ހުއްދަ ނެތި 108 މީހުން މައްކާއަށް ގެންދިއުމަށް މަސައްކަތްކުރި އިތުރު ބަޔަކު ހައްޔަރު؛ ލައްކައަކުން ޖޫރިމަނާ ކުރެވޭނެ

ސައުދީ އަރަބިއްޔާގައި ހައްޖު ހުއްދަ ނެތި 108 މީހުން މައްކާއަށް ގެންދިއުމަށް މަސައްކަތްކުރި 3 މީހުން ހައްޔަރުކޮށްފިއެވެ.

ސައުދީ ނޫސްތަކުން ރިޕޯޓުކުރި ގޮތުގައި، މި މީހުން ވަނީ ބޮޑެތި އުޅަނދުތަކުގެ ސިއްރު ކޮންޕާޓްމަންޓް ތަކުގެ ތެރޭގައި ބިދޭސީން ފޮރުވައިގެން މައްކާއަށް ވެއްދުމަށް މަސައްކަތްކޮށްފައެވެ. މިއީ ހައްޖު ގަވާއިދުތަކާ ޚިލާފު ޢަމަލެކެވެ. މި މައްސަލާގައި ތުހުމަތުކުރެވޭ މީހުން ވަނީ ކަމާބެހޭ އިދާރާތަކަށް ހަވާލުކޮށްފައެވެ.

ދާދިފަހުންވެސް، ހައްޖު ގަވާއިދުތަކާ ޚިލާފުވި 17 މީހަކަށް އަދަބު ދީފައިވެއެވެ. މީގެ ތެރޭގައި ހިމެނެނީ 11 ސައުދީ ރައްޔިތުންނާއި 6 ބިދޭސީންނެވެ. މި މީހުން ހައްޔަރުކޮށްފައިވަނީ ހައްޖު ހުއްދަ ނެތި 54 މީހުން މައްކާއަށް އުފުލަން މަސައްކަތްކުރަނިކޮށެވެ.

މިފަދައިން ވަގަށް ހައްޖަށް މީހުން އެތެރެކުރަން މަސައްކަތްކުރާ މައްސަލާގައި ހިމެނޭ އެންމެނަށް ބޮޑެތި އަދަބުތައް ކަނޑައަޅާފައިވެއެވެ.

މީގެ ތެރޭގައި ޖަލަށްލުމާއި، 100،000 ސައުދީ ރިޔާލަށް ވުރެ ބޮޑުނޫން އަދަދަކުން ޖޫރިމަނާކުރުމާއި، ޤަވާއިދާ ޚިލާފުވި މީހުންގެ މަޢުލޫމާތު ހާމަކުރުން ހިމެނެއެވެ.

މި މައްސަލާގައި ހިމެނޭ ބިދޭސީން އަދަބު ތަންފީޒުކުރުމަށްފަހު ޤައުމުން ބޭރުކޮށް، 10 އަހަރު ވަންދެން ސައުދީ އަރަބިއްޔާއަށް ވަނުން މަނާކުރެވޭނެއެވެ.

ހުއްދަ ނެތި ހައްޖަށް ދިއުމަށް މަސައްކަތްކުރާ ފަރާތްތައް 20،000 ސައުދީ ރިޔާލަށް ވުރެ ބޮޑުނޫން އަދަދަކުން ޖޫރިމަނާކުރެވޭނެއެވެ.

މި މައްސަލާގައި ބޭނުންކުރި އުޅަނދުތައް ހިފެހެއްޓުމަށް ޝަރުޢީ އަމުރަށް އެދިފައިވާ ކަމަށް ވެސް ސައުދީ ނޫސްތަކުން ބުނެފައިވެއެވެ.

ސައުދީން ވަނީ އެންމެހައި ރައްޔިތުންނާއި ބިދޭސީންނަށް ހައްޖު ގަވާއިދުތަކަށް ފުރިހަމައަށް ތަބާވުމަށް އިލްތިމާސްކޮށްފައެވެ. އަދި ހައްޖުވެރިންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި މި ގަވާއިދުތަކަށް ތަބާވުމަކީ ކޮންމެހެން މުހިންމު ކަމެއް ކަމަށް ބުނެފައިވެއެވެ.