ހަތަރު އަހަރަށްފަހުވެސް އިންސާފު ނުލިބި!

އެއީ މީގެ ހަތަރު އަހަރު ކުރިއެވެ. މެންދުރުގެ ކެއުމަށް އިންސާފުކުރުމުގައި މުޅި ގައުމު އަވަދިނެތި އުޅެމުންދެއެވެ. ކޮންމެ މީހަކުމެ، އުފަލާއި ހިތްހަމަޖެހުމުގެ މަންޒިލެއް ހާސިލްކުރުމުގައި މޭޒުމަތިތައް ފަޅުފިލުވަމުންދިޔައެވެ. ކުއްލިއަކަށް މުޅި ގައުމުގެ މައްޗަށް ވެރިވެގަތީ ނާމާން، އަދި ބިރުވެރި ހަބަރެކެވެ. އެ ހަބަރު ކީ މީހެއްގެ ދޫ ބަންދުވި ކަަހަލައެވެ. ފެނުނު މީހެއްގެ ލޯ ކަރުނައިން ފާއްދާލި ކަހަލައެވެ.

އާދެ. ވ.އަތޮޅުގެ ކުޑަ ރަށެއްގައި ވަރަށް އަނިޔާވެރިކޮށް ތުއްތު ކުއްޖަކު މަރާލީއެވެ. ކުށެއްނެތް މައުސޫމް، އެންމެ ދެ އަހަރުގެ ލޯބިލޯބި އިބްތިހާލު މި ދުނިޔެއަށް އަލްވަދާއު ކީއެވެ.

މި ހާދިސާއާއި އެކު މުޅި ގައުމުގެ ލޭ ކެކުނު ހަނދާން، އަދިވެސް ގިނަ ބަޔެއްގެ ހަނދާނުން ނުފިލައެވެ. އިބްތިހާލް އަނިޔާވެރިކަމާއި އެކު މަރާލި ހާދިސާގައި އޭނާ ބަނޑުއަޅައި ވިހެއި މަންމަ، އާފިޔާ ހައްޔަރުކުރުމަކީ ގިނަ ބަޔަކަށް ލިބުނު ކުއްލި ސިހުމެކެވެ. އިންސާނަކު، އޭނާގެ އަމިއްލަ ލެޔާއި މެދު އެހާ އަނިޔާވެރި ވެދާނެކަމަށް އެކަކުގެ ހިތަކަށްވެސް އަރާފައިނުވާތީއެވެ.

އެ މައްސަލައިގައި އާފިޔާ ހައްޔަރުކުރުމާއި އެކު އޭރުގެ މުއައްސަސާތަކާއި ވުޒާރާތަކުގެ އިސްވެރިން ވިދާޅުވީ މި މައްސަލަ ވަރަށް އަވަހަށް ތަހުގީގުކޮށް، އިބްތިހާލްއަށް ލިބެންޖެހޭ އިންސާފު ހޯދައިދޭނެކަމަށެވެ. އެފަދަ ނިޝާންތައް ފެންނަމުންވެސް ދިޔައެވެ. އިބްތިހާލްގެ ދޮންކާފަ އިސްމާއިލް ރައޫފްގެ މައްޗަށް އަމިއްލަ ދަރިއަކަށާއި ދޮންދަރިއަކަށް ޖިންސީ ގޯނާ ކުރި ކަމުގެ ތުހުމަތު ކުރެވި، ދައުވާ އުފުލުނެވެ. ދައުލަތުގެ އިދާރާތަކުގެ މުވައްޒަފުންތަކެއްގެ މައްޗަށް އިހުމާލުވިކަމުގެ ދައުވާ އުފުލުނެވެ.

އެ މައްސަލަތަކުގެ ޝަރީއަތްތައްވެސް ކުރެވުނެވެ. ނަމަވެސް މިއަދު އެ ތުއްތު ކުއްޖާގެ މަރުގެ މައްސަލައަށް ހަތަރު އަހަރު ފުރޭއިރު، އެ ފަރާތްތަކާއި އެ ފަރާތްތަކުގެ މައްޗަށް ކުރެވޭ ތުހުމަތުތައް ވަނީ ނިޒާމްގެ ތެރެއަށް ގެއްލިގެން ގޮސްފައެވެ.

އިބްތިހާލް އަނިޔާވެރިކޮށް މަރާލިކަމަށް ޝަރީއަތުގެ މަޖިލީހުގައި އޭނާގެ މަންމަ އާފިޔާ އެއްބަސްވިއެވެ. އިބްތިހާލަކީ ތިމާ ބަނޑުއަޅައި ވިހެއި ދަރިކަމުގައިވިޔަސް ނަފްރަތުކުރާ ކަމަށާއި، އެއީ ޝަރުއީގޮތުން ބައްޕަނެތް ކުއްޖަކަށް ވާތީކަމަށް ބުންޏެވެ. އިބްތިހާލްއަށް ކުރި އަނިޔާތައް އެއްވެސް ޖެހިލުމެއް ނެތި އާފިޔާ ކިޔައިދެމުން ދިޔައިރު، ކޯޓު ތެރޭ ތިބި ފަރާތްތައް ތިބީ ގިސްލެވޭ ހާލުގައި، ގައިން ހީބިިހި ނަގަމުންދިޔަ ފަދައިންނެވެ.

