ރައީސް ޑރ.މުޢިއްޒު ބޭނުންފުޅު ވަނީ ޒިންމާދާރު ރައްޔިތުންގެ މަޖިލީހެއް: ވަޒީރު އިޙްސާން

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ބޭނުންފުޅުވަނީ ޒިންމާދާރު މަޖިލީހެއް ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

މިމަހުގެ 21 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ  ގުރައިދޫ ދާއިރާއަށް ދަ ޑިމޮކްރެޓްސް ޕާޓީން ވާދަކުރައްވާ ކެންޑިޑޭޓް އެ ދައިރާއަށް ވާދަކުރައްވާ ސަރުކާރު ކެންޑިޑޭޓަށް ތާޢީދު ކުރުމާއި ގުޅިގެން ޕީއެންސީން ބޭއްވި ކެމްޕެއިން ޖަލްސާއެއްގައި ވާހަކަފުޅު ދައްކަވަމުން ވަޒީރު އިޙްސާން ވިދާޅުވީ، ވެރިކަން ކުރާ ޕީއެންސީން މަޖިލީހަށް ކުރިމަތިލާފައިވާ ކެންޑިޑޭޓުންނަކީ ސަރުކާރުން އެދޭ ހުރިހާ ގޮތަކަށް ވޯޓުލާން މަޖިލީހަށް ވަޑައިގަންނަވާ ބޭފުޅުންނެއް ނޫން ކަމުގައެވެ.

ސަރުކާރުން ބޭނުންހާ ގޮތަކަށް މެމްބަރުން ވޯޓްލުމުގެ ބަދަލުގައި ރައީސް ޑރ.މުޢިއްޒު ބޭނުންފުޅުވަނީ ޒިންމާދާރު ރައްޔިތުންގެ މަޖިލީހެއް ކަމަށާއި، އެފަދަ މަޖިލީހަކީ ގައުމަށް ރަނގަޅު ހެޔޮ ގޮތްތަކަށް ތަރުހީބުދޭ، ނުރަނގަޅު ގޮތްތަކަށް ނޫނެކޭ ބުނާ ފަރާތްތައް ކަމަށް ވެސް ވަޒީރު އިޙްސާން ވިދާޅުވިއެވެ.

"ޒިންމާދާރު ރައްޔިތުންގެ މަޖިލީހެއް ރައީސުލްޖުމްހޫރިއްޔާ ބޭނުންފުޅުވަނީ. ޒިންމާދާރު ރައްޔިތުންގެ މަޖިލީހަކީ ގައުމަށް ރަނގަޅު ގައުމަށް ހެޔޮގޮތްތަކަށް ތަރުހީބުދޭ، ގައުމަށް ނުރަނގަޅު ގޮތްތަކަށް ނޫނެކޭ ބުނާ ފަރާތްތައް. އެގޮތަށް މިކަން ކުރުން އެއީ އަޅުގަނޑުމެންގެ މެންބަރުންގެ ފަރާތުން އެދޭ އެދުމަކީ. އެއީ އަސްލު ދިވެހި ރާއްޖޭގެ 3 ބާރު ވަކިވެފައި އޮންނަ އަސާސަކީ ނުވަތަ އެ ބޭނުންވާ ގޮތަކީ."

ވަޒީރު އިޙްސާން ވިދާޅުވިއެވެ.

ރައީސް ޑރ.މުޢިއްޒު ވެރިކަމާއި ހަވާލުވެވަޑައިގެންނެވިއިރު، ލިބިވަޑައިގަތީ ފާނަކުރުވަނި ރައްޔިތުންގެ މަޖިލީހެއް ކަން ފާހަގަކުރައްވާ ވަޒީރު އިޙްސާން ވިދާޅުވީ، އެ މަޖިލީހުގެ ތެރެއިން ރާއްޖޭގެ ރައްޔިތުންނަށް ވެވަޑައިގެންނެވި ވައުދުފުޅުތަކާ ކުރެއްވި ހިޔާލުފުޅާ ދެއްވަން ބޭނުންވި ހިދުމަތްތައް ހުރަސްއެޅި މަންޒަރު ފެނިގެން ދިޔަ ކަމަށެވެ.