އިންޑިއާގެ ބޮޑުވަޒީރު ނަރެންދްރަ މޯދީ، ސީޝެލްސް އަށް

އިންޑިއާގެ ބޮޑުވަޒީރު ނަރެންދުރަ މޯދީ، ސީޝެލްސްގެ ރައީސް ޑރ. ޕެޓްރިކް ހަރމިނީގެ ދަޢުވަތަކަށް އެޤައުމަށް ކުރައްވާ ރަސްމީ ދަތުރުފުޅެއް މާދަމާ ފައްޓަވާނެއެވެ. ތިން ދުވަހުގެ މުއްދަތަށް ކުރައްވާ މި ދަތުރުފުޅަކީ ސީޝެލްސްގެ މިނިވަންކަމުގެ ރަންޔޫބީލް ފާހަގަކުރުމުގެ ގޮތުން ބާއްވާ ޚާއްޞަ ރަސްމިއްޔާތުގައި ޝަރަފުވެރި މެހެމާނެއްގެ ގޮތުގައި ބައިވެރިވެވަޑައިގަތުމަށް ކުރައްވާ ދަތުރުފުޅެއްކަމަށް އިންޑިއާގެ ޚާރިޖިއްޔާއިން ބުނެއެވެ.

މިއީ 2015 ވަނަ އަހަރުގެ ފަހުން ބޮޑުވަޒީރު މޯދީ ސީޝެލްސްއަށް ކުރައްވާ ފުރަތަމަ ދަތުރުފުޅެވެ. ސީޝެލްސްގެ މިނިވަންދުވަހުގެ މުނާސަބަތުގައި ބައިވެރިވުމަށް އިންޑިއާގެ ދިފާޢީ ބާރުތަކުގެ ފައުޖަކާއި، އިންޑިއާ ނޭވީގެ ދެ މަނަވަރު ވެސް ސީޝެލްސްއަށް ދިއުމަށް ވަނީ ހަމަޖެހިފައެވެ.

މި ދަތުރުފުޅުގެ ތެރެއިން ބޮޑުވަޒީރު މޯދީ ސީޝެލްސްގެ ރައީސް ހަރމިނީއާ ބައްދަލުކުރައްވައި، ދެ ޤައުމުގެ ދެމެދުގައި އޮތް ގުޅުންތަކާ ބެހޭގޮތުން ފުޅާ ދާއިރާއެއްގައި މަޝްވަރާކުރައްވާނެއެވެ. އަދި ދެ ޤައުމަށް މުހިންމު ސަރަޙައްދީ އަދި ބައިނަލްއަޤްވާމީ ކަންކަމާ މެދު ޚިޔާލު ބަދަލުކުރެއްވުމުގެ އިތުރުން، ސީޝެލްސްގެ ޤާނޫނުހަދާ މަޖިލީހުގައި މޯދީ ތަޤުރީރުކުރެއްވުމާއި، އެޤައުމުގައި ދިރިއުޅޭ އިންޑިއާގެ ރައްޔިތުންނާ ބައްދަލުކުރެއްވުން ވެސް މި ދަތުރުފުޅުގެ އެޖެންޑާގައި ހިމެނެއެވެ.