ރައީސުލްޖުމްހޫރިއްޔާ ރަށަކަށް ވަޢުދެއް ވެވަޑައިގެންފައިވާ ނަމަ އެ ވަޢުދެއް ފުއްދަވާނެ: ވަޒީރު ޠާރިޤު
ލިޔުންތެރިޔާ
ޚަދީޖާ އަރުފާ
ރައީސުލްޖުމްހޫރިއްޔާ ޑރ މުހައްމަދު މުޢިއްޒު ރަށަކަށް ވަޢުދެއް ވެވަޑައިގެންފައިވާ ނަމަ، އެ ވަޢުދެއް ފުއްދަވާނެ ކަމަށް ތިމާވެއްޓާ ބެހޭ ވަޒީރު ޠާރިޤު އިބްރާޙީމް ވިދާޅުވެއްޖެއެވެ.
ވަޒީރު މިހެން ވިދާޅުވެފައި ވަނީ، ރައްޔިތުންގެ މަޖިލީހުގެ މިއަދުގެ ޖަލްސާގައި، ކެންދޫ ދާއިރާގެ މެމްބަރު މައުރޫފް ޒާކިރު ކުރެއްވި ސުވާލަކަށް ޖަވާބު ދެއްވަމުންނެވެ.
އެގޮތުން މައުރޫފް ޒާކިރު ވަނީ، ބ. ކުޑަރިކިލު އަދި ބ. ކިހާދޫގެ އިންޖީނުގެ ނެޓްވޯކް ބަދަލުކޮށް އާ އިންޖީނުގެ އަޅައިދިނުމާއި، އަދި ކުޑަރިކިލު ގައި 400 ވޮޓް ގެ ޖަނަރޭޓަރެއް ބަހައްޓައިދިނުމަކީ ރައީސް މުޢިއްޒުގެ ވަޢުދެއްކަން ފާހަގަކުރައްވައި، މައުރޫފް ވަނީ އެ މަސައްކަތް ނިމޭނެ އިރަކާއި ގުޅޭގޮތުން ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން ޠާރިގު ވިދާޅުވީ، އެއީ ރައީސްގެ ވައުދުފުޅެއް ނަމަ، އެ ވައުދު ފުއްދަވާނެ ކަމަށެވެ.
ރައީސުލްޖުމްހޫރިއްޔާ ވަޢުދެއް ވެވަޑައިގެންފައި އޮތިއްޔާ އެ ވަޢުދެއް އެ ރަށަކަށް ފުއްދަވައި ދެއްވާނެ
ވަޒީރު ޠާރިގު
މީގެ އިތުރުންވެސް މިއަދުގެ މަޖިލީހުގެ ޖަލްސާގައި ވަޒީރު ތޯރިގް ވަނީ، ރަށްރަށުގެ ކަރަންޓަށް މައްސަލަތައް ދިމާވަނީ ރަނގަޅަށް އެ ކަން ނުކުރެވި ހުރުމުން ކަމަށާއި ފެނަކައިން އެ މައްސަލަތައް ހައްލު ކުރުމަށް މަސައްކަތް ކުރަމުން އަންނަަ ކަމަށް ވިދާޅުވެފައެވެ.
މިގޮތުން، އެ ރަށްތަކުގެ ކޮންޓްރެކްޓު ބަދަލުކޮށްގެން ނުވަތަ ކުރީގެ ކޮންޓްރެކްޓަރާ ގުޅިގެން ވިޔަސް އެ މަޝްރޫއުތައް އަވަސް ކުރުމަށް ފެނަކައިން މަސައްކަތް ކުރަމުން އަންނަ ކަމަށް ތޯރިގް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
