ސަރުކާރުން ޝޯވ ކެންސަލްކުރިކަމަށް ދެކެވޭ ވާހަކައަކީ ދޮގެއް: ޔޫތް މިނިސްޓްރީ

އޮސްޓްރޭލިއާގެ ބޭންޑެއް ކަމަށްވާ 'ބިޔޯން އަގެއިން' އިން މާދަމާ ރޭ މާލޭގައި ބޭއްވުމަށް ހަމަޖެހިފައި އޮތް މިއުޒިކް ޝޯ ސަރުކާރުން ކެންސަލްކުރިކަމަށް ދެކެވޭ ވާހަކައަކީ ދޮގެއް ކަމަށް ޔޫތު މިނިސްޓްރީން ބުނެފިއެވެ.

އުބާ އިވެންޓްސްއިން އިންތިޒާމުކޮށްގެން ސޯޝަލް ސެންޓަރުގައި ބޭއްވުމަށް ތައްޔާރުވަމުންދިޔަ މި ޝޯ އެތަނުގައި ކުރިއަށް ނުގެންދެވޭނެ ކަމަށް ޔޫތު އެމްޕަވަމަންޓް މިނިސްޓްރީން އިއްޔެގެ ވަގުތެއްގައި ވަނީ އަންގާފައެވެ.

މިކަމާ ގުޅިގެން ރައީސް ނަޝީދު އެކްސްގައި ކުރެއްވި ޕޯސްޓެއްގައި ވަނީ، އެފަދަ ޝޯތަކާއި އަދި މިއުޒިކް މަނާކުރެވިގެން ނުވާނެ ކަމަށް ވިދާޅުވެ ނުރުހުންފާޅުކުރައްވާފައެވެ.

"އެ ޝޯ މަނާ ކުރެވިގެން، މިޔުޒިކު މަނާކުރެވިގެން ނުވާނެ. ރާއްޖޭގެ ޒުވާނުން އެދޭ ކަންކަން މި ރާއްޖޭގައި ހިންގެން ޖެހޭނެ. މިއީ ވަކި ބައެއްގެ ރާއްޖެއެއް ނޫން، މިއީ ހުރިހާ ދިވެހިންގެ ރާއްޖެ،" ނަޝީދުގެ ޕޯސްޓުގައި ވިދާޅުވިއެވެ.

އެކަމާ ގުޅިގެން ޔޫތު މިނިސްޓްރީން ބުނީ، އެ މިނިސްޓްރީން ޝޯވް ކެންސަލް ކުރަން ނާންގާ ކަމަށާ، އެދުނީ އެހެން ތަނަކަށް ބަދަލުކޮށްދޭން ކަމަށެވެ.

”އަދި، އެކަމުގައި އެހީތެރިވެދޭނެކަމުގެ ޔަޤީންކަންވެސް އޮގަނަސިޒަރަށް ދިނިން. އެއީ ސޯޝަލް ސެންޓަރުގެ، ސްޓޭޖުގެ ފުރާޅު ހިމެނޭގޮތަށް، އިންޑޯ ހޯލުގައި ވަގުތުން ކުރަން ހުރި ބޮޑެތި މަރާމާތުތަކެއް ހުރުމުން.“ ޔޫތު މިނިސްޓްރީން ބުންޏެވެ.