އޭރުވެސް އާފިޔާގެ ނަފްސާނީ މައްސަލަތަކެއް ހުރިކަމަށް ބައެއް ފަރާތްތަކުން ބުނިއެވެ. އާފިޔާގެ ސައިކޮލޮޖިކަލް އެނެލައިސިސް ހެއްދެވި މަޝްހޫރު ނަފްސާނީ ޑޮކްޓަރ ޑރ. ނާޒު ވިދާޅުވީ އާފިޔާގެ ޓެސްޓްތަކުން ޑިޕްރެޝަނާއި އެންޒައިޓީ ވަރަށް ބޮޑަށް ހުރި ކަން ފާހަގަކުރެވިގެން ގޮސްފައިވާ ކަަމަށެވެ. އެގޮތަށް ދިމާވެފައިވަނީ އާފިޔާ އަށް އެހެން މީހެއްގެ ފަރާތުން ޖިންސީ ގޯނާ ލިބިފައިވާތީ ކަމަށާއި އެފަދަ މައްސަލަތަކުގެ ޝިކާރައަކަށްވާ މީހުންގެ ފަރާތުން ޑިޕްރެޝަނާއި އެންޒައިޓީ ފެންނާނެ ކަމަށްވެސް ނާޒް ޝަރީއަތުގެ މަޖިލީހުގައި ވިދާޅުވިއެވެ.

އެހެނަސް، މި މައްސަލައިގައި އެންމެ ފަހުން ބޭއްވި އަޑުއެހުމުގައި އާފިޔާ ވަނީ އިބްތިހާލް މެރިކަމަށްވި އިއުތިރާފް އަނބުރާ ގެންގޮސްފައެވެ. އާފިޔާ ބުނީ އޭނާ އެއްބަސްވީ ބިރުދައްކައިގެން ކަމަށާއި އެކަން އަންގާފައިނުވަނީ އެމީހުން އެކަން ކުރަނީ މަޖަލަށްކަމަށް ހީކޮށްކަމަށެވެ.

"ޖަލުގެ އޮފިސަރުން އެކި ފަހަރުމަތިން އައިސް ބިރު ދައްކައި ހަދާ. ބުނޭ ހުރިހާ ކަމަކަށް އެއްބަސް ނުވެއްޖިއްޔާ މަރާލާނަމޭ ވެސް. ބައެއް ރޭ ރޭ ނިދިޔަ ވެސް ނުދޭ،" އާފިޔާ ބުންޏެވެ.

އާފިޔާގެ ވާހަކަ އޭގެފަހުން އިވިފައެއް ނެތެވެ. ނިޒާމުގެ ތެރެއަށް އެ އަނިޔާވެރި ގާތިލުވެސް ނިމިގެއްލުނީއެވެ.

ދެން އޮތީ އެ މައްސަލައިގައި ދައުވާކުރި ދައުލަތުގެ މުވައްޒަފުންނެވެ. އެ މައްސަލައިގައި ދައުވާ ކުރި ޖެންޑާގެ މުވައްޒަފުންނާއި، ފުލުހުންގެ އޮފިސަރުގެ ވާހަކަވެސް އޮތީ ނިޒާމުގެ ތެރެއަށް ގެއްލިފައެވެ. އެފަރާތްތަކުން ދައުވާއިން އިންކާރުކުރި ހިސާބުން އެ މައްސަލަވެސް އޮބައި ގޮސްފިއެވެ. އެއަށްފަހު އެ މައްސަލަތަކުގެ އަޑުއެހުމެއް ނެތީއެވެ. ކުށެއް ނެތްނަމަ އެ ކުށުން ބަރީއަވެ، އާންމު ދިރިއުޅުމަކަށް އެނބުރި ދިއުމުގެ ފުރުސަތެއް ނެތެވެ. ކުށުގެ ރެކޯޑްގައި ލައްގަނޑެއް އޮތީތީއެވެ. އެ ފަރާތުން ކުށެއް ކުރިނަމަ، އެ ކުށަށް ލިބެންޖެހޭ ހައްގު އަދަބުވެސް ލިބިފައި ނެތީއެވެ. އިބްތިހާލްއަށް ލިބެންވާ އިންސާފުވެސް ލިބިފައިނެތީއެވެ.

އިބްތިހާލަށް އިންސާފު ލިބޭނެކަމަށްބުނެ ދައުލަތުގެ އިދާރާތަކުން ދެއްކި ވާހަކަތައް އަދިވެސް ދިވެހިންގެ ހިތްތަކުގައި ހަރުލާފައި އެބަހުއްޓެވެ. ނަމަވެސް އެ މަންޒަރު ހަގީގަތުގައިވެސް ލޮލުކޮޅަށް ފެންނާނެނަމަ ހާދަހާ ރަނގަޅެވެ. އިންސާފަކީ ނިޒާމުގެ ތެރެއަށް ގެއްލިގެންގޮސް ހުސްވާންޖެހޭނެ އެއްޗެއް ނޫނެވެ. އިންސާފަކީ މަރުހޫމް އިބްތިހާލުގެ ހައްގެކެވެ. އެހެނަސް ހަތަރު އަހަރުވެގެންދިޔައިރުވެސް ނުލިބި އޮތް ހައްގެކެވެ.

އެ މަރުހޫމްގެ ފުރާނައަށް ސުވަރުގޭގެ ދާއިމީ ނިއުމަތް ދެއްވާށި!