ރާއްޖެއަށް ގެނައުމަށް މަސައްކަތްކުރާ އީ ގަވަނަންސްގެ އިތުބާރު ސަރުކާރުން ނަގާލައިފި: ޝާހިދު

އައިޑީކާޑު ޔުނިޓުގެ ޑޭޓާބޭސްއިން ވައްކަންކޮށް، ރާއްޖެއަށް ގެނައުމަށް މަސައްކަތްކުރާ އީ ގަވަނަންސްގެ އިތުބާރު ސަރުކާރުން ނަގާލައިފިކަމަށް އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

އެމްޑީޕީން މިރޭ ޕީޓްރަލް ޕާކުގައި ބޭއްވި "ފުދިއްޖެ ފުނޑިއްޖެ" ޖަލްސާގައި ވާހަކަދައްކަވަމުން ޝާހިދު ވިދާޅުވީ، އެސްޓޯނިއާގައި ހުންނަވައިގެން ރައީސް ޑރ.މުހައްމަދު މުއިއްޒު އެޤައުމާ އެއް ފެންވަރަށް އީ ގަވަނަންސް ރާއްޖެއަށް ގެނައުމުގެ ވާހަކަދައްކަވަމުންދާއިރު، ސަރުކާރުން އެ ނިޒާމުގެ އިތުބާރު ރައްޔިތުންގެ ކުރިމަތީގައި ގެއްލުވާލައިފިކަމަށެވެ. ޝާހިދު މިފަދައިން ފާހަގަކުރެއްވީ، ޑިޕާޓްމަންޓް އޮފް ނެޝަނަލް ރަޖިސްޓްރޭޝަންގެ ޑޭޓާބޭސް ތެރެއިން އައިޑީކާޑުތައް ވަގައްނަގައި ޕީއެންސީއަށް މެމްބަރުން ވެއްދި މައްސަލަ ފެންމަތިވުމާ ގުޅިގެންނެވެ.

ޝާހިދު ވިދާޅުވީ އީގަވަނަންސް ނިޒާމަކީ އަޅުގަނޑުމެން އެންމެންގެ މައުލޫމާތުތައް އިންޓަރނެޓްގައި ރައްކާކޮށްފައިވާ ނިޒާމަކަށްވާއިރު، ޤައުމުތަކުންދަނީ އެ ނިޒާމާމެދު އިތުބާރު އުފައްދަމުން ކަމަށެވެ. ޝާހިދު ވިދާޅުވީ އެސްޓޯނިއާގައި ހުންނަވައިގެން އެ ނިޒާމާމެދު ރައްޔިތުންގެ އިތުބާރު އެމަނިކުފާނު ގެއްލުވާލައިފި ކަމަށެވެ. ޝާހިދު ވިދާޅުވީ ދައުލަތުގެ މުއައްސަސާއެއްގެ ތެރޭގައި ހުންނަ ރައްޔިތުންގެ ޒާތީ މައުލޫމާތަކީ ވަގަށް ނަގައިގެން ސަރުކާރު ހިންގާޕާޓީގެ ފައިދާއަށްޓަކައި ބޭނުންކުރެވޭ އެއްޗަކަށް ވާނަމަ އެ އިތުބާރު އެއޮތީ ގެއްލިފައި ކަމަށެވެ.

އެސްޓޯނިއާގައި ހުންނަވައިގެން އެ ނަގާލެއްވީ އަޅުގަނޑުމެން މި ބޭނުންވާ ދުނިޔެ ކުރިއަށްދާން ބޭނުންވާ އީ ގަވަނަންސްގެ އިތުބާރު

ޝާހިދު ވިދާޅުވިއެވެ.

ޝާހިދު ވިދާޅުވީ ޑީއެންއާރުގައި ހުރި މައުލޫމާތުތައް ވަގަށްނަގައިގެން ޕާޓީއަށް މީހުން ވެއްދުމަކީ އާދައިގެ ކުޑަކުޑަ ކަމެއްކަމަށް ދެކިގެން ނުވާނޭކަމަށާއި، މި ދައްކަނީ ދިވެހި ރައްޔިތެއްގެ ޝަހްސު ވަގަށްނަގައިގެން ގޮސް ބޭނުންހާ ގޮތެއް ހަދަމުންދާ ގޮތުގެ ވާހަކަ ކަމަށެވެ.

އައިޑީކާޑު ޔުނިޓުން ޑޭޓާތަކެއް ބޭނުންކޮށްގެން ވެރިކަންކުރާ ޕީއެންސީއަށް މެމްބަރުންތަކެއް އޮޅުވާލައިގެން ވެއްދި މައްސަލަ އެމްޑީޕީން މިއަދު ވަނީ ކަމާބެހޭ އިދާރާތަކަށް ހުށަހަޅާފައެވެ. މިކަމާ ގުޅޭގޮތުން އެމްޑީޕީން ބުނީ، ރައްޔިތުންގެ ޒާތީ މައުލޫމާތުން ވައްކަންކޮށް، ވަގު ފޯމު ފުރައިގެން ސަރުކާރު ހިންގާ ޕީއެންސީއަށް ވެއްދި މައްސަލާގައި ހިމެނޭ ޖިނާއީ ކުށްތައް ތަހުގީގު ކުރުމަށް ފުލުހުންނާއި އޭސީސީއަށް ހުށަހަޅާފައިވާކަމަށެވެ. މީގެ އިތުރުން، ޕީއެންސީން ހުށަހެޅި އެއްވެސް ފޯމެއް ޕްރޮސެސް ނުކުރުމަށާއި، ޕްރޮސެސް ކުރި ފޯމުތައް ކެންސަލްކޮށް، އެ ފޯމުތަކުގެ ސައްހަކަން އަލުން ކަށަވަރުކުރުމަށް އެދި އިލެކްޝަންސް ކޮމިޝަނަށް ވެސް ސިޓީއެއް ފޮނުވާފައިވާނޭކަމަށް އެމްޑީޕީން ބުންޏެވެ.

އޮޅުވާލައިގެން ޕީއެންސީއަށް މީހުން ވެއްދުމުގެ މައްސަލަތަކެއް ފެންމަތިވެފައިވާއިރު، ވެއްދި މީހުންގެ ތެރޭގައި އެމްޑީޕީއަށް ނިސްބަތްވެ ވަޑައިގަންނަވާ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ހިމެނެއެވެ.