ހުޅުމާލޭ ފޭސް ދޭއްގައި ތަރައްޤީކުރާ ނޭޝަނަލް ފުޓްސަލް އެރީނާގެ މަސައްކަތް މިއަދު ފަށަނީ

ދިވެހިރާއްޖޭގައި ފުޓްސަލް އިތުރު ހަރުފަތަކަށް ގެންދިއުމަށް ސަރުކާރުން ކުރަމުންދާ މަސައްކަތްތަކުގެ ދަށުން، ހުޅުމާލޭގެ ދެވަނަ ފިޔަވަހީގައި ގާއިމުކުރުމަށް ނިންމާފައިވާ ޒަމާނީ ފުޓްސަލް އިންޑޯ ކޮމްޕްލެކްސް ނުވަތަ "ނޭޝަނަލް ފުޓްސަލް އެރީނާ" ގެ އަމަލީ މަސައްކަތް މިއަދު ރަސްމީކޮށް ފަށަން ނިންމައިފިއެވެ.

މި މަޝްރޫއު ކުރިއަށް ގެންދިއުމަށް ސަރުކާރުން ހަވާލުކޮށްފައިވަނީ، ލޮޖިސްޓިކްސް އަދި އިމާރާތްކުރުމުގެ ދާއިރާގައި ފުޅާ ދާއިރާއެއްގައި ހަރަކާތްތެރިވާ ކުންފުންޏެއް ކަމަށްވާ ލިއޯ ޓްރޭޑިންއާއެވެ.

މި ކޮމްޕްލެކްސް އެޅުމަށްޓަކައި ހުޅުމާލޭ ދެވަނަ ފިޔަވަހިން ބިން ހަމަޖެއްސުމުގެ އެއްބަސްވުމުގައި ސްޕޯޓްސް މިނިސްޓްރީއާއި، ފިނޭންސް މިނިސްޓްރީ އަދި އެޗްޑީސީއާ ދެމެދު ސޮއިކޮށްފައިވަނީ، މިދިޔަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. އަދި މި އަހަރުގެ ޖުލައި މަހުގެ ތެރޭގައި ރައީސް ޑރ. މުޙައްމަދު މުޢިއްޒު ވަނީ، މި ތަނުގައި ބައިނަލްއަގްވާމީ މުބާރާތްތައް ބޭއްވޭނެ ފެންވަރުގެ ދަނޑަކާއި، ކުޅުންތެރިން ތަމްރީނުކުރުމަށް ހާއްސަ ދަނޑުތަކެއް ހުންނާނެ ކަމަށް ވިދާޅުވެފައެވެ.

ތިން ފަންގިފިލާއަށް އިމާރާތްކުރުމަށް ހަމަޖެހިފައިވާ މި ފުޓްސަލް އެރީނާ ފަރުމާކޮށްފައިވަނީ ވަރަށް ފުރިހަމަ ވަސީލަތްތަކާއެކުގައެވެ. އެގޮތުން، އިމާރާތުގެ ތިރީ ބައި ނުވަތަ ގްރައުންޑް ފްލޯ ހާއްސަކުރެވިފައިވަނީ، ދުނިޔޭގެ ފުޓްބޯޅަ އިދާރާ (ފީފާ) ގެ މިންގަނޑުތަކަށް ފެތޭ ބައިނަލްއަޤްވާމީ މުބާރާތްތައް ކުޅުމަށެވެ. މީގެ އިތުރުން، އިމާރާތުގެ މަތީ ދެ ފަންގިފިލާގައި ކުޅުންތެރިންގެ ފަރިތަކުރުންތަކަށް ހާއްސަކޮށްގެން ޖުމްލަ ހަތަރު ޕިޗު ގާއިމުކުރެވޭނެއެވެ.

ކުޅިވަރު ކުޅޭ ދަނޑުތަކުގެ އިތުރުން، ކުޅުންތެރިންނާއި އޮފިޝަލުންނަށް ބޭނުންވާނެ އެހެނިހެން މުހިންމު ހިދުމަތްތައް ވެސް މި ކޮމްޕްލެކްސްގައި ހިމެނުމަށް ވަނީ ރާވާފައެވެ. އޭގެ ތެރޭގައި، ކުޅުންތެރިންނަށް މައުލޫމާތު ދިނުމަށް ބޭނުންކުރާ ކްލާސްރޫމްތަކާއި، ކުއްލި ސިއްހީ ފަރުވާ ދިނުމަށް ހާއްސަ ފަސްޓްއެއިޑް ރޫމެއްގެ އިތުރުން ޓެކްނިކަލް ރޫމްތައް ހިމެނެއެވެ. އަދި ކުޅިބަލަން ވަންނަ ފަރާތްތަކާއި ކުޅުންތެރިންގެ ބޭނުމަށް ކެފެޓީރިއާއެއް ވެސް މި އިމާރާތުގައި ގާއިމުކުރެވޭނެއެވެ.

މިފަދަ ޒަމާނީ އިންޑޯ ފުޓްސަލް ކޮމްޕްލެކްސްއެއް ނެތް ނަމަވެސް، ދިވެހި ފުޓްސަލް ޓީމުން ވަނީ ބައިނަލްއަގްވާމީ މައިދާނުގައި ބޮޑެތި ކާމިޔާބީތަކެއް ހޯދާފައެވެ. އެގޮތުން، ސަރަހައްދީ ފުރަތަމަ ފުޓްސަލް މުބާރާތުގެ ޗެމްޕިއަންކަން ރާއްޖެއިން ހޯދާފައިވާއިރު، ދާދި ފަހުން ޗައިނާގައި ކުރިއަށްދިޔަ އިންވިޓޭޝަނަލް ފުޓްސަލް މުބާރާތުގައި ވާދަކޮށް ޤައުމީ ޓީމުން ވަނީ ލޯ މެޑަލް ހާސިލުކޮށްފައެވެ.