އެސްއޭޕީ: ރާއްޖޭގެ ހުރިހާ ސްކޫލެއް އެއް ދަންފަޅިއަށް ބަދަލުކުރަނީ
ދިވެހިރާއްޖޭގެ ހުރިހާ ސްކޫލެއް އެއް ދަންފަޅިއަށް ހިންގާ ސްކޫލްތަކަކަށް ހެދުމަށް ސަރުކާރުން އަމާޒުހިފައިފިއެވެ.
މިކަން ވަނީ ސަރުކާރުން ރޭ އާންމުކުރި ކުރިއަށް އޮތް ފަސްއަހަރުގެ ސްޓްރެޓަޖިކް އެކްޝަން ޕްލޭންގައި ހިމަނާފައެވެ.
މި ޕްްލޭންގައިވާ ގޮތުގައި 2023ވަނަ އަހަރުގެ ކުރިން ސަރުކާރުގެ ހުރިހާ ސްކޫލްތަކަކީ އެއް ދަންފަޅިއަކަށް ކިޔަވައިދޭ ސްކޫލްތަކަކަށް ހެދޭނެއެވެ. އަދި މި ސްކޫލްތަކުގައި ކުދިންނާއި ރައްޓެހި އައިސީޓީގެ ވަސީލަތްތައް ގާއިމްކުރެވި، ސައިކޯ ސޯޝަލް ސަޕޯޓް ދިނުމަށް ތަމްރީން ކުރެވިފައި ތިބި ކައުންސިލަރުން ތިބޭނެއެވެ.
މި ޕްލޭންގައި ވަނީ ޚާއްސަ އެހީއަށް ބޭނުންވާ ކުދިންނަށްވެސް ޚާއްސަ ކަންތައްތަކެއް ހިމަނާފައެވެ. އެގޮތުން ސްޕެޝަލް އެޑިއުކޭޝަން ނީޑްސް ހުންނަ ކުދިންގެ 100% އަށް ތައުލީމް ފޯރުކޮށްދިނުމުގެ ޕްރޮގްރާމްގެ ދަށުން އެކަން ކުރުމަށްވެސް ވަނީ ނިންމާފައެވެ.
ސްޓްރެޓަޖިކް އެކްޝަން ޕްލޭންގައި ވަނީ މަތީ ތައުލީމުގެ ދާއިރާއިންވެސް ބޮޑެތި ކަންތައްތަކެއް ކުރުމަށް އަމާޒު ހިފާފައެވެ.
އެގޮތުން ބަލާލާއިރު، ފުރަތަމަ ޑިގްރީއަށް ހިލޭ ކިޔެވުމުގެ ސްކީމްގެ ދަށުން 25،000 ފަރާތަކަށް ޑިގްރީ ކިޔެވުމުގެ ފުރުސަތުދިނުމާއި، ފަސް ސަރަހައްދެއްގައި މަތީ ތައުލީމުދޭ މަރުކަޒުތަކާއި ޖޫނިޔާ ކޮލެޖްތައް ގާއިމްކޮށްފައިވުން ވަނީ ހިމަނާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
