތައް ފާޅުކުރުމާއި، ޢާންމު ތަންތާނގައި ޖަމާޢަތް ހަދައިގެން އެފަދަ ދީނީ ޙަރަކާތްތައް ހިންގުމާއި، އެމީހުންގެ އެފަދަ އެއްވެސް ޙަރަކާތެއްގައި ދިވެއްސަކު ބައިވެރިވުމަކީ މަނާ ކަމެއް" ކަމަށެވެ.

ކްރިސްމަސް އަދި ހެލޯވީން ފަދަ ޣައިރުދީންތަކުގެ ޝިއާރުތަކާއި އީދުތައް ފާޅުކުރުމަކީ މާތްވެގެންވާ އިސްލާމްދީނާއި ރާއްޖޭގެ ޤާނޫނު އަސާސީންނާއި ޤާނޫނުތަކުން ކަނޑައެޅިގެން މަނާކުރާ ކަންކަމެވެ. ނަމަވެސް މި ފަހަކަށް އައިސް މީހުން ދިރިއުޅޭ ރަށްރަށުގައި މިފަދަ ކަންކަން ފާޅުކަން ބޮޑު ގޮތެއްގައި ހިންގަމުންދާއިރު، އެކަމަށް ފިޔަވަޅު ނޭޅުމަކީ ޒުވާން ޖީލުތަކުގެ އަގީދާއަށް ބޮޑު ނުރައްކަލެއް ކުރިމަތިވެ، ދިވެހި މުޖުތަމަޢުގެ އިޖުތިމާޢީ އަދި ދީނީ ފޭރާން ވީދިގެންދާނެ ކަމެއް ކަމަށް ބުނެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.