މިއަހަރު ހުޅުމާލެ ދެވަނަ ފިޔަވަހިން ގޯތި ވިއްކާނެ - އެޗްޑީސީ
ހުޅުމާލޭގެ ދެވަނަ ފިޔަވަހިން ދިރިއުޅުމަށްޓަކައި މިއަހަރު ގޯތި ވިއްކާނެ ކަމުގައި ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފިއެވެ.
ވީޓީވީގެ ޕޮރޮގްރާމެއްގައި ވާހަކަދައްކަވަމުން އެޗްޑީސީގެ މެނޭޖިން ޑިރެކްޓަރ ސުހައިލް އަހުމަދު ވިދާޅުވެފައިވަނީ ހުޅުމާލެއިން މިއަހަރު ގޯތިވިއްކުމަށް ނިންމާފައިވާކަމަށެވެ. އަދި ގޯތި ވިއްކި ނަމަވެސް ކުރީގެ ސަރުކާރުން އެކަން ކުރިގޮތައް އެކަން ނުކުރާނެ ކަމަށްވެސް ސުހައިލް ވިދާޅުވިއެވެ.
ހުޅުމާލޭގެ ދެވަނަ ފިޔަވަހިން ގޯތި ވިއްކަން ނިންމާފައިވަނީ މިއަހަރުގެ ފަހުކޮޅުގައި ކަމަށްވެސް އޭނާ ވިދާޅުވިއެވެ.
އިތުރަށް ސުހައިލް ވިދާޅުވީ ހުޅުމާލެއަކީ ރާއްޖޭގެ ވަރަށް ގިނަ ރައްޔިތުންގެ އުންމީދާއި ގުޅިފައިވާތަކެއްކަމަށާއި، އެތަނުގައި ރައްޔިތުންނަށް ދިރިއުޅެވޭނެ ފަސޭހަ ވެއްޓެއް ގާއިމް ކުރުމަށް ރައްޔިތުންގެ އެއްބާރުލުންވެސް ބޭނުންވާ ކަމަށް އޭނާ ވަނީ ފާހަގަކުރައްވާފައެވެ.
ހުޅުމާލެ ދެވަނަ ފިޔަވަހިން ގޯތި ވިއްކުމަށް މިސަރުކާރުން މަސައްކަތް ކުރަމުން އަންނައިރު، ކުރީގެ ރައީސް، ޔާމީންގެ ސަރުކާރުގެ ފަހު ދުވަސްތަކުގައި އެތަނުން ގޯތިވިއްކުމަށް ހުޅުވާލި ފުރުސަތުގައި ގިނަ ބަޔަކު ހައުސިން މިނިސްޓްރީއަށް ފޯމް ލާފައިވެއެވެ.
ނަމަވެސް ހައުސިން މިނިސްޓްރީން އެކަންތައް ކުރިއަށް ގެންދިޔަ ގޮތާއި ގުޅިގެން ގިނަ މައްސަލަތަކެއް ދިމާވުމާއި ގުޅިގެން ހުޅުމާލެ ދެވަނަ ފިޔަވަހިން ގޯތި ދޫކުރުން ވަނި އެޗްޑީސީގެ ބެލުމުގެ ދަށަށް ބަދަލުކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
