ސާފް ޗެމްޕިއަންޝިޕަށް އިންޑިއާގެ ސީނިއާ ސްކޮޑު ނުފޮނުވުމަށް ނިންމައިފި

ނޮވެމްބަރު މަހު ބަންގްލަދޭޝްގައި އޮންނަ ސާފް ޗެމްޕިއަންޝިޕުގައި އިންޑިއާ ތަމްސީލުކުރާނީ 23 އަހަރުން ދަށުގެ ޓީމު ނުވަތަ ރިޒާވް ސްކޮޑެއް ކަމަށް ރިޕޯޓުތައް ބުނެފިއެވެ.

ސާފް ޗެމްޕިއަންޝިޕް ކުޅުމަށް ހަމަޖެހިފައިވާ މުއްދަތުގައި އަންނަ ނޮވެމްބަރު މަހުގެ 12 އަދި 15 ވަނަ ދުވަހު ސީނިއާ ޓީމުން ނިއުޒިލެންޑާ ދެކޮޅަށް ދެ އެކުވެރިކަމުގެ މެޗު ކުޅުމަށް ހަމަޖެހިފައިވާ ކަމަށް އިންޑިއާގެ ނޫސްތަކުން ވަނީ ރިޕޯޓްކޮށްފައެވެ. އޭއައިއެފްއެފްގެ އިސް އޮފިޝަލަކާ ހަވާލާދީ ބައެއް މީޑިއާތަކުން ބުނެފައިވަނީ، ސަރަޙައްދީ މުބާރާތެއްގައި ވާދަކުރުމަށްވުރެ މި ސަރަޙައްދުގެ ޤައުމުތަކަށްވުރެ ފެންވަރު ރަނގަޅު ޓީމަކާ ދެކޮޅަށް ކުޅުމުން އިންޑިއާގެ ފުޓުބޯޅައަށް ލިބޭ ފައިދާ ބޮޑުވާނެ ކަމަށެވެ.

ސާފް ޗެމްޕިއަންޝިޕަށް ޒުވާން ޓީމު ފޮނުވުމަކީ އިންޑިއާއިން އަލަށް ކުރަން ނިންމި ކަމެއް ނޫނެވެ. 2009 ވަނަ އަހަރާއި 2018 ވަނަ އަހަރު ވެސް އެ ޤައުމުން ޒުވާން ޓީމު ފޮނުވިއެވެ.

އެ ދެ ފަހަރު ވެސް ފައިނަލުގައި ރާއްޖެއާ ބައްދަލުކުރިއިރު 2009 ގައި ޕެނެލްޓީ ޝޫޓްއައުޓުގައި އިންޑިއާ މޮޅުވިއެވެ. ނަމަވެސް 2018 ގެ ވަނަ އަހަރުގެ ފައިނަލުގައި ރާއްޖެއިން ވަނީ އިންޑިއާ ބަލިކޮށް ޗެމްޕިއަންކަން ހޯދާފައެވެ.

މިފަހަރުގެ މުބާރާތުގައި ރާއްޖެއާއި އިންޑިއާ އަދި ޕާކިސްތާނު ހިމެނެނީ ގްރޫޕް ބީގައެވެ. ގްރޫޕް އޭގައި ވާދަކުރާނީ މުބާރާތް ބާއްވާ ބަންގްލަދޭޝް އާއި ބޫޓާން އަދި ސްރީލަންކާއެވެ.

ދުރު ރާސްތާ ޕްލޭނެއްގެ ދަށުން ފެންވަރު ރަނގަޅު ޓީމުތަކާ ކުޅެން އިންޑިއާއިން އަންނަނީ މަސައްކަތްކުރަމުންނެވެ. މި ބައިނަލްއަޤުވާމީ ބްރޭކުގައި އެ ޓީމުން ޕެނަމާއާ ދެކޮޅަށް 1-1 އިން އެއްވަރުކޮށްފައިވާއިރު އަންނަ މަހުގެ ތިންވަނަ ދުވަހު ދުނިޔޭގެ ފަސްވަނައިގައި އޮތް ބްރެޒިލްއާ އަދި ހަވަނަ ދުވަހު އުރުގުއޭއިއާ ދެކޮޅަށް ވެސް ކުޅުމަށް ވަނީ ތާވަލުކޮށްފައެވެ.