ޒުވާނުންގެ ނަފްސާނީ ދުޅަހެޔޮކަމަށް ޚާއްޞަ ހިލޭ ގުޅޭ ހޮޓްލައިން "1456" ތަޢާރަފުކޮށްފި

ދިވެހި ޒުވާނުންގެ ނަފްސާނީ ދުޅަހެޔޮކަން ކަށަވަރުކޮށް، އެ ފަރާތްތަކަށް ބޭނުންވާ އެހީތެރިކަމާއި އިރުޝާދު ފޯރުކޮށްދިނުމުގެ ގޮތުން ޚާއްޞަ ހިލޭ ގުޅޭ ހޮޓްލައިން "1456" ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާއިން ރަސްމީކޮށް ތަޢާރަފުކޮށްފިއެވެ.

މި ޚިދުމަތަކީ ސަރުކާރު ބަންދު ނޫން ކޮންމެ ދުވަހަކު، އާދީއްތަ ދުވަހުން ފެށިގެން ބުރާސްފަތި ދުވަހުގެ ނިޔަލަށް، ހެނދުނު 8:00 އިން މެންދުރުފަހު 2:00 އާ ދެމެދު ކޮންމެ ޒުވާނަކަށްވެސް މުޅިން ހިލޭ ލިބޭނެ ޚިދުމަތެކެވެ. ސަރުކާރު ބަންދު ދުވަސްތަކުގައި މި ހޮޓްލައިންގެ ޚިދުމަތް މެދުކެނޑޭނެއެވެ.

ޔޫތު މިނިސްޓްރީން ބުނިގޮތުގައި، މި ހޮޓްލައިން ތަޢާރަފުކުރުމުގެ މައިގަނޑު މަޤްޞަދަކީ ކޮންމެ ޒުވާނަކަށްވެސް އެމީހެއްގެ ޙާލަތާއި ބޭނުންތަކާ އެއްގޮތަށް، އެއް ފުރާޅެއްގެ ދަށުން ފަސޭހަކަމާއެކު ކައުންސެލިންގއާއި، ނަފްސާނީ ޞިއްޙަތުގެ އެހީތެރިކަން އަދި ދުޅަހެޔޮ ދިރިއުޅުމަކަށް މަގުދައްކައިދޭ އިރުޝާދު ފޯރުކޮށްދިނުމެވެ.

1456 ހޮޓްލައިން މެދުވެރިކޮށް ލިބޭނެ މުހިންމު ޚިދުމަތްތައް:

ވަކިވަކި ފަރުދުންނަށާއި ޢާއިލާތަކަށް ބޭނުންވާ ކައުންސެލިންގ: ދިރިއުޅުމުގެ އެކި މައްސަލަތަކުގައި އެހީތެރިކަން ފޯރުކޮށްދިނުން.

ނަފްސާނީ ޞިއްޙަތުގެ އެހީތެރިކަމާއި އިރުޝާދު: ނަފްސާނީ ދުޅަހެޔޮކަން ދެމެހެއްޓުމަށް ބޭނުންވާ ފަންނީ ލަފާ ދިނުން.

ނަފްސާނީ ކުއްލި އެހީތެރިކަން: ކުއްލި ނަފްސާނީ ނުތަނަވަސްކަމެއް ކުރިމަތިވާ ޙާލަތްތަކުގައި ދެވޭ އަވަސް އެހީ.

ޞިއްޙީ ސްކްރީނިންގ: ނަފްސާނީ އަދި ޢާންމު ޞިއްޙަތު ދެނެގަތުމަށް ކުރެވޭ ސްކްރީނިންގ.

ދިރިއުޅުމުގެ ހުނަރުތަކާއި ނަފްސާނީ ހޭލުންތެރިކަމުގެ ސެޝަންތައް: ދިރިއުޅުމުގެ ގޮންޖެހުންތަކާ ކުރިމަތިލާނެ ގޮތުގެ ހުނަރުތައް ދަސްކޮށްދިނުން.

ނަފްސާނީ އަދި ޖިސްމާނީ ދުޅަހެޔޮކަމާ ގުޅުންހުރި އެހެނިހެން އެހީތެރިކަން.

ހެލްތު މިނިސްޓްރީގެ ތަފާސްހިސާބުތަކުން ހާމަވާ ގޮތުގައި، ރާއްޖޭގައި ނަފްސާނީ އެހީތެރިކަން ހޯދާ މީހުންގެ 60 އިންސައްތައަށްވުރެ ގިނައީ އުމުރުން 18 އަހަރާއި 35 އަހަރާ ދެމެދުގެ ޒުވާނުންނެވެ.

ޒުވާނުންނަށް ޚާއްސަކޮށް މިފަދަ ހޮޓްލައިނެއް ތަޢާރަފްކުރި އިރު، މިހާރުވެސް ޤައުމީ ފެންވަރުގައި ނޭޝަނަލް މެންޓަލް ހެލްތު ހެލްޕްލައިން "1677" މެދުވެރިކޮށް 24 ގަޑިއިރު ނަފްސާނީ އެހީތެރިކަން އަންނަނީ ފޯރުކޮށްދެމުންނެވެ.