އިބްރާހިމް މުހައްމަދު ސާލިހް އިންތިޚާބު ކާމިޔާބު ކުރައްވައިފި

އާދިއްތަ ދުވަހު ރާއްޖޭގައި ބޭއްވި ރިޔާސީ އިންތިޚާބު އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހް ކާމިޔާބު ކުރައްވައިފިއެވެ. އިބްރާހިމް މުހައްމަދު ސާލިހް ( އިބޫ ) އިންތިޚާބު ކާމިޔާބު ކުރައްވާފައިވަނީ ނަތީޖާ އިއުލާންކުރަންފެށީއްސުރެ ކުރީގައި އޮވެ ވޯޓްގެ 58 ޕަސެންޓް ކާމިޔާބު ކުރައްވައިގެންނެވެ. މިއީ ރާއްޖޭގައި ޑިމޮކްރަސީ 2008 ވަނަ އަހަރު ތައާރަފްކުރީއްސުރެ މިހާނަތަށް ކެންޑިޑޭޓަކު ހޯއްދެވި އެންމެ ބޮޑު ކާމިޔާބެވެ. އެންމެ އާދަޔާއި ޚިލާފް ނަތީޖާއަކީ ކުރިން ޕީޕީއެމްގެ ޖަގަހަތައް ކަމުގައި އޮތް އަތޮޅު އަތޮޅާއި ރަށްރަށް އެމްޑީޕީގެ ރީނދޫކުލައިން ފުރާލުމެވެ. ރައީސް އަބްދުﷲ ޔާމީނަށް ރައްޔިތުންގެ ތާއީދު ލިބިވަޑައިގެންނެވީ ހަމައެކަނި މީމު އަތޮޅާއި ފާފު އަތޮޅުންނެވެ. މިނަތީޖާއަކީ ރައީސް އަބްދުﷲ ޔާމީން އެއްގޮތަކަށްވެސް ޚިޔާލުފުޅު ކުރައްވާފައިވާނެ ނަތީޖާއަކަށް ނުވާނެއެވެ. އެއީ ވޭތުވެދިޔަ ފަސް އަހަރުދުވަހުގެތެރޭގައި އެމަނިކުފާނުގެ ވެރިކަމުގައި ރާއްޖޭގެ އެއްވެސް ރައީސަކު ހިންގާފައިނުވާފަދަ ގިނަ ތަރައްގީގެ މަޝްރޫއުތަކާއި ބޮޑެތި އިންފްރާންސްޓްރަކްޗަރ މަޝްރޫއުތައް ހިންގާފައިވުމުން ރައްޔިތުން ތަރައްގީއަށް ވޯޓްދެއްވާނެކަމަށް ހީފުޅު ކުރެއްވިފައި އޮތުމެވެ. އެމަނިކުފާނަށް ފިކުރުފުޅު ހިންގަވާލެއްވިފައި ނުވަނީ އަނބިކަނބަލުން މެޑަމްފާތުންގެ އިރުޝާދުގެ ދަށުން ރަށު ކައުންސިލްތަކުގެ އިންތިޚާބުގައި ބޮޑު ފެއިލްވުމަކުން ފެއިލްވެފައިވުމާއެކުވެސް ރިޔާސީ އިންތިޚާބުފަދަ ސީރިއަސް އިންތިޚާބެއް އެކަމަނާ ވިލަރެސްކުރައްވަން ދޫކޮށްލައްވައިގެން ނުކުމެދާނެ ނަތީޖާއެކެވެ. ޕީޕީއެމްގެ ގިނަ ރަށްރަށުގައި ޕާޓީގެތެރޭގައި އުފެދިފައި އޮތް ބައިބައިވުން އެއީ އެންމެ ބޮޑު މުސީބާތެވެ.

ރައީސް އަބްދުﷲ ޔާމީންގެ މައްޗަށް އިބްރާހިމް މުހައްމަދު ސާލިހް ތިރީސް ހާހަށްވުރެ ގިނަ ވޯޓުން ކުރި ހޯއްދެވިއެވެ.