ބީއެމްއެލްގެ ލޯނު ދޫކުރާ އުމުރު 75 އަހަރަށް މަތިކޮށްފި

ބޭންކް އޮފް މޯލްޑިވްސް (ބީއެމްއެލް) އިން ލޯނާއި ފައިނޭންސިންގެ ހިދުމަތްތައް ފޯރުކޮށްދޭ އެންމެ މަތީ އުމުރު 60 އަހަރުން 75 އަހަރަށް ބަދަލުކޮށް، އެ އުމުރު މަތިކުރުމަށް ނިންމައިފިއެވެ.

ބީއެމްއެލްއިން މިކަން އިއުލާންކޮށްފައިވަނީ، މިއަދު އެ ކުންފުނިން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ކުންފުނީގެ ސީއީއޯ، މުހައްމަދު ޝަރީފްއެވެ.

މި ނިންމުމާ ގުޅޭގޮތުން ސީއީއޯ މުހައްމަދު ޝަރީފް ވިދާޅުވީ، މިހާތަނަށް އެ ބޭންކުގެ އުސޫލު އޮތްގޮތުން ލޯނު ދޫކުރަމުން އައީ ލޯނު ނަގާ ފަރާތުގެ އުމުރުން އެންމެ މަތިވެގެން 60 އަހަރުވާއިރު އެ ލޯނު ދައްކާ ނިމޭ ގޮތަށް ކަމަށެވެ.

އެގޮތުން، ބޭންކުގެ ބޯޑުން މި ނިންމުން ނިންމާފައިވަނީ އިއްޔެ ބޭއްވި ބައްދަލުވުމެއްގައި ކަމަށް ޝަރީފް ވިދާޅުވިިއެވެ. މި އާ ބަދަލާއެކު، ލޯނު ނަގާ ފަރާތުގެ އުމުރުން 75 އަހަރުވުމާ ހަމައަށް ލޯނު ދެއްކޭނެއެވެ.

55 އަހަރުގެ ބޭފުޅަކަށް ވެސް މިހާތަނަށް ލޯނު ދެމުން އައީ ފަސް އަހަރުން ދައްކާ ނިންމާ ގޮތަށް. މިހާރު ބަދަލު މި ކުރީ 75 އަހަރަށް.

މި ބަދަލުގެ ސަބަބުން ކަންކަން ހިނގާނެ ގޮތް ތަފްސީލުކޮށްދެއްވަމުން ޝަރީފް ވިދާޅުވިއެވެ.

އެހެންކަމުން އުމުރުން ދުވަސްވީ މީހުންނަށްވެސް ލޯނު އަނބުރާ ދެއްކުމަށް އިތުރު އަހަރުތަކެއް ލިބިގެންދާނެއެވެ.

މި ބަދަލުގެ ސަބަބުން މެދުއުމުރުފުރައިގެ މީހުންނަށް ބޮޑެތި މަޝްރޫއުތަކަށާއި ކަންކަމަށް ލޯނު ހޯދުމުގައި ބޮޑެތި ލުއިތަކެއް ލިބި، ދިގު މުއްދަތަކަށް ބަހާލައިގެން ފައިސާ ދެއްކުމުގެ ފުރުސަތު ފަހިވެގެން ދާނެއެވެ.

މީގެ އިތުރުން އާމްދަނީ ލިބޭ ފަރާތެއްނަމަ، އުމުރުން ދުވަސްވީ ނަމަވެސް ބޭންކުގެ ކްރެޑިޓް ކާޑުގެ ހިދުމަތް މިހާރުވެސް ދޫކުރަމުންދާ ކަމަށް ސީއީއޯ ޝަރީފް ވަނީ ފާހަގަކޮށްފައެވެ.