ޕީސީ ގާލްސް ކަޓުވާލުމަށްފަހު ފައިނަލްގެ ދެވަނަ ޖާގަ ސީއައިސީއައިޔޫ އިން ހޯދައިފި

މިހާރު ކުރިއަށްދާ "ސީޕީ ކަޕް ހޭންޑްބޯޅަ ޓޯނަމެންޓް 2025" ގެ އަންހެން ޑިވިޝަން ސެމީ ފައިނަލް ދެވަނަ މެޗުގައި ސެންޓްރަލް އިންވެސްޓިގޭޝަން ކޮމާން އިންވެސްޓިގޭޝަން ޔޫނިއަން (ސީއައިސީއައިޔޫ) އާއި ސީޕީ ގާލްސް ވާދަކުރި މެޗު 13-8 ގެ ނަތީޖާއަކުން ކާމިޔާބުކޮށް ފައިނަލުގެ ދެވަނަ ޖާގަ ސީއައިސީއައިޔޫ އިން ހޯދައިފިއެވެ.

މުބާރާތުގެ ސެމީ ފައިނަލުން ސީއައިސީއައިޔޫ ޖާގަހޯދީ ގުރޫޕް ކުއާޓާ ފައިނަލްގެ ދެވަނަ މެޗުގައި 6-14 ގެ ނަތީޖާއަކުން ކުލަބު އެޗުއާރު ބަލިކުރުމަށްފަހުއެވެ. އަދި ސީޕީ ގާލްސް ސެމީ ފައިނަލުން ޖާގަހޯދީ ކުއާޓާ ފައިނަލްގެ ހަތަރުވަނަ މެޗުގައި 7-1 ގެ ނަތީޖާއަކުން ސެންޓްރަލް އިންވެސްޓިގޭޝަން ކޮމާންޑްސް ކަނބަލުން (ސީއައިސީ ކަނބަލުން) ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި މޮޅަށް ކުޅެ ސީއައިސީއައިޔޫ އިން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ ދެލަނޑުގެ ލީޑަކާއެކު 5-3 ގެ ނަތީޖާއަކުން ސީއައިސީއައިޔޫ ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި އެޓީމުން އިތުރު އަށް ލަނޑު ކާމިޔާބުކުރިއިރު، މިހާފުގައި ސީޕީ ގާލްސް އިން ވެސް ވަނީ އިތުރު ފަސް ލަނޑު ކާމިޔާބުކޮށްފައެވެ.

އެގޮތުން މިމެޗުގައި ސީއައިސީއައިޔޫގެ ފާތުމަތު ލިއުޝާ ހަތް ލަނޑު ކާމިޔާބުކުރިއިރު، އެޓީމުގެ އައިޝަތު ފައިހާ މޫސާ ވަނީ ހަތަރު ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ދެލަނޑު ކާމިޔާބުކޮށްދިނީ ޝިރުހާނާ ހުސެއިން އެވެ.

މީގެ އިތުރުން މިމެޗުގައި ސީޕީ ގާލްސްގެ އަލްޔާ އަހުމަދު ހަތް ލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ ސާރާ މުހައްމަދު ހަމީދު އެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ސީއައިސީއައިޔޫގެ ފާތުމަތު ލިއުޝާ އެވެ.

މުބާރާތުގެ ފައިނަލުގައި މާދަމާ ރޭ ސީއައިސީއައިޔޫ އިން ނުކުންނާނީ ސެމީގެ ފުރަތަމަ މެޗުގައި 6-7 ގެ ނަތީޖާއަކުން އެސްއޯއާރުސީ ހާޓްބީޓް ބަލިކުރި މާލޭ ފްރޮންޓްލައިން ޕޮލިސް (އެމްއެފްޕީ) އާއި ދެކޮޅަށެވެ.

2 ފެބުރުއަރީ 2025 އިން 13 ފެބުރުއަރީ 2025 ގެ ނިޔަލަށް ކުރިއަށް ގެންދާ މިމުބާރާތުގެ އަންހެން ޑިވިޝަނުގައި މިއަހަރު ޖުމްލަ 12 ޓީމަކުން ވާދަކުރިއިރު، މި ޑިވިޝަންގެ މެޗުތައް ކުރިއަށް ގެންގޮސްފައި ވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދި ދެޓީމުގެ އިތުރުން ތިންވަނަ ހޯދި ޓީމުތަކުގެ ތެރެއިން އެންމެ ރަނގަޅު ނަތީޖާއެއް ހޯދި ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.