ހިޔާލުފާޅުކުރުމަށް އެންމެ ބޮޑު ޖާގައެއް ހޯދާދިނީ އިސްލާމްދީން، އެކަމަކު ބައިބައިވެގެން ނުވާނެ: މައުމޫން

ހިޔާލުފާޅުކުރުމުގެ ހައްގު އެންމެ ތަނަވަސްކޮށް އޮތީ މަތިވެރި އިސްލާމްދީނުގައި ކަމަށާ ނަމަވެސް ހިޔާޅުފާޅުކުރުން ކިތަންމެ މިނިވަންކަމާއެކު އޮތަސް ބައިބައިވުން އުފެދި ދެކޮޅުވެރިވުމަކީ މާތްﷲ އެންގެވިގޮތާ ހިލާފުވުން ކަމަށް ދީނީ އިލްމުވެރިޔާ / ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ރަމަޟާން މަހުގެ ރޭތައް އިހްޔާކޮށް ދިރުވުމުގެ މަގުސަދުގައި މައުމޫން ފައުންޑޭޝަނުން މި ރޯދަ މަހު ކުރިއަށް ގެންދާ އިހްޔާ ފޯރަމްތަކުގެ ތެރެއިން ފުރަތަމަ ޕްރަގްރާމްގައި ރޭ ތަގުރީރު ކުރައްވަމުންނެވެ.

އިސްލާމީ މަރުކަޒުގެ ޖަލްސާކުރާ މާލަމުގައި އޮތް ޖަލްސާ ގައި މައުމޫން ވިދާޅުވީ ބަޔަކަށް އޮޅިފައި އޮތް ނަމަވެސް ހިޔާލުފާޅު ކުުރުމުގެ އެންމެ ތަނަވަސް ޖާގައެއް އޮތީ އިސްލާމް ދީނުގައި ކަމަށެވެ. މުސްލިމުންގެ ތެރޭގައި އެކި މަޒްހަބުތަކަށް އުޅޭ މީހުން ތިބިކަން ފާހަގަކުރައްވާ މައުމޫން ވިދާޅުވީ އެކަމުން ވެސް ހިޔާލުފާޅުކުރުމުގެ ހައްގު ދީނުގައި އޮތް މިންވަރު އެނގިގެންދާ ކަމަށެވެ.

"މަޒުހަބުތައް އުފެއްދުމަކީ ބައިބައިވުން އުފެއްދުމެއް ނޫން. އެއީ ހިޔާލުފާޅުކުރުމުގެ މިނިވަންކަން އޮތްލެއް ބޮޑު ކަމުން އެ ހުރިހާ ކަމެއް އިސްލާމްދީނުގެ ތެރޭގައި ހިމެނިގެން ދަނީ. އެކަމަކު ހިޔާލުފާޅުކުރުމުގައި ތަފާތު ވިޔަސް ބައިބައިވުން އުފެދިގެން ނުވާނެ,"

މައުމޫން ވިދާޅުވީ ބައިބައިވުން އުފައްދާ އަރައިރުންވެ ތަޅާފޮޅާ ބަޔަކަށް ނުވުމަށް މުސްލިމުންނަށް މާތްﷲ އަންގަވާފައިވާ ކަމަށެވެ. އަދި އެފަދަ ބަޔަކަށް ވެއްޖެނަމަ އެ ބަޔަކު ނާކާމިޔާބުވެ އެ ބައެއްގެ ބާރުފިލައިގެންދާނެ ކަމަށް އަންގަވާފައިވާ ކަމަށެވެ. މުސްލިމުން ވާންވާނީ ކޮންމެ ހާލަތެއްގައި ވެސް އިލާހީ ބަސްފުޅުގައި ހިފާ އެގޮތުގައި ދެމި ތިބޭ ބަޔަކަށް ކަމަށް ވެސް މައުމޫން ވިދާޅުވި އެވެ.

އަދި ވިދާޅުވީ ހިޔާޅުފާޅުކުރުން ކިތަންމެ މިނިވަންކަމާއެކު އޮތަސް ބައިބައިވުން އުފެދި ދެކޮޅުވެރި ވެގެން ނުވާނެ ކަމަށެވެ.މުސްލިމުންނަކީ އެއް އާއިލާއެއްގެ ބައެއް ކަމަށާ އެއް މުސްލިމަކީ އަނެއް މުސްލިމެއްގެ އަޚެއް ނުވަތަ އުޚުތެއްް ކަމަށް ނަބިއްޔާގެ ބަސްފުޅުތަކުން އެނގޭ ކަމުގައެވެ.