ރައްޔިތުންގެ ކަންކަމަށް ހުރަސްއަޅާ ބަޔަކު މަޖިލީހަށް ހޮވާނީތޯ ނޫންތޯ އެބަޖެހޭ ވިސްނަން: ރައީސް މުޢިއްޒު

ރައްޔިތުންގެ ކަންކަމަށް ހުރަސްއަޅާ ބަޔަކު ކުރިއަށް ފަސް އަހަރަށް ރައްޔިތުންގެ މަޖިލީހަށް ހޮވުމާއިމެދު ރައްޔިތުން ވިސްނާލަންޖެހޭ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެވެ.

ރައީސް މިފަދައިން ވިދާޅުވީ ޕީއެންސީ ޓިކެޓްގައި ކުރިއަށް ރައްޔިތުންގެ މަޖިލީހުގައި ފުވައްމުލަކު ދެކުނު ދާއިރާއަށް ވާދަކުރައްވާ ކެންޑިޑޭޓުގެ ކެންޕެއިން ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

އެގޮތުން ރައީސް ވިދާޅުވީ، ދިވެހީންގެ ރާއްޖެއަށް ދަތުރު ކުރުމަށް ފެށި މަސައްކަތުގެ މިހާތަނަށް ހާސިލް ވެފައިވަނީ ދެބައިކުޅަ އެއްބައި ކަމަށެވެ. އަދި ރައްޔިތުންގެ މަޖިލީހުގެ މެޖޯރިޓީ ސަރުކާރަށް ލިބުމަކީ ދިވެހީންގެ ރާއްޖެއަށް ދިޔުމަށް ކުރާ އުއްމީދުތައް ހާސިލްވުމަށް އެންމެ މުހިންމު ކަންތައް ކަމަށެވެ.

މިއާއެކު ރައީސް ވަނީ މިހާރުގެ އެމްޑީޕީ މެޖޯރިޓީ އޮންނަ މަޖިލީހުން ސަރުކާރުން ފޮނުވަމުންދާ ބިލު ތަކާއިމެދު ކަންކަން ކުރައްވަމުން އަންނަ ގޮތަށް އަލި އަޅުއްވާ ލައްވާފައެވެ.

އެގޮތުން ސަރުކާރުގެ ފަރާތުން މަޖިލީހަށް ހުށަހެޅުނު ސޮވެރެން ޑިވެލޮޕްފަންޑާއި ބެހޭ ބިލަކީ ރައްޔިތުންނަށް ނުހަނު މުހިންމު ބިލެއް ނަމަވެސް އިއްޔެ މަޖިލީހުން އެ ބިލު ބޭރުކޮށްލާފައިވާ ކަން އެމަނިކުފާނު ފާހަގަކުރެއްވިއެވެ. އެހެން ކަމުން، ރައްޔިތުންގެ ކަންކަމަށް އެފަދައިން ހުރަސްއަޅާ ބަޔަކު ކުރިއަށް އޮތް ފަސް އަހަރަށް މަޖިލީހަށް ހޮވުމާއިމެދު ރައްޔިތުން ވިސްނާލަންޖެހޭ ކަމަށް އެމަނިކުފާނު ވިދާޅުވިއެވެ.

މި ވޭތުވެރިޔަ ހަތަރު މަސްދުވަހު ފެނިގެން މިދަނީ ސަރުކާރުގެ ވިސްނުމުގައި ނެތް މީހުން މަޖިޅީހުގައި ތިބުމުން ކަން ވަމުންދާ ގޮތް. އަޅުގަނޑުމެން ފާސް ކުރަން ބޭނުންވާ، ރައްޔޮތުންނަށްޓަކައި ހުށަހަޅާ ބިލުތައް ތަޅުމުން ބޭރުކުރާތަން ފެނިގެން މިދަނީ. އެންމެ ފަހުން އެކުރެއްވި ކަމަކީ އިގްތިސާދު ހަރުދަނާ ކުރުމަށް އަޅުގަނޑުމެން ފެށި އެންމެ މުހިންމު މަސައްކަތް ސޮވެރެން ޑިވެލޮޕްމެންޓް ފަންޑު އަލުން ވަރުގަދަކޮށް އެ ފަންޑަށް ހާއްސަ ގާނޫނެއް އެކުލަވާލުމަށް އެންމެ ފުރަތަމަ، މަޖީލިހަށް ވެއްދި އެންމެ މުހިންމު ބިލަކީ، ސޮވެރެން ޑިވެލޮޕްމަންޓް ފަންޑާއި ބެހޭ ބިލު. އެ އެވަނީ މަޖިލީހުން ބޭރު ކޮށްލާފައި. ރައްޔިތުން އެބަޖެހޭ އެބޭފުޅުންގެ އެ ގައުރު ޒިންމާދާރު އަމަލަށް ކުރިއަށް އޮތް މަޖިލިސް އިންތިާބުގައި ޖަވާބުދެއްވަން. އަޅުގަނޑުމެންގެ ކަންކަމަށް ހުރަސް އަޅައި، ރައްޔިތުންގެ ހައްގުގައި ކުރެވޭ ކަންކަމަށް މިގޮތަށް ހުރަސްއަޅާ ބަޔަކު ކުރިއަށް އޮތް ފަސް އަހަރަށް ހޮވާނީތޯ ނޫންތޯ ރައްޔިތުން އެބަޖެހޭ ނިންމަން.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މިއާއެކު ރައީސް ވަނީ ރައްޔިތުންގެ މަޖިލީހަށް ރައްޔިތުން ހޮއްވަވާނީ ސަރުކާރުގެ ފަރާތުން ވާދަކުރައްވާ ކެންޑިޑޭޓުން ކަމާއިމެދު ޔަގީންކުރައްވާ ކަމަށެވެ.

ރައްޔިތުންގެ މަޖިލީހުގެ އިއްޔެގެ ޖަލްސާގައި ސޮވެރެން ޑިވެލޮޕްމަންޓް ފަންޑާއި ބެހޭ ބިލް މަޖިލީހަށް ބަލައިގަތުމަށް ވޯޓަށް އެހުމުން، އެ ބިލު މަޖިލީހަށް ބަލައިގަތުމަށް ފެންނަ ކަމަށް ވޯޓު ލާފައިވަނީ އެންމެ މެންބަރެކެވެ. އެހެންކަމުން ބިލު ވަނީ މަޖިލީހަށް ބަލައި ނުގަނެ ބޭރުކޮށްލާފައެވެ.