ބޭއިންސާފުން ދޫކުރާ ފްލެޓްތައް އަތެއްނުލާނަން: ރައީސް ނަޝީދު
ލިޔުންތެރިޔާ
ޝަފްރާޒް އަހްމަދު
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމްގެ ސަރުކާރުން ދޫކޮށްފައިވާ ފްލެޓްތަކުގެ ތެރެއިން ބޭ އިންސާފުން ދޫކޮށްފައިވާ ފްލެޓްތައް އަނބުރާ އަތުލުމުގެ ވިސްނުމެއް ނުގެންގުޅުއްވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާާޅުވީ ހއ.ދިއްދޫގައި ގާއިމްކުރެވުނު އެމަނިކުފާނުގެ އޮފީސް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ދިއްދޫގައި ސަރުކާރުން އެޅި 250 ފްލެޓް ބޭއިންސާފުން ދޫކޮށްފައިވާކަމުގެ ޝަކުވާ ލިބިފައިވާކަމަށެވެ. ނަމަވެސް އެ ފްލެޓްތައް އަލުން އަނބުރާ ނެގުމުގެ ވިސްނުމެއް ނުގެންގުޅޭ ކަމަށާއި، އެތަންތަނުގައި ވެސް އުޅެނީ ހަމަ ދިވެހިންކަމަށް ރައީސް ނަޝީދު ވިދާޅުވިއެވެ.
ނަމަވެސް ފްލެޓް ބޭނުންވާ ފަރާތްތަކަށް އަލުން ފްލެޓް އަޅައިގެން ދެވިދާނެކަމަށް ރައީސް ނަޝީދުވަނީ ވިދާޅުވެފައެވެ.
މިއަދު ރައީސް ނަޝީދު ވަނީ އެމަނިކުފާާނުގެ ސަރުކާރުގައި ދިއްދޫގައި އެޅިގެންދިޔަ ފްލެޓްތަކަށް ޒިޔާރަތްކުރައްވާ، އެ ފްލެޓްތަކަށް އަވަހަށް މީހުން ވަނުން މުހިންމުކަމަށް ވިދާޅުވެފައެވެ.
ރައީސް ނަޝީދާއި އެމަނިކުފާނުގެ އަނބިކަނބަލުން ދިއްދޫއަށް ކުރެއްވި ދަތުރުފުޅު ނިންމަވާލެއްވުމަށްފަހު، ރައީސް ނަޝީދު މިއަދު ވަނީ އެނބުރި މާލެއަށް ވަޑައިގަންނަވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
