ރާބަދި ޗެލެންޖް 2024 މިމަހު 25 ގައި ފަށަނީ

މީދޫ ޖަމްޢިއްޔަތުއް ޞަލާޙުގެ ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު "ރާބަދި ޗެލެންޖް 2024" މިމަހުގެ 25 ގައި ފެށުމަށް ވަނީ ހަމަޖެހިފައެވެ.

ރާބަދި ޗެލެންޖް އެންމެ ފުރަތަަމަ ބާއްވާފައިވަނީ 2019 ވަނަ އަހަރު އެވެ. އަދި އެ މުބާރާތުގެ ފައިނަލުގައި މީދުއްޕަރު 4-3 ގެ ނަތީޖާއަކުން ބަލިކޮށް ޗެމްޕިއަންކަން ހޯދީ ދިގަލި މޯލްޑިވްސް އެވެ. އަދި އެކި ސަބަބުތަކާ ހުރެ 2020 އަދި 2021 ވަނަ އަހަރު މުބާރާތް ނުބޭއްވި ދިއުމަށް ފަހު 2022 ވަނަ އަހަރު ވަނީ އަލުން ރާބަދި ޗެލެންޖް ބާއްވަން ފައްޓަފައެވެ.

އެޕްރީލް 25 އިން މެއި 8 ގެ ނިޔަލަށް ރ.މީދޫގައި ކުރިއަށް ގެންދިއުމަށް ހަމަޖެހިފައިވާ މިއަހަރުގެ ރާބަދި ޗެލެންޖްގައި 14 ޓީމެއް ބައިވެރިވެފައި ވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ހަތަރު ގުރޫޕަކަށް ބަހާލައިގެންނެވެ. ގުރޫޕް އެކެއް އަދި ދޭއްގައި ހަތަރު ޓީމު ހިމެނޭ އިރު އަނެއް ދެ ގުރޫޕުގައި ހިމެނެނީ ތިން ޓީމެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭ ގޮތަށެވެ.

މުބާރާތުގެ ގުރުލުން މިމަހުގެ 13 ވަނަ ދުވަހުގެ ރޭ ބާއްވާފައިވާއިރު، ގުރޫޕް އޭގައި ހިމެނެނީ މީދުއްޕަރު، މާމުނަގައު، އެމަރަލްޑް މޯލްޑިވްސް އަދި ހެރިޓޭންސް އާރަށެވެ. ގުރޫޕް ބީގައި ހިމެނެނީ ރީތިފަރު ރިސޯޓް، ކުޑަފުށު، ފުރަވެރި މޯލްޑިވްސް ގެ އިތުރުން ޖޯލި ބީއިންގ އެވެ. ގުރޫޕް ސީގައި ހިމެނެނީ ޖޯލި މޯލްޑިވްސް، ކޯރާ ކޯރާ އަދި ދިގަލި މޯލްޑިވްސް އެވެ. އަދި ގުރޫޕް ޑީގައި ހިމެނެނީ އެނަރަލްޑް ފާރުފުށި، ދަ ސްޓޭންޑާޑްގެ އިތުރުން އަލައިލާ ކޮތައިފަރު އެވެ.