ކުންފުންޏާބެހޭ ގާނޫނަށް ގެނައި އިސްލާހު ތަސްދީގު ކުރައްވައިފި

ކުންފުނިތަކުގެ ބޯޑަށް މެނޭޖިން ޑިރެކްޓަރުންނާއި ޑިރެކްޓަރުން އައްޔަންކުރުމުގެ މުއްދަތު ކުރުކުރުމަށް ކުންފުންޏާބެހޭ ގާނޫނަށް ގެނެވުނު އިސްލާހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ތަސްދީގުކުރައްވައިފިއެވެ.

މި ބިލް ރައްޔިތުންގެ މަޖިލީހުން ފާސްކޮށްފައިވަނީ އިއްޔެ ބޭއްވުނު ޖަލްސާގައި، ވޯޓުގައި ބައިވެރިވި 85 މެންބަރުންގެ އިއްތިފާގުންނެވެ.

މި އިސްލާހާ އެކު، ކުންފުނިތަކުގެ މެނޭޖިން ޑިރެކްޓަރުންނާއި ޑިރެކްޓަރުންގެ މަގާމު ހުސްވުމުން އައު މީހުން އައްޔަންކުރުމުގެ މުއްދަތު 30 ދުވަހުން 10 ދުވަހަށް ކުރުކުރެވިފައިވެއެވެ. މީގެ އިތުރުން، ކުންފުނިތަކުގެ އާންމު ޖަލްސާގެ ނޯޓިސް ފޮނުވުމުގެ މުއްދަތު 21 ދުވަހުން 3 ދުވަހަށް ކުރުކުރެވިފައިވާއިރު، ޚާއްޞަ އާންމު ޖަލްސާގެ ނޯޓިސް ފޮނުވުމުގެ މުއްދަތު 14 ދުވަހުން 7 ދުވަހަށް ކުރުކުރެވިފައިވެއެވެ.

މި ބިލް ފާސްކުރެވިފައިވަނީ އެއްވެސް ބަދަލެއް ގެނައުމަކާ ނުލައި، ސަރުކާރުން ހުށަހެޅި ގޮތަށެވެ. ބިލް ދިރާސާކުރުމަށް ފޮނުވުނު އިގްތިޞާދީ ކޮމިޓީން ވެސް ބިލް ފާސްކޮށްފައިވަނީ އެންމެ 10 މިނެޓުގެ ތެރޭގައި، އިތުރު އެއްވެސް ބަދަލެއް ގެނައުމަކާ ނުލައެވެ.

މި އިސްލާހުގެ ސަބަބުން ކުންފުނިތަކުގެ ހިންގުން އަވަސްވެ، ހަރުދަނާވެގެންދާނެ ކަމަށް ބެލެވެއެވެ. ނަމަވެސް، ބައެއް ފަރާތްތަކުން ވަނީ މި ބަދަލުތައް ގެނައުމުގައި އަވަސްއަރުވާލައިފައިވާ ކަމަށް ބުނެ ފާޑުކިޔާފައެވެ.