އިހަވަންދޫގައި ޤާއިމްކުރާ ފިޝަރީޒް ކޮމްޕްލެކްސްގެ އަމަލީ މަސައްކަތް މެއިމަހުގެ ތެރޭގައި ފަށާނެ: ރައީސް ޑރ.މުއިއްޒު

ހއ.އިހަވަންދޫގައި ޤާއިމްކުރާ ފިޝަރީޒް ކޮމްޕްލެކްސްގެ އަމަލީ މަސައްކަތް އަންނަ މެއިމަހުގެ ތެރޭގައި ފަށާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އިހަވަންދޫގައި މިއަދު ވަނީ އެރަށުގައި ޤާއިމްކުރުމަށް ނިންމި ފިޝަރީޒް ކޮމްޕްލެކްސްގެ ބިންގާ އަޅާފައެވެ. އެކަމަށްޓަކައި އެރަށުގައި މިއަދު ބޭއްވި ރަސްމިއްޔާތެއްގައި ފިޝަރީޒް ކޮމްޕްލެކްސްގެ ބިންގާ އަޅުއްވައިދެއްވީ މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމެވެ.

އިހަވަންދޫގައި ޤާއިމްކުރާ މި ފިޝަރީޒް ކޮމްޕްލެކްސް އާ ގުޅޭގޮތުން އެރަށު ރައްޔިތުންނާ ބައްދަލުކުރައްވައި ރައީސް ޑރ.މުހައްމަދު މުއިއްޒު ވިދާޅުވީ، އިދާރީ އަދި ފަންނީ މަސައްކަތްތައް ކުރިއަށްގެންދިއުމަށްފަހު އެތަނުގެ އަމަލީ މަސައްކަތް މެއިމަހުގެ ތެރޭގައި ފެށިގެންދާނޭ ކަމަށެވެ. ރައީސް ވިދާޅުވީ އިހަވަންދޫގައި ޤާއިމްކުރާ ފިޝަރީޒް ކޮމްޕްލެކްސްއަކީ ވަރަށްގިނަ ބައިބައި ހިމެނޭ ތަނެއް ކަމަށާއި، މިގޮތުން އެތަނުގައި 1،000 ޓަނުގެ ކޯލްޑް ސްޓޯރޭޖަކާއި، 50 ޓަނުގެ ބްރައިން ފްރީޒިން ފެސިލިޓީއެއްގެ އިތުރުން އެކަށީގެންވާ މަގަތު ފާލަމެއްގެ އިތުރުންވެސް އިތުރު ކަންކަން ކުރެވޭނޭ ވަސީލަތްތައް ހިމެނޭނޭ ކަމަށެވެ.

ރައީސް ވިދާޅުވީ އަމާޒަކީ މަސައްކަތް ފަށާތާ 18 މަސްދުވަހުގެ ތެރޭގައި ފިޝަރީޒް ކޮމްޕްލެކްސްގެ މަސައްކަތް އެއްކޮށް ނިންމާލުންކަމަށެވެ.

އިހަވަންދޫގައި ޤާއިމްކުރާ ފިޝަރީޒް ކޮމްޕްލެކްސްއަކީ 474 މިލިއަން ރުފިޔާގެ މަޝްރޫޢުއެކެވެ. މި ފިޝަރީޒް ކޮމްޕްލެކްސް މަޝްރޫޢުގެ ތެރޭގައި އަގު ކަނޑައަޅާފައިވަނީ ބަނދަރަކާއެކުގައެވެ. ބަނދަރުގެ އަގަކީ 58 މިލިއަން ރުފިޔާއެވެ. މި ފިޝަރީޒް ކޮމްލެކްސް މަޝްރޫޢު ނިމުމުން އެތަނުގައި ކޯލްޑް ސްޓޯރޭޖާއި، ބްރައިން ފްރީޒިން ފެސިލިޓީގެ އިތުރުން އޮފީސް އިމާރާތަކާ އިންޖީނުގެއެއްގެ އިތުރުން ވެހިކަލް ވަރކްޝޮޕަކާއި ގުދަނެއްވެސް ހުންނާނެއެވެ. މިއީ އިސްލާމިކް ޑިވަލޮޕްމެންޓް ބޭންކުގެ އެހީގައި ކުރިއަށްގެންދާ މަޝްރޫޢުއެކެވެ.