ޕެނަލްޓީގައި ކޯރާ ކޯރާ ބަލިކޮށް ޖޯލި މޯލްޑިވްސް ޗެންޕިއަންކަން ހޯދައިފި

ރާއްޖޭގައި ބާއްވާ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު "އިންފިނިޓީ ޕްރޯ ރާބަދި ޗެލެންޖް 2025" ގެ ފައިނަލުގައި އެންމެ ފަހުގެ ޗެންޕިއަން ކޯރާ ކޯރާއި ޖޯލި މޯލްޑިވްސް ވާދަކުރި މެޗު، 3-3 ގެ ނަތީޖާއަކުން އެއްވަރުވެ ނަތީޖާ ނެރުމައްޓަކައި ޖެހި ޕެނަލްޓީގައި 5-7 ގެ ނަތީޖާއަކުން މޮޅުވެ ޖޯލިން މުބާރާތުގެ ޗެންޕިއަންކަން ހޯދައިފިއެވެ.

މުބާރާތުގެ ފައިނަލުން ކޯރާ ކޯރާ ޖާގަހޯދީ ސެމީފައިނަލުގެ ދެވަނަ މެޗުގައި 5-1 ގެ ނަތީޖާއަކުން ޖޯލި ބީއިން ބަލިކުރުމަށްފަހު އެވެ. އަދި ޖޯލި މޯލްޑިވްސް ފައިނަލުން ޖާގަހޯދީ ސެމީފައިނަލުގެ ފުރަތަމަ މެޗުގައި 4-0 ގެ ނަތީޖާއަކުން މީދުއްޕަރު ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި ދެވަނަ ހާފުގައި ދެޓީމުންކުރެ ކޮންމެ ޓީމަކުން އިތުރު ދެލަނޑު ކާމިޔާބުކުރިއިރު މެޗުގެ ފުރިހަމަ ވަގުތުގެ ކުޅުން ނިމިގެންދިޔައީ 3-3 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިއާއެކު މެޗުގެ ނަތީޖާ ނެރުމައްޓަކައި ޖެހި ޕެނަލްޓީގައި ޖޯލި މޯލްޑިވްސްގެ ފަސް ޕެނަލްޓީގެ ތެރެއިން ހަތަރު ޕެނަލްޓީ އެޓީމުން ކާމިޔާބުކުރިއިރު، ކޯރާ ކޯރާ އިން ޖެހި ހަތަރު ޕެނަލްޓީގެ ތެރެއިން އެޓީމަށް ކާމިޔާބުކުރެވުނީ އެންމެ ދެޕެނަލްޓީ އެވެ.

މީގެ އިތުރުން މިމެޗުގައި ޖޯލި މޯލްޑިވްސްގެ މޫސާ ޝުމޫޚް، މޫސާ ލަތީފު އަދި މުސްލިމް މުހައްމަދު މިއިން ކޮންމެ ކުޅުންތެރިއަކު އެއްލަނޑު ކާމިޔާބުކުރިއިރު، ކޯރާ ކޯރާގެ އަލީ ސަމާލް، އަހުމަދު ޒައީމް އަދި މުހައްމަދު އިސާމް މިއިން ކޮންމެ ކުޅުންތެރިއަކު ވެސް ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި ފައިނަލް މެޗުގެ މޮޅު ކުޅުންތެރިއަކީ ޖޯލި މޯލްޑިވްސްގެ މުހައްމަދު ޖުމާން އަހުމަދު އެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ މުހައްމަދު ޖުމާން އަހުމަދު (ޖޯލި މޯލްޑިވްސް)، އިބްރާހިމް ނަދީމް (ޖޯލި މޯލްޑިވްސް)، މުސްލިމް މުހައްމަދު (ޖޯލި މޯލްޑިވްސް)، އަހުމަދު އިސާމް (ކޯރާ ކޯރާ) އަދި ހުސެއިން ޝާހިން (މީދުއްޕަރު) އެވެ.

މީގެ އިތުރުން މުބާރާތުގެ އެންމެ ގިނަ ލަނޑުޖެހި ކުޅުންތެރިޔާގެ މަގާމު ހޯދީ މީދުއްޕަރުގެ ހުސެއިން ޝާހިން އެވެ. އަދި އެންމެ މޮޅު ކޯޗަކަށް ހޮވުނީ ކޯރާ ކޯރާގެ ކޯޗު މޫސާ އިބްރާހިމް އެވެ. ފެއާޕްލޭ ޓީމަކީ ޖޯލި ބީއިން އެވެ. އަދި ބެސްޓް ސަޕޯޓާސް ޓީމަކީ ކޯރާ ކޯރާ އެވެ.

25 އެޕްރީލް 2025 އިން 10 މެއި 2025 ގެ ނިޔަލަށް ކުރިއަށް ގެންދާ މިމުބާރާތުގައި، މި އަހަރުގެ ޖުމްލަ 15 ރިސޯޓަކުން ވާދަކުރާއިރު މުބާރާތް ކުރިއަށްދަނީ ބައިވެރިވި 15 ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމަށް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.

މީގެ އިތުރުން މިއަހަރުގެ މުބާރާތުގެ ޓައިޓަލް ސްޕޮންސާއަކީ އިންފިނިޓީ ޕްރޯއެވެ. އަދި ޑިޖިޓަލް ޕާޓްނަރަކަށް ދިރާގު ހަމަޖައްސާފައިވާއިރު، މީޑިއާ ޕާޓްނަރަކީ ވޮއިސް ސްޕޯޓްސް އެވެ.