އެމިރޭޓްސްގައި ދިރިއުޅުއްވާ ދިވެހީންނަކީ ވަރަށް ތަފާތު ބޭފުޅުންތަކެއް: ރައީސް ޞާލިހް

ބޭރު ޤައުމުތަކުގައި ދިރިއުޅުއްވަމުން ގެންދަވާ ދިވެހިންނާ އަޅައިބަލާއިރު، އެމިރޭޓްސްގައި ދިރިއުޅުއްވާ ދިވެހީންނަކީ ވަރަށް ތަފާތު އަދި އެހާމެ ޚާއްޞަ ބޭފުޅުންތަކެއްކަމުގައި ރައީސުލްޖުމްހޫރީޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ޔޫ.އޭ.އީ އަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އެ ޤައުމުގައި ދިރިއުޅެމުންދާ ދިވެހިންނާ ރޭ ބައްދަލުކުރައްވައި ވާހަކަފުޅު ދައްކަވަމުންނެވެ.

"އަޅުގަނޑަށް އެނގިފައި އޮތް ގޮތުންނަމަ، ބޭރު ޤައުމުތަކުގައި ދިރިއުޅުއްވަމުން ގެންދަވާ ދިވެހިންނާ އަޅައިބަލާއިރު، އެމިރޭޓްސްގައި ދިރިއުޅުއްވާ ދިވެހީންނަކީ ވަރަށް ތަފާތު ބޭފުޅުންތަކެއް. އަދި އެހާމެ ޚާއްޞަ ބޭފުޅުންތަކެއްވެސްމެ." ރައީސް ޞާލިހް ވިދާޅުވިއެވެ.

ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އޭވިއޭޝަން ދާއިރާގެ އެކިއެކި ވަޒީފާތަކުގެ އިތުރުން މުދާ އެކްސްޕޯޓް ކުރުމުގައާއި، ރިޒޯޓް ވަޒީފާތަކުގައާއި، ތައުލީމީ ދާއިރާގައާއި، ފައިވްސްޓާރ ހޮޓާތަކުގައި ވަޒީފާއަދާކުރާ ގިނަ އަދަދެއްގެ ދިވެހިން ޔޫ.އޭ.އީ ގައި ދިރިއުޅެމުން ގެންދާކަން ފާހަގަ ކުރެއްވިއެވެ. އަދި ބައިނަލްއަޤްވާމީ މިފަދަ ވަޒީފާތަކުގައި ހަރަކާތްތެރި ވުމަށްޓަކައި ބޭނުންވަނީ ކެރުމާއި ހިތްވަރާއެކު ގަދައަޅައި މަސައްކަތް ކުރުން ކަމުގައިވެސް އެމަނިކުފާނު ވިދާޅުވިއެވެ.

"އެންމެ ގިނައިން ދިވެހިން ބޭރު ޤައުމުތަކަށް ގޮސް އުޅެނީ، ބޭސްފަރުވާގެ ކަންކަމަށާއި، ދަރީންނަށް ތަޢުލީމު ހޯދައިދިނުމަށް. އަދި ވިޔަފާރިއާ ގުޅޭ އެކި ކަންކަމުގައި. މިއާ ޚިލާފަށް ތިބޭފުޅުންގެ ތެރޭގައި ގިނައިން ތިއްބެވީ، ތަފާތު ފަންނީ ދާއިރާތަކުގައި މި ޤައުމުގައި ވަޒީފާ އަދާކުރައްވާ ބޭފުޅުންނާއި އެބޭފުޅުންގެ ޢާއިލާތައް.ތިޔަބޭފުޅުންގެ ތެރޭގައި އޭވިއޭޝަން ދާއިރާގެ ތަފާތު ހުނަރުވެރިން އެބަތިއްބެވި. އޭގެ ތެރޭގައި އިއްތިހާދު އެއަރވޭޒް، ފުލައި ދުބާއީ އަދި އެމިރޭޓްސް ފަދަ ނަން މަޝްހޫރު އެއަރލައިންތަކުގައި މަސައްކަތް ކުރައްވާ ޕައިލެޓުން އެބަ ތިއްބެވި. އެއަރ ކްރާފްޓް އިންޖިނޭރުންނާއި މެކޭނިކުންވެސް އެބަތިއްބެވި." ރައީސް ޞާލިހް ވިދާޅުވިއެވެ.

ރޭގެ ހަފުލާގައި ވާހަކަފުޅު ދައްކަވަމުން، ދިވެހިރާއްޖޭގެ ޚާރިޖީ ސިޔާސަތުގެ މައްޗަށް އަލިއަޅުއްވައިލެއްވިއެވެ. މި ރޮނގުން ވާހަކަފުޅު ކުރިއަށް ގެންދަވަމުން، އެމަނިކުފާނު ރައީސުލްޖުމްހޫރިއްޔާ ކަމުގެ މަޤާމާ ޙަވާލުވެވަޑައިގެންނެވިއިރު، ބައިނަލްއަޤްވާމީ މުޖްތަމަޢުގައި ރާއްޖެ އޮތީ ވަރަށް ބޮޑަށް އެކަހެރިވެ ބާކީވެފައި ކަމުގައި ވިދާޅުވިއެވެ. އެހެންނަމަވެސް، މި ސަރުކާރުގެ ސިޔާސަތަކީ ޤާނޫނީ ހަމަތަކާއި ބައިނަލްއަޤްވާމީ މުޢާހަދާތަކާއި، ހަމަޔާއި އިންޞާފަށް ބޯލަނބާ ކޮންމެ ޤައުމަކާއެކު ގުޅުން ދެމެހެއްޓުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.

މިމޭރުމުން ވާހަކަފުޅު ދައްކަވަމުން، އެމިރޭޓްސް ސަރުކާރުން ރާއްޖެއާމެދު ދެކެނީ، ވަރަށް ގާތް އެއްބަނޑުއެއްބަފާ ޤައުމެއްގެ ގޮތުގައި ކަމުގައި ބަޔާން ކުރައްވައި، މި މަހުގެ ފުރަތަމަ ދުވަހުން ފެށިގެން، ދިވެހީންނަށް 30 ދުވަހުގެ އޮންއެރައިވަލް ވިސާ ހަމަޖައްސަވައިދެއްވިކަމީ، އެކަމުގެ ހެތްކެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި ޤަލްފުގެ އެހެން ޤައުމުތަކުންވެސް އެ ލުއިފަސޭހަކަން ލިބޭތޯ ސަރުކާރުން މަސައްކަތް ކުރައްވަމުން ގެންދަވާ ކަމުގައި އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ މިދަތުރުފުޅަކީ ޔޫ.އޭ.އީގެ ވަލީއަހުދު އަދި ޑެޕިއުޓީ ސުޕްރީމް ކޮމާންޑަރ އޮފް އާމްޑް ފޯސަސް، ހިޒް ހައިނެސް މުޙައްމަދު ބިން ޒައިދު އަލް ނަޙްޔާންގެ ދަޢުވަތަކަށް، "ޒައިދު ސަސްޓެއިނަބިލިޓީ އެވޯޑްސް" އަދި "އިނޯގްރޭޝަން އޮފް ދަ އަބޫދާބީ ސަސްޓެއިނަބިލިޓީ ވީކް" ޙަފްލާގައި ބައިވެރިވެވަޑައިގަތުމަށްޓަކައި އެޤައުމަށް ކުރަށްވަމުންގެންދަވާ ދަތުރުފުޅެކެވެ.