ސަރުކާރުގެ ހަރަދުގައި ޙައްޖަށްދާ 50 މީހުން މި ފަހަރުގެ ހައްޖުގައި ބައިވެރިވާނެ: ވަޒީރު ޝަހީމް

ކުރިއަށް އޮތް ފަސް އަހަރު ދުވަހުގެ ތެރޭގައި ފަގީރުން ހިލޭ ހައްޖަށް ފޮނުވުމަށް ސަރުކާރުން ނިންމި ނިންމުމާއި އެއްގޮތަށް މި އަހަރު ސަރުކާރުގެ ހަރަދުގައި 50 މީހުން ހައްޖަށް ދާނެ ކަމަށް އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.

އިސްލާމީ ކަންތައްތަކާއި ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ޝަހީމް ވިދާޅުވީ، ފަގީރުން ހައްޖަށް ފޮނުވުމަށް ކުރަމުންދާ މަސައްކަތުގެ ތެރެއިން މި އަހަރު 50 ފަގީރުން ހައްޖަށް ފޮނުވުމަށް ހަމަޖެހިފައިވާ ކަމަށާއި އެ 50 މީހުންނާ މުއާމަލާތު ކުރެވި އެމީހުން ދަތުރަށް ތައްޔާރު ކުރުމުގެ ކަންކަން ކުރެވެމުންދާކަމަށެވެ.

"މެނިފެސްޓޯގައި ބަޔާންކުރައްވާފައިވާ ގޮތުގެ މަތީން ފަގީރުންގެ ބަޔަކު ސަރުކާރުގެ ހަރަދުގައި މި ފަހަރު ހައްޖަށް ދާނެ. އޭގެ ތެރެއިން 50 މީހުން މިފަހަރު މާތް ﷲ އިރާދަކުރެއްވިއްޔާ މިފަހަރު ހައްޖުގައި ބައިވެރިވާނެ"

ވަޒީރު ޝަހީމް ވިދާޅުވިއެވެ.

ވަޒީރު ޝަހީމް ވިދާޅުވީ، އެމީހުން ހޮވާފައިވަނީ ފަގީރުންގެ ދަފްތަރުން ގުރުއަތު ލައިގެން ކަމަށާއި، މީހުން ހޮވާފައިވަނީ އެއްވެސް ނުފޫޒެއް ނެތި ކަމަށާއި، ބޭނުންނުވާ މީހަކު ވެސް ހޮވިފައި އޮވެދާނެ ކަމަށެވެ.

ސަރުކާރުން ކުރިއަށް ގެންދާ މި މަސައްކަތުގައި ކޮންމެ އަހަރަކު މިއަށްވުރެ އިތުރަށް މީހުން ގެންދެވުނު ނަމަވެސް މިއީ ކޯޓާ އާއި ގުޅިފައިވާ ކަމަކަށްވާތީ މިފަހަރު 50 މީހުން ހޮވާފައިވަނީ ލިބިފައިވާ ކޯޓާ ގެ މައްޗަށް ބިނާކޮށްކަމަށް ވަޒީރު ވިދާޅުވިއެވެ.

ފަސް އަހަރުގެ ދުވަހުގެ ތެރޭގައި 1000 ފަގީރުން ހައްޖަށް ފޮނުވުމަކީ ރައީސް ޑރ.މުޙައްމަދު މުޢިއްޒުގެ އަމާޒެއްކަން ފާހަގަކުރައްވަމުން ވަޒީރު ޝަހީމް ވިދާޅުވީ މިއީ އިސްލާމީ ދައުލަތެއްގެ ތެރޭގައި ބިނާ ކުރެވޭ ރަނގަޅު އަސާސެއް ކަމަށެވެ.