ގޯތީގެ މައްސަލައާއި ގުޅޭ އެއްވެސް މައުލޫމާތެއް އެނގޭނަމަ ހިއްސާކުރަން އެދިއްޖެ

"ގެދޮރުވެރިޔާ" އަދި "ބިންވެރިޔާ" ސްކީމްގެ މައްސަލައާއި ގުޅޭ އެއްވެސް މައުލޫމާތެއް އެނގޭނަމަ ހިއްސާކުރަން ދިވެހި ފުލުހުންގެ ޚިދުމަތުން އެދެފިއެވެ.

ފުލުހުން އެކްސްގައި ކުރެއްވި ޕޯސްޓެއްގައި ވިދާޅުވީ، މި މައްސަލައިގެ ތަހުގީގުގަށް ބޭނުންކުރެވިދާނެ ކަމަށް ބެލެވޭ އެއްވެސް މައުލޫމާތެއް ނުވަތަ ހެކީގެ ގޮތުގައި ބޭނުންކުރެވިދާނެ އެއްވެސް ލިޔުމެއް އޮތްނަމަ ޕޯޓަލް މެދުވެރިކޮށް ހިއްސާކުރުމަށް އެދޭކަމަށެވެ.

ފުލުހުން ބުނީ، މައުލޫމާތު ހިއްސާކުރާއިރު، އަމިއްލަ މައުލޫމާތު ހާމަނުކޮށް ނުވަތަ ތަހުގީގު ކުރާ ފަރާތްތަކުން ގުޅަން ބޭނުންވެއްޖެ ހާލަތުގައި ގުޅޭނެ މައުލޫމާތާއެކުވެސް ހިއްސާކުރެވިދާނެކަމަށާއި، މައުލޫމާތު ހިއްސާކުރާ ފަރާތްތަކުގެ ސިއްރުކަން ހިފަހައްޓާނެ ކަމުގެ ޔަގީންކަންދޭކަމަށެވެ.

މި މައްސަލައާއި ގުޅިގެން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ  ޗެއާމަން އަހްމަދު ނާސިފް ފިޔަވައި ޑިރެކްޓަރުންގެ ބޯޑު މެންބަރުން ސަސްޕެންޑްކޮށްފައިވާއިރު،  އެމްޑަބްލިޔުއެސްސީގެ ޑެޕިޔުޓީ މެނޭޖިން ޑިރެކްޓަރ މުޙައްމަދު ފަޒީލް ރަޝީދުވެސް ވަނީ ސަސްޕެންޑްކޮށްފައެވެ.

މައްސަލައާއި ގުޅޭ ޖިނާއީ ތަހުގީގެއް ހިންގުމަށް ޕްރޮސެކިއުޓަރ ޖެނެރަލް (ޕީޖީ) އައްބާސްް ޝަރީފް ފުލުހުންގެ މައްޗަށް އަމުރުކޮށްފައިވާއިރު، ބިންވެރިޔާ ސްކީމާއި ގުޅިގެން ކުރިއަށްދާ ތަހުގީގަށް އެއްބާރުލުން ދިނުމަށާއި ސަރުކާރުގެ ސިޔާސަތުތައް ނުހުއްޓި ކުރިއަށްގެންދިޔުމަށް ފުރުސަތު ދެއްވުމަށްކަމަށް ވިދާޅުވެ، އެޗްޑީސީގެ މެނޭޖިން ޑިރެކްޓަރ ފަޒުލް ރަޝީދު ވަނީ ރޭގައި އެމަގާމުން އިސްތިއުފާ ދެއްވާފައެވެ.