ފީފާގެ ރައީސް އިންފަންޓީނޯ ރާއްޖެ ވަޑައިގަންނަވައިފި، ހޫނު މަރުހަބާއެއް

ދުނިޔޭގެ ފުޓްބޯޅައާ ބެހޭ މައި އިދާރާ، ފީފާގެ ރައީސް ޖިއާނީ އިންފަންޓީނޯ މިއަދު ރާއްޖެ ވައިޑައިގެންފިއެވެ.

އިންފަންޓީނޯ ރާއްޖެ ވަޑައިގަތުމުން ވެލާނާ އިންޓަރނޭޝަނަލް އެއާޕޯޓުން އެމަނިކްފާނަށް ވަނީ ވަރަށް ހޫނު މަރުހަބާއެއް ދަންނަވާފައެވެ. ވީއައިއޭއިން އިންފަންޓީނޯއަށް މަރުހަބާ ދެންނެވީ، އެފްއޭއެމްގެ ރައީސް އަހުމަދު ތޯރިގާއި، ޓޫރިޒަމް އަދި ތިމާވެއްޓާބެހޭ ވަޒީރު ޠާރިޤް އިބްރާހިމްގެ އިތުރުން އެކި އިދާރާތަކުގެ ބޭފުޅުންނެވެ.

މިކަމަށްޓަކައި ވީއައިއޭގައި ހާއްސަ އިވެންޓެއް ކުރިއަށްގެންދިޔައިރު މި ހަރަކާތުގައި ޤައުމީ ފުޓްބޯޅަ ޓީމްގެ އިތުރުން ފުޓްބޯޅަ އާއިލާގެ ގިނަބަޔަކު ބައިވެރިވިއެވެ. ފީފާގެ ރައީސްއަށް މަރުހަބާ ދެންނެވުން ކުރިއަށްގެންގޮސްފައިވަނީ ސަގާފީ ހަރަކާތްތަކާއެކުގައެވެ.

ފީފާގެ ރައީސް ރާއްޖެއަށް ވަޑައިގެންނެވިއިރު، މިއީ 19 އަހަރުގެ ތެރޭގައި އެ އިދާރާގެ އެންމެ އިސްވެރިއަކު ރާއްޖެ ވަޑައިގެން ފުރަތަމަ ފަހަރެވެ. އެފްއޭއެމުން ބުނީ ފީފާގެ ރައީސްގެ މި ދަތުރުފުޅުގެ ސަބަބުން ރާއްޖޭގެ ފުޓްބޯޅައިގެ ފޯރި ގަދަވެގެންދިއުމަށް ވަރަށްބޮޑު ހިތްވަރެއް ލިބިގެންދާނެ ކަމަށެވެ.

އިންފަންޓީނޯގެ މި ޒިޔާރަތުގައި މިއަދު ހަވީރު ގަލޮޅު ދަނޑުގައި ވަނީ ދައްކާލުމުގެ ހާއްސަ ފުޓްބޯޅަ މެޗެއްވެސް ކުޅުމަށް ނިންމާފައެވެ. މި މެޗްގައި ބައްދަލުކުރާނޯ ފީފާގެ ރައީސް އިންފަންޓީނޯގެ ޓީމާއި ރައީސް ޑރ.މުހައްމަދު މުއިއްޒުގެ ޓީމެވެ. މި މެޗްގައި ދުނިޔޭގެ ފުޓްބޯޅައިގެ ލެޖެންޓުން ފެނިގެންދާއިރު، ރާއްޖޭގެ ފުޓްބޯޅައިގެ ލެޖެންޑުންވެސް ފެނިގެންދާނެއެވެ.